Read gen Yonà 2 Bible Online

Yonà 2 - gen bible

Yonà 2

¹Kè wo sɔ Yonà dà ɖo àpùa mèa, Tɔhonɔ̀ dɔ̃ àpùmè-lã gã ɖe va le Yonà mì. Yonà nɔ̀ àpùmè-lãa be àdɔ̀mè, ŋùkèkè ètɔ̃ ku èzã ètɔ̃[1].

²Wàlɛbɛ kè Yonà lè àpùmè-lãa be àdɔ̀mè a, e fãkue yɔ Tɔhonɔ̀, yebe Mawu.

³E gblɔ̃ be: Ekè mù xixa ɖo àkpɔ̃ gã ɖe mèa, mù do àpa yɔ Tɔhonɔ̀, eye be tɔ̀ na mù. Wàlɛbɛ kè mù lè àvlìmèa, mù fã, ji xɔ̀namètɔ, eye wò sè àpe ègbè.

⁴Wò sɔ mù dãŋùgbe ɖo kaka àpù be ègũ mè, eye àpo èsìa le mù. Àpo àsrɔ̀ke gãwo ku èsì wɔ̀adãwo ɖì mù ɖo ègũ mè, zɔ̃ ji nyè va yì.

⁵Eye, mù gblɔ̃ na ɖokoe nyè be: wò nyà mù jo lè àpo ŋùmè, gãkea, mù la gbà kpɔ àpo Nɔ̀pe Kɔ̀kɔ̀ɛ.

⁶Àpùa bla àmèti nyèa kaka mù tɔ àfɔ̀ èku. Ègũa ɖì mù, eye ketiwo bla èta na mù vɔ̀.

⁷Mù ɖì yì kaka ètowo be ègũwo nu, ànyigbãa do mù ègà, eye be pò mù tu vɔ̀ keŋu na mà-vɔ. Gãke, Tɔhonɔ̀ Mawu nyè, wò sɔ àpo ŋusɛ̃ ɖè àgbè nyè gbɔ̀ va.

⁸Wàlɛbɛ kè àkpɔ̃ ɖɔ èkla nyèa, mù ɖoŋù, fã yɔ Tɔhonɔ̀, eye kuefã nyè va ɖo gbɔ wò, lè àpo Nɔ̀pe Kɔ̀kɔ̀ɛ.

⁹Àmè kèwo xɔ̀nà ènu gbalowo ji sènàa, woa ŋutɔwo ɖènà woabe xɔ̀namè jo lè woa ɖokoewo ji.

¹⁰Vɔ̀a, ènyè yaa, mù la jì àkpedoha, sɔ savɔ na wò. Mù la wɔ̀ ɖo àjɔ̀gbè kè mù fìã a ji. Tɔhonɔ̀ gbɔ ye hlùɛ̃gã lè.

¹¹Ekèa yomè a, Tɔhonɔ̀ pò nupo na àpùmè-lãa, eye be yì tru Yonà dà ɖo àgo.