Read gen Àmos 1 Bible Online

Àmos 1 - gen bible

Àmos 1

¹Xoma kèa le pò nupo so Àmos, Tɛkòa be àlɛ̃kplɔ̀tɔwo dòmètɔ ɖèka, be ènyàwo ŋuti. Tɔhonɔ̀ ɖè ènyà wawla ɖewo fiɔ ɛ̀, so Izràɛl be fìɔdua ŋuti, èpè èvè sɔ̃ŋu jè ŋùkɔ̀ na ànyigbã hũhũ kè jɔ̀ lè Yudà be èfìɔ Òzias kudo Yòas be èvi Izràɛl be èfìɔ Yeroboam be hùenu.

²Àmos gblɔ̃ be: “Tɔhonɔ̀ lè àdã ji lè Ziɔ̀n e ɖègbè so kaka Yèruzàlɛm. Kɔ̀bɛ gã ɖe be nyi lè Karmèl be ètoa ji, ègbeawo pu, eye èlãwo le ku àdɔ̀ku.”

³Ènyà kè Tɔhonɔ̀ gblɔ̃a yekè: “Mù la sitè ɖo Sirìatɔ kèwo lè Dàmaskòa, be ènudakà wɔ̀wɔ ŋuti. Nyè mu la sɔkè wo ò, ɖo wo mlì gàkpowo jè Gileadviwo ji eye wo wù wo.

⁴Mù la ɖè èzò do èfìɔ Hàzàɛl be fìɔsa mè eye èzò la fiɔ̃ èfìɔ Bɛn Hadàd be àxue gãa.

⁵Mù la fli kɔ̀ci kɔ̀ci kèwo wo sɔ tu Dàmaskò be àgboawo. Mù la crɔ̃ èdùamètɔwo lè woabe èvuɛ̃wo mè, kudo èfìɔ kè le kplɔ̀ jìjɔɛkpɔkpɔ be èdùa. Eye wo la kplɔ̀ Sirìa be dùkɔ̃a sìgbè àhùale nène yì Kirà.” Tɔhonɔ̀ ye gblɔ̃ ɛ̀.

⁶Tɔhonɔ̀ gblɔ̃ be: “Sɔ kù ɖo Gazà be ènu bàɖà wɔ̀wɔ ètɔ̃ kudo ènèawo ŋutia, nyè mu la sɔkè è ò. Ɖo wo kplɔ̀ àmè sùgbɔ yì do àsi na Edɔ̀m sìgbè àhùalewo nène.

⁷Mù la ɖè èzò do Gazà be èglìkpowo mè, eye èzòa la fiɔ̃ yebe fìɔsawo.

⁸Mù la crɔ̃ Asdɔ̀d viwo kpata kudo Àskalɔ̀n be èfìɔa. Mù la trɔ àlɔ̀ ɖo Ekrɔ̀n ŋuti eye Filistìtɔ ɖekpe mu la ci àgbè ò”, Tɔhonɔ̀ ye gblɔ̃ ɛ̀.

⁹Tɔhonɔ̀ gblɔ̃ be: “Sɔ kù ɖo Tirò be ènu bàɖà wɔ̀wɔ ètɔ̃ kudo ènèawo ŋutia, nyè mu la sɔ ɛ̀ kè wo ò ɖo wo kplɔ̀ àmè sùgbɔ yì do àsi na Edɔ̀m sìgbè àhùalewo nène, mà-ɖoŋùku èzòɖùɖu nɔ̀visi leletɔ̀a.

¹⁰Mù la dà èzò ɖo Tirò be èglìkpowo mè eye èzòa la fiɔ̃ yebe fìɔsawo.”

¹¹Tɔhonɔ̀ gblɔ̃ be: “Sɔ kù ɖo Edɔ̀m be ènu bàɖà wɔ̀wɔ ètɔ̃ kudo ènèawo ŋutia, nyè mu la sɔ ɛ̀ kè wo ò, ɖo wo tĩ woa nɔ̀viwo yomè kudo èwui, ŋuzĩzĩ màkutɔ̀ ɖo yebe àdɔ̀mèzea vũvũna ènu gbè sia gbè, eye e nɔ̀nà yebe àdã wɔ̀wɔa ji kaka sɔ yì mà-vɔ.

¹²Mù la ɖo èzò ɖoɖa Temàn ne bèa bì Bosrà be fìɔsawo.”

¹³Tɔhonɔ̀ gblɔ̃ be: “Sɔ kù ɖo Amɔ̀nviwo be ènu bàɖà wɔ̀wɔ ètɔ̃ kudo ènèawo ŋutia, nyè mu la sɔ ɛ̀ kè wo ò. Ɖo wo zɛ̃ pòdo na nyɔ̃nù èfunɔ̀ kèwo lè Gilead, sɔ kèkè woabe èdùa ɖo ji.

¹⁴Mù la ɖo èzò ɖoɖa Rabà be èglìkpowo mè, ne bèa bì fìɔsawo lè àhùa padodo mè lè àhùa wɔ̀wɔ mè, lè àya sɛ̃sɛ̃ be hũhũ mè.

¹⁵Wo la kplɔ̀ woabe èfìɔa àhùale kudo yebe èfìɔviwo”, Tɔhonɔ̀ ye gblɔ̃ ɛ̀.