Read gen Yoɛ̀l 2 Bible Online

Yoɛ̀l 2 - gen bible

Yoɛ̀l 2

¹Mì ku èkpɛ̃ lè Ziɔ̀n. Mì do àpa lele lè èto kɔ̀kɔ̀ɛ nyèa ji! Mì àmè kèwo lè ànyigbã a jia, mì hũhũ ɖo Tɔhonɔ̀ be ŋùkèkèa gbãnà, e lili.

²Vìvìti cicri be ŋùkèkè ɖe ye, lilikpo yìbɔ kudo àhũjàja be ŋùkèkè. Èlãklìviwo be àhùakɔ̃ ɖe gbãnà. Eye wo sùgbɔ gbà ɖo ŋusɛ̃. Wo gbãnà hòo, sìgbè èzã ye le do ɖo ètowo ji nène. Àmè ɖe mu kpɔ ɛ̀ nènea kpɔ gbèɖe ò. Eye àmè ɖe mu la gbà kpɔ ɛ̀ nène lè ŋùkèkè kèwo gbãnàa mè ò.

³Sìgbè èzò bì ènu nènea, wo crɔ̃ ènu sia ènu lè woabe èmɔ̃wo ji. Wo mu gble ènu ɖe ɖɛ ò. Sãa, ànyigbã ji lè sìgbè Edɛ̀n-bɔ mè nène. Vɔ̀ fifìa, e trɔ zũ zògbè pupui ɖèɖe. Àmè ɖekpe mu ci àgbè, lè woa si ò.

⁴Wo lè kpò sìgbè èsɔ yì àhùawo nène, le sidù sìgbè èsɔdotɔwo nène.

⁵Sìgbè àhùakèkeviwo be ègbè nènea, wo le tìkpo jè ètowo tamè; eye wo le ɖì sìgbè èzò bì àmàkpa pupu nène. Wo gbãnà lè àgbà nu sìgbè àhùakɔ̃ sɛ̃ŋu ɖe nène.

⁶Dùkɔ̃wo vɔ̃na lè ŋùkɔ̀ na wo eye àmèwo be ŋùmè cina kpɔ̃.

⁷Èlãkliviawo puna èdù lè àmèwo yomè sìgbè gbãdãgbãwo nène. Wo liana èglì sìgbè àhùawɔ̀tɔwo nène. Woa dòmètɔ ɖe sia ɖe lena yebe èmɔ, mà zɛ̃ yì ɖùsi àlo èmìɔ̃ mè.

⁸Èlãklìvi ɖe mu dona nupo na nɔ̀viawo ò, ɖo ɖe sia ɖe nɔ̀nà yebe èmɔ̃ ji tututu. Wo zrònà tona ènu sia ènu kè wo dà woa, dòmè. Ɖekpe mu xena èmɔ̃ na wo ò.

⁹Wo kãkã ɖo èdù gãa mè. Wo puna èdù to èglìwo ji, wo liana èkpa ɖo àxuewo mè. Wo tona flɛsɛ̀ nu ɖona èxɔ̀wo mè, sìgbè fĩãfìwo nène.

¹⁰Ànyigbã hũhũna lè ŋùkɔ̀ na wo eye jiŋùkusi cã jina la gɛ̃. Dɔ̃ŋùkusu kudo wètri mè ci vĩi, eye wètriviwo mu gbà le kɔ̀ ò.

¹¹Tɔhonɔ̀ ɖè ègbè lè yebe àhùakɔ̃a be ŋùkɔ̀. Ɖo yebe àhùakɔ̃ kèwo sènà ègbè na ɛ̀a sùgbɔ ŋutɔ eye wo gbà ɖo ŋusɛ̃. Ɛ̃ɛ, Tɔhonɔ̀ be ŋùkèkèa jiŋɔ. Àmè kɛ ye la tɛŋu nɔ̀tè lè àzã kèa gbè ò?

¹²Tɔhonɔ̀ gblɔ̃ be: “Mì trɔ va gbɔ nyè ku èjì blibo, lè kuefã, blìbɔ̀-blìbɔ̀ ku èmɔ̃ɛ̃làla mè.

¹³Mì trɛ̃ mìabe èjì, mu nyi mìabe àvɔwo ò.” Ɛ̃ɛ mì trɔ va Tɔhonɔ̀ mìabe Mawu a gbɔ: àdɔ̀mè fàfatɔ ku ŋuzĩzĩku na àmè blibo lè e gbɔ. Mu dona àdɔ̀mèze kaba ò, gbà ɖɔ ku àdɔ̀mè nyuɛ̃. E lè ègbè sɔ̀sɔɛ la sɔ nuvuɛ̃ kè àmè.

¹⁴Ta mu nyɔ òa, e la teŋu trɔ va yebe ɖoɖowo ji. Funua, e la gbà kɔ̀ àdɔ̀mè ɖo mìa ŋuti. Eye mì la hɛ̃ ènunanawo ku vɛ̃ va na Tɔhonɔ̀, mìabe Mawu.

¹⁵Mi ku èkpɛ̃ lè Ziɔ̀n, mì ɖo nubabla ànyi, mì bɔ̀ àmèhaa nu.

¹⁶Mì bɔ̀ dùkɔ̃ bliboa keŋu ɖodu ne bèa nyi bɔ̀bɔ gãaɖe. Mì bɔ̀ àmèsĩsĩwo ɖèviwo kudo èvi lè ànɔ nuwo cã. Ŋusù kè ɖè èsrɔ̃ yeyea ne to va nyɔ̃nù kè yì àsuxue yeyea ne to so xɔ̀mè!

¹⁷Hũbonɔ kèwo le sumɔ Tɔhonɔ̀a, wo ne nɔ fã àvi lè mawuxɔa mè lè vɔsakpea kudo èxɔ̀ mɔnua be dòdòmè. Wo ne gblɔ̃ na Mawu be: “Tɔhonɔ̀ ku ŋuzĩzĩ na dùkɔ̃ wòa. Mù gbà lɔ̃ be kɔ̀ta buwo ne kò mi ò. Ne woa nɔ gblɔ̃ be: “fikɛ ye woabe Mawu a lè ò?”

¹⁸Tɔhonɔ̀ ɖo lɔ̃lɔ̃ tɔ̀xɛ na yebe èdùa. Yebe dùkɔ̃a be nu wɔ̀ ŋuzĩzĩ na ɛ̀.

¹⁹Eye Tɔhonɔ̀ ɖo yebe dùkɔ̃a be kuefã ŋuti, gblɔ̃ na ɛ̀ be: “kpɔɖa mù la trɔ na mì èbli, vɛ̃ yeye kudo àmì ne mìa ɖù la ɖɔpò sùsuiɖe. Nyè mu la gbà na ne dùkɔ̃ kpɔ̀tɛawo ne do mì ŋùkpɛ̃ gbèɖe ò.

²⁰Mù la nyà mìabe kɛ̃tɔ kèwo so èvègoa, ɖo àzɔ̀ge boo na mì. Mù la nyà wo ɖoɖa ànyigbã pupui kudo zògbè ji. Mù la tùtù ŋùkɔ̀jètɔwo ɖo èjè be àpùa mè. Eye ŋùgbesiawo ya ɖo Mèditɛranèa be àpùa mè. Woabe gbãdãgbã kèwo kua be hɔ̃hũɛ jiŋɔ̃a, la gble àyaa pòxla. Ɛ̃ɛ, Tɔhonɔ̀a, ènu jiŋɔ̃wo ye be wɔ̀nà.

²¹Èwò, ànyigbã, mù gbà vɔ̃ ò! Kpɔ jìjɔɛ ne wòa ɖu èwè ɖo Tɔhonɔ̀ le wɔ̀ ènu jɔ̀ àsuwo.

²²Mì, ègbemèlãwo, mì mu gbà vɔ̃ ò! Zògbè ji be ègbewo la trɔ do àmà, àtiwo la na kusɛ̃sɛ̃wo eye vòti ku vɛ̃-gblewo la na woabe àdɔ̀kùnuwo.

²³Mì Ziɔ̀n be ànyigbã ji nɔ̀tɔwo mì kpɔ jìjɔɛ eye mìa sò àyo ɖo Tɔhonɔ̀ mìabe Mawu a ŋuti. Ne èkuɖìɖi be hùenu va yìa, e la ɖo èji ɖoɖa mì sìgbè nyɔna nène eye e la na èji la jà sìgbè àlekè be wɔ̀ na ɛ̀ ɖo sãa nène.

²⁴Èlùwo la ɖɔ àvàa ji, kplikpãwo la ɖɔ ku vɛ̃ kudo àmìwo cã.

²⁵Tɔhonɔ̀ gblɔ̃ be: “Mìabe àgblèmènuku kèwo ŋɔviwo, hùesuviwo, àtrãwo kudo lãklìviwo va gble keŋu-keŋuã, mù la tu yebe èfɛ̃ na mì.

²⁶Mì la ɖùnu, la ɖɔpò. Eye mì la nɔ kafu Tɔhonɔ̀ mìabe Mawu a ku gogo. Ènu jiŋɔwo ɖèɖe ye mù le wɔ̀ na mì. Dùkɔ̃ nyèa, mu la gbà ɖù ŋùkpɛ̃ ke ò;

²⁷nènea, mì la ŋɔjè e mè be mù lè Izràɛlviwo dòmè, be ènyè ye nyi Tɔhonɔ̀, mìabe Mawu a ɖekpe mu lè, sɔ̀ ku mù ò. Eye èŋù mu la gbà kpɛ̃ dùkɔ̃ nyè kpɔ gbèɖe ò.”