Read gen Àmos 4 Bible Online

Àmos 4 - gen bible

Àmos 4

¹Mìa Sàmarìa nyɔ̃nù kèwo zena sìgbè Bacàn be ènyìnɔwo nènea, mì ɖoto mù: mì tɛna àmègbɔjɔwo ɖo ànyi, mì dona àyà na wɔ̀amènɔ̀wo eye mì gblɔ̃nà na mìa srɔ̃wo be: “Sɔ àhà va ne mia nù.”

²Ɛ̃ɛ, Tɔhonɔ̀ Mawu kã àtãŋu ɖoji be: “Kaka kè mù kpɔ̀tɔ̀ nyi Mawu àɖèsãa, ŋùkèkè kè ji wo la kplɔ̀ mì yì sìgbè èlã kè wo ɖè lè àkpoŋù nua ye kè.

³Mì la si lè èdùa mè to èglì gbãgbãwo mè, àmè sia àmè la le yebe èmɔ̃ sɔ tùtà èvègo.” Nène ye Tɔhonɔ̀ gblɔ̃a yeŋu.

⁴“Izràɛlviwo, mì nɔ yì Betɛ̀l be mawuxɔa mè vɔ̀ mìa kpɔ̀tɔ̀ nɔ jèagla ɖo ŋuti nyè àlo yì Gilgàl ne mìa nɔ wɔ̀ èvuɛ̃ ɖo èvuɛ̃ ji! Ŋùkèkè kè la jè mìabe vava yomè a, mì sa ènumème vɔ̀sawo eye jè ekèa yomè a, mì na àkpedonuwo.

⁵Mì tɔzò kpɔ̃nɔ huãhuã lè vɔsakpea ji ne bèa nyi mìabe àkpedodowo. Mì ɖègbèfã be woa na ènu fàa, mì gblɔ̃ ɛ̀ ku àpa, ɖo ekèa ye jɔ̀nàjì na mìa Izràɛlviwo.” Tɔhonɔ̀ ye gblɔ̃ ɛ̀.

⁶Ènyè ye na be mì ciadɔ̀ lè èdùwo kpata mè, eye mù na ènuɖùɖu dɛ̃ lè mìabe nɔ̀pewo keŋu, vɔ̀a mì mu trɔ va gbɔ nyè ò. Tɔhonɔ̀ ye gblɔ̃ ɛ̀.

⁷“Eye mù tè mì èjijàja kaka na wètri ètɔ̃, na nukuyàya. Mù na èji jà lè èdù ɖe mè, vɔ̀a èdù bu ya mu kpɔ èsì ò. Àgblè ɖe kpɔ èsì eye ɖetɔa ya pu kpakplakpla.

⁸Èdù èvè àlo ètɔ̃ dɔ̃ gogo èɖe ne woa yì ji èsì la nù, eye ekè wo kpɔa, mu sù wo ò. Vɔ̀a mì mu trɔ va gbɔ nyè ò.” Tɔhonɔ̀ ye gblɔ̃ ɛ̀.

⁹“Mù na èdɔ̀ jè mìabe nukuwo mè, èɖewo pu eye èbuwo vovo lè àtiawo ŋuti. Hùesuviwo ɖù mìabe àbɔ mè nukuwo kudo vɛ̃-gbleawo; nène ke wo ɖù èvòtiwo kudo àmìtiwo cã, vɔ̀a mì mu trɔ va gbɔ nyè ò.” Tɔhonɔ̀ ye gblɔ̃ ɛ̀.

¹⁰“Mù ɖo èdɔ̀ vuɛ̃ ɖoɖa mìa dòmè sìgbè lekè mù wɔ̀ kudo Ejiptètɔwo nène. Mù na kɛ̃tɔa crɔ̃ mìabe ɖèkajɛviwo lè èwui nu, xɔ̀ mìabe èsɔwo lè mìa si. Mìabe àsàɖawo ɖɔ kudo ŋutilã kuku kèwo le huɛ̃ do mìa. Co gãke, mì mu trɔ va gbɔ nyè ò.” Tɔhonɔ̀ ye gblɔ̃ ɛ̀.

¹¹“Mù na ènuwo titɔ lè mìa dòmè, sìgbè lekè mù wɔ̀ ɛ̀ lè Sodɔ̀m ku Gòmɔràa nène eye mì to e mè sìgbè àpla kè to èzò mèa nène. Eye mì mu trɔ va gbɔ nyè ò.” Tɔhonɔ̀ ye gblɔ̃ ɛ̀.

¹²“Ènu kèa ŋuti Izràɛl, wò la kpɔ ènu kè mù la tù gbà kudo wòa. Jrà ɖokoe wò ɖo ne wòa dogò ènyè, àpo Mawu a.”

¹³Ɖo e ye wɔ̀ ètowo, gbà ɖo àya pòpo. E ɖènà yebe ɖoɖowo na àgbètɔwo. E ye trɔna èzãa wɔ̀nà ŋùkèkè. E ye zɔ̃nà to ànyigbã a be tèpe yìjiwo. Yebe nyikɔ ye nyi Tɔhonɔ̀, Àhùadù Mawu a.