Read gen Àmos 6 Bible Online

Àmos 6 - gen bible

Àmos 6

¹Gbledo kɛ ye nyi ekèa na mì àmè kèwo si ènu sù le Ziɔ̀n eye mì susu be yèwo lè àgbɔ̃jèpò mè lè Sàmarìa be ètokɔ̃ɛa ji! Mì nyi àmè ŋùkutawo lè dùkɔ̃a mè. Eye mìa nɔ̀vi Izràɛlviwo dɔ̃ gogo mì!

²Mì yì Kàlne bòhũ, ne mìa kpɔ ènu kè jɔ̀a. E yomè a, mì yì kaka Hamàt, èdù gãa mè. Eye mì to funu yì Gat, lè Filistìtɔwo gbɔ. Mì la kpɔ be yèwo mu xɔ̀asì sɔ wu fìɔdu kèawo ò, ne woabe ànyigbãwo gbà hùe wu mìa tɔ̀a ŋutɔ cã a!

³Mì jina la dɔ̃ gbledo be ŋùkèkèa yì ŋùkɔ̀. Lè nyàwo toto mèa, mì le dɔ̃ hũnyànyrã be ŋùkèkèa va ye.

⁴Mì vlũ ɖo nyìɖu be àbàtiwo ji, ɖo kocìviwo ji, le ɖù àlɛ̃vi kudo ènyìvi doàmì.

⁵Mì le jì èhà lelele ɖo èhàjìnuwo be ègbè ɖìɖi ji. Sìgbè David nènea, mì wɔ̀ èhàjìnu yeye buwo.

⁶Mì le nù vɛ̃ lè kɔpò gãgãwo mè, eye mì sìnà àmì xuɛ̃titiwo. Co mi mu le ci flima ɖo gbledo kè la va jɔ̀ ɖo Yosɛ̀f be xòmèa jia ŋuti ò.

⁷Ekèa ŋuti mù le gblɔ̃ fifìa be mì la xɔ̀ ŋùkɔ̀ na àmè kèwo wo la kplɔ̀ mì yì gàtɔnugbea. Eye mìa kuviɔ̃tɔwo nu la sò keŋu.

⁸Tɔhonɔ̀ àhùdù Mawu a, kã àtãŋu kèa be: “Kaka kè mù nyi Mawu a, Izràɛl be gòyiyia wɔ̀ àfɛ̃ na mù ŋutɔ. Mù crì yebe àxue nyuɛ̃awo. Mù la ɖè Sàmarìa be èdùa do àsi na yebe kɛ̃tɔwo.”

⁹Ne ŋusù èwo ye kpɔ̀tɔ̀ lè àxue ɖe mèa, wo la ku keŋu.

¹⁰Nène a, xòmèa be àmè ɖèka la va lɔ ŋutilãkukuawo yì tɔ èzò. Ne àmè ɖe ci àgbè lè àxue kpɔ̀tɛa mèa, àmè kèa la biɔ ɛ̀ be: “Àmè ɖe mu gbà lèa?” E la ɖo e ŋuti na ɛ̀ be “Aò!” Àmè ɖetɔa la gblɔ̃ na ɛ̀ be “Cùu! Wo mu yɔna Tɔhonɔ̀ be nyikɔ wàlɛbɛ kèa ò.”

¹¹Nyàwoa, Tɔhonɔ̀ ne gbe na ègbè kpò: wo la crɔ̃ àxue gã eye wo la flì àxue via wuwlui.

¹²Èsɔwo punadù to àkpãwo jia? Wo la teŋu sɔ ènyìwo, yì jòbò woa jia? Nukɛ ŋuti ye mì trɔ jèna sɔ wɔ̀ àɖi, eye jɔ̀jɔɛsòsoa trɔ zũ veve kpàa ɖo ò?

¹³Mì le kpɔ jìjɔɛ ɖo àlè kè mì kpɔ lè Lodàba be èdùa mèa ŋuti, eye mì gblɔ̃ be: “Ŋusɛ̃ lè mia si, mi sɔ xɔ̀ Kàrnayìm, èdù sɛ̃ŋua.”

¹⁴Vɔ̀a, Tɔhonɔ̀ àhùadù Mawu a gblɔ̃ be: “Mù la na dùkɔ̃ ɖe la sitè ɖo mìa Izràɛlviwo ŋuti. E la tɛ mì ɖo ànyi so kaka Hàmatè yì kɔ̀ ɖo Àrabà be ètɔ̀ wɔ̀adã to lè àpùgo.”