Read gen Òzeà 2 Bible Online

Òzeà 2 - gen bible

Òzeà 2

¹Co sɔ̀sɔɛɖea, Izràɛlviwo la sùgbɔ sìgbè àpùtakɔwo nène. Wo mu la teŋu nya woabe hɛ̃hlɛ̃ mè ò. Mawu mu la to na wo be: “Mì mu nyi àpe dùkɔ̃ ke ò.” Lè funua, e la to na wo be: “Mawu àgbèagbea be viwo.”

²Yudàviwo ku Izràɛlviwo la bɔ̀ ɖodu sɔ cã ŋùkɔ̀nɔ̀tɔ yeye na woa ɖokoe. Wo la trɔ ɖo ŋusɛ̃ ɖo èdùa ji, ekèa la nyi ŋùkèkè gã ɖe na Yizrɛ̀l.

³Mì gblɔ̃ na mìa nɔ̀vi ŋusùwo be 'Dùkɔ̃ nyè', eye na mìa nɔ̀vi nyɔ̃nùwo be 'Lɔ̃lɔ̃tɔ nyuɛ̃'.

⁴Tɔhonɔ̀ gblɔ̃ be: “Mì hɛ̃ ènyà kudo mìa nɔ̀, ɛ̃ɛ mì ɖo kòjo na ɛ̀. Nyàwo, mu gbà nyi èsrɔ̃ nyè ò, eye nyè mu gbà nyi yebe àsu cã ò. Ne tutu àhasìwɔ̀nuwo lè yebe ŋùkumè! Ne ɖè àhasìtɔ be jèsìdoa lè yebe ànɔwo be dòdòmè!

⁵Mu nyi nène òa, mù la ɖè è ɖo àma, sìgbè àlekè ènɔa jìa nène. Mù la na Izràɛl be ànyigbã la trɔ zũ zògbè mù la trɔ ɛ̀ wɔ̀ ànyigbã pupui. Mù la na èsìkɔ la tì ì.

⁶Nyè mu la kpɔ ɖo e mè na wo ò ɖo wo nyi àhasìviwo.

⁷Woa nɔ̀ wɔ̀nà àhasì, àmè kè jì woa ɖɔ kudo ŋùkpɛ̃. Ɛ̃ɛ e gblɔ̃nà be: “Mù la zrò kpla àzìãvi nyè kèwo ye nana mù nuɖùɖu ku èsìa. Wo mu nana àwù zɛ̃nà lè ŋuti nyè ò, àmì ku vɛ̃ mu dɛ̃ mù kpɔ ò.”

⁸Yè ŋuti kpɔɖa, mù la tu yebe èmɔ̃wo kudo àŋùjawo, mù la tɔ̃kpa ɖo ji sɔ xe èmɔ̃ na ɛ̀.

⁹E kplɔ̀ yebe àzìãviwo do, vɔ̀ mu la teŋu xe wo ò. E la ji wo vɔ̀ mu la kè ɖo woa ŋuti ò. Eye e la gblɔ̃ lè yeɖokoe mè be: “Mù la trɔ yì èsrɔ̃ nyè cucugbã tɔ̀a gbɔ, ɖo mù vò sãa, sɔ wu fifì.”

¹⁰“Mu nya ɛ̀ be ènyè ye nana èlù, vɛ̃ kudo àmì ò; be ènyè ye nana sìka ku klòsalò kèwo be zã sɔ sumɔ vòdu Baal va yìa.

¹¹Ekèa ŋuti ye, mù la trɔ xɔ̀ èlù nyèa lè yebe hùenu vɛ̃ nyèa lè vɛ̃fiɔ̃fiɔ̃ be gàmè. Mù la trɔ xɔ̀ àvɔ ku àwù kèwo be sɔ wla yebe àmaa, mù la xɔ̀ wo kpata lè e si.

¹²Ɛ̃ɛ, mù la ɖè è ɖo àma lè yebe àzìãviawo be ŋùkumè, eye àmè ɖekpe mu lè la xɔ̀ na ɛ̀ ò.

¹³Mù la ɖè yebe jìjɔɛ donuwo kpata jo, yebe èmɔ̃zɔ̃zɔ̃ kudo àzãɖùɖuwo yebe jɛ̃gbɔ̃zã kudo àzã buwo kpata.

¹⁴Mù la kãkã yebe vɛ̃-gble kudo vòti, kèwo ŋuti be gblɔ̃nà so be: “Wo nyi fɛ̃tu kè àzìãvi nyèwo na mù a.” Mù la sɔ wo wɔ̀ ègbemè ɖèɖe àfi kè ègbemèlãwo la kpɔ nuɖùɖu lèa.

¹⁵Mù la dɔ̃to na ɛ̀ sɔ kù ɖo ŋùkèkè kè be zã sɔ sumɔ Baal kudo nɔ̀viawo. E wɔ̀nà vɔsa na wo. E dona yebe àlɔ̀gàvi kudo èwlɔwo sɔ yìnà yebe àzìãviwo gbɔ. Ènyè ya, e ŋlɔ̀be mù, Tɔhonɔ̀ ye gblɔ̃ ɛ̀.

¹⁶Eŋuã ŋutia, kpɔɖa, mù la blè è ɖo ŋuti la kplɔ̀ ɛ̀ yì zògbè ji eye mù la pò nupo na yebe èjì.

¹⁷Lè funua, mù la trɔ sɔ yebe vɛ̃-gblewo na ɛ̀; mù la trɔ Akɔ̀r be bàlì kè nyi gbledo be bàlìa sɔ wɔ̀ ŋùɖo be àgbo na ɛ̀. Eye e la kplɔ̀ mù do sìgbè lè yebe tùgbɛ̀jɛ mè nène, sìgbè wàlɛbɛ kè wo to lè Ejiptè a nène.”

¹⁸Tɔhonɔ̀ gblɔ̃ gbè ŋua gbè be: “E la yɔ mù be “Àsu nyè” àlo “èsrɔ̃ nyè” eye mu gbà nyi “vòdu nyè” àlo “Àpetɔ nyè” ò.

¹⁹Mù la ɖè vòdu Baal be nyikɔ jo lè ènugbɔ na ɛ̀ kudo vòdu kpɔ̀tɛawo kpata, wo mu la gbà yɔ èɖe be nyikɔ ke ò.

²⁰Nène a ye mù la ɖùzò tɔ̀xɛ kudo dùkɔ̃ nyèa ku ègbemèlãwo, àyamè xèviwo kudo èlãklìviwo lè ànyigbã ji. Mù la gbã, gbà ŋɛ̃ àŋùti ku èwi kudo èlãnuwo kpata kɔ̀ ɖo èdùa godo, eye mù la na jɛ̃gbɔ̃ fɛ̀ɖɛ̀ dùkɔ̃ nyèa.

²¹Eye mù la sɔ wò àgɔ̀ kaka sɔyì. Mù la nyi àpo àgɔ̀sɔ to jɔ̀jɔɛ sòso, màje kudo ŋuzĩzĩkuku mè.

²²Ɛ̃ɛ, mù la sɔ wò àgɔ̀ lè nyàwo toto mè eye wò la nya Tɔhonɔ̀.

²³Gbè ŋua gbèa, Tɔhonɔ̀ ye gblɔ̃ ɛ̀! Mù la ɖo jiŋùkusi be biɔbiɔwo ŋuti eye e cã la na ɖoŋuti ànyigbã tɔ̀awo.

²⁴Ànyigbã cã la na ɖoŋuti èlù, vɛ̃ kudo àmì yeye; eye ekèa kpata la na ɖoŋuti Yìzrɛl be kuefãa.

²⁵Mù la do Yìzrɛl na ɖokoe nyè lè èdùa mè eye mù la kpɔɖomè na 'Lɔ̃lɔ̃ mà-sù', mù la gblɔ̃ na Àmèjro-dùa be: 'Dùkɔ̃ nyè' wò nyi, eye e la ɖo e ŋuti be: 'Mawu nyè'”