Read gen Yonà 3 Bible Online

Yonà 3 - gen bible

Yonà 3

¹Ekè àpùmè-lã va tru Yonà vɔ̀a, Tɔhonɔ̀ be ègbè gbà ɖì na Yonà, zè èvègɔ̃a be:

²“Sitè, ne wòa yì Ninivè, èdù gãa mè, ne wòa do àŋɛ̀ kè mù do wò sãa na èdùamètɔwo.”

³Yonà so, eye be yì Ninivè, sìgbè lekè Tɔhonɔ̀ gblɔ̃ na ɛ̀a nène. Vɔ̀a, Ninivè va trɔ zũ èdù gã ɖe, eye, ŋùkèkè ètɔ̃ sɔ̃ŋu ye wo sɔ tona e mè.

⁴Ŋùkèkè ɖèka be àzɔ̃lì kpò Yonà zɔ̃, le gblɔ̃ be: “Tɔhonɔ̀ be: 'E kpɔ̀tɔ̀ ŋùkèkè èkà, ne Ninivè be èdùa ne crɔ̃!'”

⁵Kè Ninivè tɔwo sè àŋɛ̀a, wo xɔ̀ Mawu ji sè. Wo ɖo ènubabla ànyi, wo tà kòtòku, sɔ lòfũ, so àmègãxowo ji, kaka va jè ɖèviwo ji.

⁶Ekè ènyàa va ɖo Ninivè be èfìɔa gbɔa, e sitè lè yebe èfìɔzìkpea ji, ɖè yebe àwùgãa ɖɛ, eye be bɔ̀bɔ̀ nɔ̀ ànyi ɖo àfi mè, la sɔ lòfũ.

⁷E na wo ɖo ègà lè Ninivè be: “Èfìɔ ku yebe àgbònùglawo gblɔ̃ be: 'Àmè sia àmè ku èlãwo keŋu, ènyìwo oò, àlɛ̃wo oò, ègbɔwo oò, ɖekpe mu la ɖùnu, àlo, la nù èsì ò.

⁸Àmèwo ku èlãwo keŋu la tà kòtòku, la fã yɔ Mawu sɛ̃sɛ̃ ɖe, ne àmè sia àmè ne trɔ èdɛ̃, ne woa trɔ lè èvuɛ̃ wɔ̀wɔ ku èhlɔ̃dãdã kè lè àlɔ̀nu na woa yomè.

⁹Àmè kɛ ye nya ne Mawu mu la trɔ ètamè, eye be la ku ŋuzĩzĩ na mi, la ɖè àsi lè yebe àdɔ̀mèze gãa ŋuti, eye mi mu la ku ò?'”

¹⁰Ekè Mawu kpɔ ènu kè wo le wɔ̀a, ekè e kpɔ be wo trɔ lè woabe èvuɛ̃wo yomè a, e ku ŋuzĩzĩ na wo, eye be ɖè àsi lè gbledo kè be ɖo ɖo woa ŋutia ŋuti.