Read gen Òzeà 6 Bible Online

Òzeà 6 - gen bible

Òzeà 6

¹Mì gblɔ̃nà be: “Mì na mia trɔ yì Tɔhonɔ̀ gbɔ! Ɖo e do mi àbì, vɔ̀a e ye la dà èdɔ̀ na mi. E pò mi, vɔ̀a e la bla àbìa na mi.

²E la trɔ na mi àgbè. Lè ŋùkèkè èvè, ètɔ̃ yomè a, e la trɔ fɔ̃ mi ɖotè eye mi la trɔ kpɔ àgbè lè E gbɔ.

³Mì na ne mia ji Tɔhonɔ̀ ne mia jèsi ì. Kãkãɖoji lè yebe vava mè sìgbè àlekè fɔ̃fɔ̃mè zena a nène. E la va na mi sìgbè èji jàja kè le wu èsì ànyigbãa nène.”

⁴Tɔhonɔ̀ ɖo e ŋuti gblɔ̃ be: “Nukɛ mù la wɔ̀ na èwò, Efràyim? Èwò Yudà ya ɖe? Mìabe ànùkua wɔ̀wɔ na mù a, lè sìgbè ŋùdekɛ̃nyɛ be lilikpo àlo fɔ̃fɔ̃mè be àhũ jàja kè buna kabaa nène.

⁵Ekèa ŋuti ye mù le pò mì kudo gblɔ̃ɖɛtɔwo be ènyà, eye mù le gblɔ̃ na mì be mì le yì cɔ̃crɔ̃ mè. Kòjosòso nyèa la jè mìa ji sìgbè kɛ̃klɛ̃ nène.

⁶Ɖo ànùkua wɔ̀wɔ ye mù jina mu nyi vɔ̀sawo ò. Woa nya mù be mù nyi Mawu sɔ wu be woa wɔ̀ numème be vɔ̀sawo.”

⁷Sìgbè Adàm nènea, mì gbã zòɖùɖua funu ye mì gbe mù lè.

⁸Gilead nyi ènu gbegblewɔ̀tɔwo be èdù àmè kèwo be àlɔ̀wo pò èhũ.

⁹Sìgbè àjòglasu kèwo lè àjòhamè nènea, Hũbonɔ be hasòso ɖewo le wù àmèwo lè Sikɛ̀m be èmɔ̃ ji. Ènu jiŋɔ ɖe ye nyi ekèa!

¹⁰Lè Izràɛl nyigbã jia, mù kpɔ bùsunuwo Efràyim be àhasìwɔ̀wɔa kplɔ̀ Izràɛl ɖo mà-kɔ̀ mà-kɔ nyinyi mè.

¹¹Eye Yudà cã be hùenu la sù sɔ̀sɔɛɖe. E la nyi wàlɛbɛ kè mù la trɔ sɔ dùkɔ̃ nyèa ɖo yebe èbònua.