Read gen Àmè Hɛ̃hlɛ̃ 12 Bible Online

Àmè Hɛ̃hlɛ̃ 12 - gen bible

Àmè Hɛ̃hlɛ̃ 12

¹Mirìam ku Arɔ̀n pò nupo ɖo Mosè ŋuti, ɖo èsrɔ̃a ta, ɖoa, Kusì[15] nyɔ̃nù ye Mosè ɖè.

²Wo gblɔ̃ be: “Mosè ɖèka kpò ye Tɔhonɔ̀ pò nupo na a? Mu pò nupo na miawo cã ò a?” Tɔhonɔ̀ sè ènyà kèa.

³Mosè nyi àmè ɖe kè bɔ̀bɔ̀nà ye ɖokoe wu àmèwo kpata, lè ànyigbãa ji.

⁴Lè àvò mè kpòa, Tɔhonɔ̀ gblɔ̃ na Mosè be: “Mì àmè ètɔ̃a, mì yì Ègòdodo be gòxɔa mɔnu.” Wo àmè ètɔ̃a, wo yì.

⁵Tɔhonɔ̀ nɔ̀ lili babla ɖe mè, ɖì va nɔ̀ goxɔa mɔnu. E yɔ Arɔ̀n ku Mirìam, eye wo àmè èvèawo zɔ̃ va ŋùkɔ̀.

⁶E gblɔ̃ na wo be: “Mì ɖo èto, ne mìa sè ènyà kè lè àsi nyèa: Ne Tɔhonɔ̀ be gblɔ̃ɖɛtɔ ɖe lè mìa dòmèa, è nyè Tɔhonɔ̀a, ŋùtègã mè ye mù ɖènà ɖokoe nyè fiɔ ɛ̀ lè. Èdrɔ̃ mè ye mù pònà nupo na ɛ̀ lè.

⁷Vɔ̀a, mu nyi lekea na sumɔ̃vi nyè Mosè ya ò. Ànùkuamè be nyi, lè àpe àxue bliboa mè.

⁸Ŋùkumè ku ŋùkumè ye mù pònà nupo na ɛ̀ lè. Mù ɖènà ɖokoe nyè fiɔna ɛ̀. Nyè mu dona èlo na ɛ̀ ò. E kpɔna Tɔhonɔ̀ be nɔ̀nɔmè. Nukɛ ŋuti mì mu vɔ̃ nupo pòpo ɖo sumɔ̃vi nyè Mosè ŋuti ò?”

⁹Tɔhonɔ̀ do àdɔ̀mèze ɖo woa ŋuti, eye be jo.

¹⁰Ekè lilikpoa gbe jo lè gòxɔa tamè kpòa, Mirìam jè èkpò, zè ɖèka. E ɣe sìgbè ɖèti-fu nène. Kè Arɔ̀n trɔ kpɔ ɛ̀a, e kpɔ be Mirìam jè èkpò.

¹¹Arɔ̀n gblɔ̃ na Mosè be: “Aò! Àpetɔ nyè, tɔ̀ wò jɔ̀, mù gbà dɔ̃ àgɔ̀ kè mi jè a be èto na mi, èvuɛ̃wɔ̀tɔ, ènu mà-nyãtɔ kèawo ò!

¹²Aò! Mù ɖè kuku; Mirìam mu gbà trɔ sìgbè èvi kè ku ɖo àdɔ̀mè na ènɔa, eye yebe àkpa ɖèka nyìnyɔ̀ gbɔ̀xue wo jì ìa nène ò.”

¹³Eye Mosè do àpa, fã yɔ Tɔhonɔ̀ be: “Oò Mawu, dà èdɔ̀ na ɛ̀ jro!”

¹⁴Tɔhonɔ̀ ɖo e ŋuti na Mosè be: “Ne ɖe ye ètɔa tu ètã ɖo ŋùkumè na ɛ̀a ɖe, èŋù mu la kpɛ̃ ɛ̀ ŋùkèkè adrɛ̃ ò a? Mì ɖè è to lè àsàɖaa mè, ŋùkèkè adrɛ̃. E yomè a, e teŋu trɔ va ye tèpe.”

¹⁵Eye, wo ɖè Mirìam to lè àsàɖaa mè, ŋùkèkè adrɛ̃, eye dùkɔ̃a mu hũ jo, kaka na gà kè mè wo gbìgbɔ̀ kplɔ̀ Mirìam va ye tèpe ò.

¹⁶Ekèa yomè a, dùkɔ̃a hɔ̃, jo lè Haserɔt, eye wo yì do àsàɖa ɖo Paràn be zògbè a ji.