Read gen Yonà 4 Bible Online

Yonà 4 - gen bible

Yonà 4

¹Ekè Tɔhonɔ̀ sɔ kè Ninivètɔwoa, e ve àdɔ̀mè na Yonà ŋutɔ.

²E fãkue na Tɔhonɔ̀ be: “Tɔhonɔ̀, mu nyi ènyà, kè mù gblɔ̃, wàlɛbɛ kè mù lè mia dea ye ŋua òa? Ekèa ye mù gbe, eye mù si le yì Tarsìs. Ɖoa, Mawu kè kuna ŋuzĩzĩ sùgbɔ na àmèa ye wò nyi. Wò gbɔ̃nà èjì ɖɛ blɛ̀wù ŋutɔ, vɔ̀a, wò wɔ̀nà àdɔ̀mè nyuɛ̃ wunu, eye, ne wò ɖo èvuɛ̃ la wɔ̀a, e vena na wò.

³Fifìa ɖe, Tɔhonɔ̀, tɔ̀ wò jɔ̀, jo ɖè àgbè nyèa jo bòhũ, ɖoa, ne mù kua, e nyɔ wu.”

⁴Tɔhonɔ̀ ɖo e ŋuti na Yonà be: “Wò kã ɖo e ji be e nyɔ be wòa do àdɔ̀mèzea?”

⁵Yonà to lè èdùa mè, yì nɔ̀ èdùa be èwèzɛ̃pe. E tù àzàva ɖo funua, eye be nɔ̀ ànyi ɖo e gɔ̃mè, le nɔ̀tè kpɔ ènu kè la jɔ̀ ɖo èdùa jia.

⁶Tɔhonɔ̀ Mawu na kasùwɛl-ti ɖe mìɔ̃, cɔ̃ Yonà ji, ne bèa nɔ na ɛ̀ fàfa, eye ne bèa ɖè yebe àdɔ̀mèzea jo. Yonà kpɔ jìjɔɛ gã ɖe ɖo kasùwɛl-tia ŋuti.

⁷Vɔ̀a, yebe èŋùkè gbèa, Mawu na èŋɔvi ɖe va ɖù kasùwɛl-tia, fɔ̃fɔ̃mè, eye kasùwɛl-tia pu.

⁸Ekè dɔ̃ŋùkusu tɔ hũhũa, Mawu na èwèzɛ̃pe be àya zòzo ɖe pò, eye dɔ̃ŋùkusua ɖù èta ji na Yonà, àleke be e kpɔ̀tɔ̀ kpò ne bèa bu do ye ɖokoe. Yonà biɔ be yèa ku, eye be gblɔ̃ be: “Ne mù ku bòhũa, e nyɔ wu!”

⁹Eye Mawu biɔ Yonà be: “E nyɔ be wòa xà ɖo kasùwɛl-tia ŋuti, la do àdɔ̀mèzea?” Yonà ɖo e ŋuti be: “E nyɔ be ma do àdɔ̀mèze, kaka ne ma ku ŋutɔ cã.”

¹⁰Tɔhonɔ̀ gbà gblɔ̃ na Yonà be: “Èwò yaa, wò le kɔ̀ àdɔ̀mè ɖo kasùwɛl-ti kè ŋuti wò mu wɔ̀ àvũ ɖekpe ɖo òa. E mìɔ̃ lè èzã ɖèka mè, eye be ku lè èzã ɖèka mè.

¹¹Eye ènyè yaa, nyè mu la ku ŋuzĩzĩ na Ninivè, èdù gã kè mè àgbètɔ kèwo wu hotu èkà takpo kèwo mu nya vòvòtoto lè woabe ɖùsi-lɔ ku èmìɔ̃-lɔ dòmè ò, gbàkudo èlãha gbogbo ɖe òa?”