Read gen Òzeà 8 Bible Online

Òzeà 8 - gen bible

Òzeà 8

¹Sɔ èzèa do ènu ne wòa ku ì! Kɛ̃tɔa zɔ̃ ɖo Tɔhonɔ̀ be àxuea ji sìgbè èhɔ̃ nène, ɖo wo gble èzòɖùɖu nyèa eye wo dà èse nyèwo ji.

²Wo la do àpa yɔ mù gblɔ̃ be: “Tɔhonɔ̀ nyè, mi jèsi wò, mia Izràɛlviwo!”

³Wo gbe ènu nyuɛ̃ wɔ̀wɔ. Kɛ̃tɔa la tĩ woa yomè.

⁴Wo ɖo èfìɔwo na woa ɖokoewo lè woa ɖokoe sinu. Wo cã cãmìwo, mà biɔ mù ènyà ɖe sè. Wo sɔ woabe klòsalò kudo woabe sìka sɔ wɔ̀ legbaviwo. Ye ŋutia, wo la crɔ̃.

⁵Sàmarìa, Tɔhonɔ̀ gbe àpo ènyìvia. Àpe àdɔ̀mèzea lezò ɖo mìa ŋuti. Kaka sɔna gà kɛ mè mì la kpɔ̀tɔ̀ nɔ̀ sìgbè àmè kèwo mu jè àgɔ̀ ɖe òa nène ò?

⁶Èdɔwɔ̀tɔ kè wɔ̀ ɛ̀a, so Izràɛl mu nyi vòdu ɖe be nyi ò. Ɛ̃ɛ, Sàmarì be ènyì-suvia, wo la flì ì wuwli.

⁷Kè e nyi be wo do àyaa wo la yà àya sɛ̃sɛ̃. Ènu kè la mìɔ̃a, mu la na ènuɖùɖu ɖekpe ò. Ne e va e mèa, eŋuã, àmèjrowo ye la ɖù ì.

⁸Izràɛl crɔ̃ fifìa, wo lè dùkɔ̃wo dòmè sìgbè èze ŋua kè bu yebe àsìxɔ̀xɔa nène.

⁹Ɖo wo yì Àsirìa. Ègbemè be èsɔàkɛtɛ nɔ̀nà ye ɖokoe sinu. Vɔ̀a, Efràyim tu lɔ̃lɔ̃ be èfɛ̃a.

¹⁰To e gbɔ be wo le na ènu dùkɔ̃wo cã, fifìa, mù la bɔ̀ wo ɖodu. Eye zãɖea, èfìɔviwo be èfìɔa be àgbã kè e la dro na woa, la na be wo la ɖù àyà.

¹¹Efràyim ɖì vɔsakpewo sùgbɔ coa, èvuɛ̃ wɔ̀wɔ gbà dri àgbo.

¹²Ne mù gbà gbìgbɔ̀ ŋlɔ̀ èsewo na ɛ̀ cã, Wo mu la sɔ èɖe lè e mè ò.

¹³Wo wùnà èlã sɔ wɔ̀nà vɔsa na mù ɖo èlã ɖùɖu jɔ̀nàjì na wo. Vɔ̀a, nyè mu kpɔna jìjɔɛ ɖe so ekèa ŋuti ò. Fifìa, Tɔhonɔ̀ le ɖoŋùku woabe àgɔ̀jèjea ji, e la dɔ̃to na wo ɖo woabe èvuɛ̃wo ŋuti. Wo la trɔ yì Ejiptè.

¹⁴Izràɛl ŋlɔ̀be àmè kè ɖo èa, àmè kè tù èfìɔsawo, eye Yudà tù èxɔ̀ gãgã sùgbɔwo. Vɔ̀a mù la ɖo èzò ɖoɖa woabe èdùwo mè, ne bèa fiɔ̃ woabe èfìɔsawo.