Read gen Àmos 9 Bible Online

Àmos 9 - gen bible

Àmos 9

¹Mù kpɔ Tɔhonɔ̀ nɔ̀tè lè vɔsakpea ji. E gblɔ̃ be: “Mì pò sɔtiwo so ji, ne ègũnuawo ne hũhũ! Nɔ gbã kɔ̀ ɖo èta na àmèwo kpata, eye ne àmè ɖewo gbà kpɔ̀tɔ̀a, mù la crɔ̃ wo keŋu-keŋu. Àmè ɖe mu la teŋu si, kaka ye àmè ɖe la va ci àgbè ò.

²Ne wo teŋu yì èkuwodea, mù la yì kaka funua, yì le wo. Ne wo si yì wla ɖo jiŋùkusia, mù la yì kplɔ̀ wo gbɔ̀ va ànyigbã.

³Ne wo va yì wla ɖo Karmèl be ètoa tamèa, mù la yì ji wo kaka la le wo. Ne wo susu be yèwo la si lè ŋùkɔ̀ na mù, yì wla ɖo àpù be gòglòpea, mù la na àpù mè be èdãa la yì ɖù wo.

⁴Ne wo si yì woabe kɛ̃tɔwo gbɔ sìgbè àhùalewo nènea, mù la na wo la crɔ̃ wo lè funu. Ŋùkuvi nyèwo lè woa ji mu nyi ne ma wɔ̀ ènyuɛ̃ na wo ò, vɔ̀a, ne ma wɔ̀ èvuɛ̃ kudo wo.”

⁵Tɔhonɔ̀ àhùadù Mawu a tɔ àsi ànyigbã a, eye e hũhũ. Ànyigbã ji nɔ̀tɔwo kpata lòfũ. Ànyigbã kpata sitè, eye e jè e mè kpoo sìgbè Ejiptè be ètɔ̀ gãa nène.

⁶Àmè kè tù yebe nɔ̀pe ɖo jiŋùkusi, eye be cɔ̃ ànyigbã ji. E yɔ àpù be èsìa, kãkã ɛ̀ ɖo ànyigbã ji. Yebe nyikɔ ye nyi Tɔhonɔ̀.

⁷Tɔhonɔ̀ gblɔ̃ be: “Izràɛlviwo, mì ɖo àsìxɔ̀xɔ ɖe na mù wu Ètiopìatɔwo mà a? Mù ɖè mì to lè Ejiptè, eye mù ɖè Filistìtɔwo cã lè Kaftɔ̀r ku Sirìatɔwo so Kirò. Mì mu nya ekèa nyuɛ̃ ɖe a?”

⁸Tɔhonɔ̀ Mawu be ŋùkuvi lè Izràɛl be èfìɔ kèwo jèagɔ̀a ji. E le gblɔ̃ be: “Mù la crɔ̃ ɛ̀ lè ànyigbã ji. Co nyè mu la crɔ̃ Yakɔb be xòmèa kpata ò.

⁹Ɛ̃ɛ mù ɖègbè be woa hũhũ Izràɛl be dùkɔ̃a lè dùkɔ̃wo dòmè sìgbè lekè wo hũhũna èkɔ kudo èkpekuiwo lè gàjàfi ji eye èkpe ɖekpe mu gɛ̃na òa nène.

¹⁰Dùkɔ̃ nyèa be àgɔ̀jètɔwo la ku lè èwui nu. Woa àmè kèwo gblɔ̃nà na gblɔ̃ɖɛtɔa be: “Gbèɖe, mù gbà na ne ènyà kè wò le hɛ̃ ku mia be gbledo ne jè mia ji ò!”

¹¹“David be èdùa lè sìgbè èdù kè mu ɖo èkèlili òa nène. Gbè ɖèkaa, ènyè Tɔhonɔ̀ mù la tu yebe àgboawo. Mù la trɔ ɖo yebe èglìawo la trɔ tù èdùa sìgbè lekè e nɔ̀ sãa nène.

¹²Nène a ye Izràɛl be dùkɔ̃a la trɔ xɔ̀ Edɔ̀m be ànyigbã xoxoawo kudo dùkɔ̃ kpɔ̀tɛawo be ànyigbãwo. Ènyè Tɔhonɔ̀ kè gblɔ̃ ɛ̀a ke la gbà wɔ̀ ɛ̀ tututu.”

¹³Tɔhonɔ̀ gbà gblɔ̃ be: “Ŋùkèkè ɖe gbãnà ye nukuyàya la bɔ kaka na nukuyàya be hùenu bu, eye vɛ̃ la bɔ gbɛ̀lu kaka na èlù yeye ɖèɖe. Nène a ye vɛ̃ yeye la nɔ srà lè èkpo ku ètokɔ̃ɛwo ji yeŋu.

¹⁴Mù la trɔ sɔ Izràɛl dùkɔ̃ nyèa ɖo yebe bònu: wo la trɔ tù woabe èdù gbãgbãwo eye wo la gbà jì fuu lè wo mè. Wo la dà vɛ̃-gble eye wo la nù yebe vɛ̃. Wo la do ènu, eye wo la ɖù woabe àgblèmènukuwo.

¹⁵Mù la trɔ likè dùkɔ̃ nyèa ɖo yebe ànyigbã ji. Wo mu la gbà nyà wo gbèɖe lè ànyigbã kè mù trɔ sɔ na woa ji ò.” Nène a ye Tɔhonɔ̀, àpo Mawu a gblɔ̃ yeŋu.