Read gen Àmos 2 Bible Online

Àmos 2 - gen bible

Àmos 2

¹Tɔhonɔ̀ gblɔ̃ be: “Sɔ kù ɖo Mòab be ènu bàɖà wɔ̀wɔ ètɔ̃ kudo ènèawo ŋutia, nyè mu la sɔ ɛ̀ kè è ò. Ɖo wo fiɔ̃ Edɔ̀m be èfìɔa be èpuwo kudo èzò.

²Mù la ɖo èzò ɖoɖa Mòabviwo ji, eye e la bì fìɔsa kèwo lè Kerìɔt. Lè tùkaɖa ŋua mèa, Mòabviwo la crɔ̃ lè àhùapa kudo èkpɛ̃ be ɖìɖi mè.

³Mù la crɔ̃ kòjoɖotɔa lè woa dòmè, eye mù la wù ŋùkɔ̀nɔ̀tɔwo kpata bɔ̀ ɖo woa ŋuti.” Tɔhonɔ̀ ye gblɔ̃ ɛ̀.

⁴Tɔhonɔ̀ gblɔ̃ be: “Sɔ kù ɖo Yudàviwo be ènu bàɖà wɔ̀wɔ ètɔ̃ kudo ènèawo ŋutia, nyè mu la sɔ ɛ̀ kè wo ò. Ɖo wo gbe èse nyèa, eye wo mu wɔ̀ ɖo àpe ɖoɖoawo ji ò. Ekèa ŋuti ye wo tàsi woa ɖokoe na àjè legba kèwo yomè woa tɔwo jè va yìa.

⁵Mù la ɖo èzò ɖoɖa Yudàviwo eye be la bì Yèruzàlɛm be fìɔsawo.”

⁶Tɔhonɔ̀ gblɔ̃ be: “Sɔ kù ɖo Izràɛlviwo be ènu bàɖà wɔ̀wɔ ètɔ̃ kudo ènèawo ŋutia, nyè mu la sɔ ɛ̀ kè wo ò. Ɖo wo sà àmè jɔ̀jɔɛa, èkluvi ɖo ègà ŋuti, eye wo sà wɔ̀amènɔ̀a ɖo àfɔ̀kpa èvè ŋuti.

⁷Wo tafuna ènu wɔ̀donɔ̀wo eye lè kòjoɖopea, wo hɛ̃nà ènyà gɔ̃glɔ̃ ku wɔ̀amènɔ̀wo. Ètɔ kudo èvi le yì nyɔ̃nùvi ɖèka gbɔ, ne woa sɔ pòɖi àpe nyikɔ.

⁸Lè vɔsakpe ɖe sia ɖe gbɔa wo mlɔ̃na ànyi ɖo àwù kèwo wo va sɔ do àwòba na woa ji, eye wo nùnà àhà lè woabe vòdu sɛ̃pewo vɛ̃ kè wo hlà lè àmèwo sia.

⁹To e gbɔ be mù crɔ̃ Àmorìtɔwo lè woabe ŋùkumè, àmè kèwo jɔ̀ àsu sìgbè sedàti yìji nènea, eye wo sɛ̃ŋu sìgbè àti tìtri nène. Mù crɔ̃ woabe èku sɛ̃sɛ̃wo kudo woabe èkɛ̃awo.

¹⁰Co gãkea, mù kplɔ̀ mì to lè Ejiptè be èdùa mè, mù kplɔ̀ mì to zògbèa ji èpè èkà ne ma sɔ Àmorìtɔwo be ànyigbã do àsi na mì.

¹¹Mù na gblɔ̃ɖɛtɔwo la to so mìabe ŋusùviwo dòmè, eye mù ɖè mìabe ɖèkajɛviwo ɖovò ne àpe sùmɔ̀ sumɔ. Eye Tɔhonɔ̀ biɔ Izràɛlviwo sè be: “Mu nyi nènea ye be lèa?”

¹²Vɔ̀a, mì na vɛ̃ àmè kèwo mu ɖo la nù ì òa, wo nù, ɖo wo nyi àmè ɖè ɖovòwo na mù. Eye mì gbe na gblɔ̃ɖɛtɔwo be wo mu gbà pò nupo lè àpe nyikɔ mè ò.

¹³Kpɔɖa, mù la crɔ̃ mì sìgbè àlekè ègbelɔhũ zĩna èkɔa nène.

¹⁴Àmè kè bina, mu la teŋu si ò. Ŋusɛ̃tɔa, mu la teŋu zã yebe ŋusɛ̃a ò. Eye kãlìsukaa, mu la teŋu hlùɛ̃ yebe àgbè gã ò.

¹⁵Àŋùtidàtɔa, mu la teŋu nɔ̀tè ò. Èdùsitɔ àdodoea cã mu la si lè nu ò eye èsɔdotɔa cã mu la teŋu hlùɛ̃ yebe àgbè gã ò.

¹⁶Gbè ŋua gbèa, kãlìsuka kè lè àhùakɔ̃a be àmè sɛ̃ŋuwo dòmèa, la gble yebe àhùawɔ̀nuwo ɖɛ eye be la si.” Tɔhonɔ̀ ye gblɔ̃ ɛ̀.