Read gen Àmos 3 Bible Online

Àmos 3 - gen bible

Àmos 3

¹Izràɛlviwo, mì àmè kèwo Tɔhonɔ̀ kplɔ̀ so Ejiptè a, mì ɖoto ènu kè be le gblɔ̃ so mìa ŋutia:

²“Mìawo ɖèka kpò ŋuti mù tɛ ɖo lè ànyigbã ji be xomèawo kpata dòmè. Eŋuã ŋutia, mù la biɔ àkɔ̃ŋùta so mìa si lè hũnyànyrã kèwo kpata mì wɔ̀a mè.”

³Ŋusù èvè teŋu zɔ̃ èmɔ̃ ɖodu wàlɛbɛ kè wo mu pò èse sã òa?

⁴Jãŋùta la teŋu hlɔ̃ lè àve mè ne mu kpɔ yebe nuɖùɖu òa? Eye e la teŋu gbo lè yebe mlɔ̃pe ne mu le ènu ɖekpe òa?

⁵Xèvi ɖe la teŋu jè èmɔ̃ mè ne ènu ɖe mu dɔ̃ ɛ̀ yì e gbɔ òa? Èɖɔ la teŋu miɔ̃ lè ye ɖokoe sinu ne mu le ènu ɖekpe òa?

⁶Àhùakpɛ̃ la ɖì lè èdù ɖe mè kè vɔ̃vɔ̃ mu la jè èdùamètɔwo ji òa? Gbledo la jè èdù ɖe ji ne mu nyi Tɔhonɔ̀ ye ɖè èmɔ̃ òa?

⁷Nyàwo be nyi be Tɔhonɔ̀ Mawu mu wɔ̀nà ènu ɖe eye be la gbe fɛ̃kãkã yebe sumɔ̃vi gblɔ̃ɖɛtɔawo ò.

⁸Ne jãŋùta le gboa, àmè kɛ mu la vɔ̃ ò? Ne Tɔhonɔ̀ Mawu le pò nupoa, àmè kɛ ye la gbe yebe àŋɛ̀a dodo ò?

⁹Mì do àpa lè Asdɔ̀d kudo Ejiptè be èxɔ̀ nyuɛ̃wo tamè be: “Mì bɔ̀ lè Sàmarìa be ètowo tamè, ne mìa kpɔ gbegble kudo èfũwɔ̀amè kèwo le jɔ̀ a ɖa.”

¹⁰Eŋuã ŋuti Tɔhonɔ̀ le gblɔ̃ be: “Sàmarìatɔwo mu nya ànùkua wɔ̀wɔ ò. Wo bɔ̀ èhlɔ̃dãnuwo kudo èfĩnuwo ɖo woabe àxue nyuɛ̃wo mè.”

¹¹Ɖo ènu kèawo ŋutia, Sàmarìa, ènu kè Tɔhonɔ̀ gblɔ̃ so ŋuti wòa ye nyi ekèa: “Kɛ̃tɔwo la pòxla èdùa, wo la gbã ŋusɛ̃ wòwo keŋu eye wo la lɔ ènuwo kpata lè àpo àxue nyuɛ̃wo mè.”

¹²Ènu kè Tɔhonɔ̀ gblɔ̃a ye nyi ekèa: “Ne jãŋùta le àlɛ̃ ɖe a, àlɛ̃kplɔ̀tɔa la teŋu hlɔ̃ ɖè àfɔ̀ti èvè àlo èto kãkã lè yebe ènu mè. Nène ye be la nyi na Izràɛlvi kèwo lè Sàmarìa nyigbãa ji, mlɔ̃ kocìvi àlo àbàti jia yeŋu.”

¹³Tɔhonɔ̀ Mawu, àhùadù Mawu a gblɔ̃ be: “Mì ɖoto eye mìa gblɔ̃ àfɔ̀ɖoàfɔ̀ji-nya kèawo na Yakɔb be dùkɔ̃a:

¹⁴Wàlɛbɛ kè mù la sitè ne ma dɔ̃to na Izràɛl ɖo yebe vuɛ̃wo ŋutia, mù la sitè ɖo Betɛ̀l be vɔsakpewo cã ŋuti eye mù la gbã wo pu ànyi.

¹⁵Mù la gbã fàfa hùenu kudo zòmè hùenu be àxuewo kpata. Eye àxue kèwo wo ɖo àcɔ na ku ènyìɖuwo cã mu la gbà nɔ̀ ànyi ò. Àxue ɖìnyiwo la bu keŋu.” Nène a ye Tɔhonɔ̀ gblɔ̃a yeŋ