Read gen Àmè Hɛ̃hlɛ̃ 13 Bible Online

Àmè Hɛ̃hlɛ̃ 13 - gen bible

Àmè Hɛ̃hlɛ̃ 13

¹Tɔhonɔ̀ gblɔ̃ na Mosè be:

²“Dɔ̃ àmèwo, ne woa yì sã ŋùku, lè Kanàn-nyigbã kè mù sɔ le na Izràɛlviwoa ji. Mì la dɔ̃ ŋusù ɖèka, ɖo kɔ̀ta ɖe sia ɖe nu; àmè sia àmè la nɔ̀ ètɔawo be kɔ̀ta be ègawo nu. Wo la cã wo lè Izràɛlviwo be ŋùkɔ̀nɔ̀tɔwo dòmè.”

³Mosè zɔ̃ ɖo Tɔhonɔ̀ be ègbè ji, dɔ̃ wo, eye ŋusù kèawo keŋu nyi Izràɛlviwo be ŋùkɔ̀nɔ̀tɔwo.

⁴Woabe nyikɔwo ye nyi ekèawo: Samùa kè nyi Zàkur be èvia lè ŋùkɔ̀ na Rubɛ̀n be kɔ̀taa.

⁵Safat kè nyi Horì be èvia lè ŋùkɔ̀ na Simeɔ̀n be kɔ̀taa.

⁶Kàlɛb kè nyi Yefunè be èvia lè ŋùkɔ̀ na Yudà be kɔ̀taa.

⁷Igàl kè nyi Yosɛ̀f be èvia lè ŋùkɔ̀ na Isakàr be kɔ̀taa.

⁸Hosèa kè nyi Nun be èvia lè ŋùkɔ̀ na Efràyim be kɔ̀taa.

⁹Paltì kè nyi Rafù be èvia lè ŋùkɔ̀ na Bɛnyamìn be kɔ̀taa.

¹⁰Gadiɛ̀l kè nyi Sodì be èvia lè ŋùkɔ̀ na Zabulɔ̀n be kɔ̀taa.

¹¹Gadì kè nyi Susì be èvia lè ŋùkɔ̀ na Yosɛ̀f be jìjimèviwo, so Manasè be kɔ̀taa.

¹²Amiɛl kè nyi Gemalì be èvia lè ŋùkɔ̀ na Dàn be kɔ̀taa.

¹³Setur kè nyi Mikàɛl be èvia lè ŋùkɔ̀ na Àsɛr be kɔ̀taa.

¹⁴Nahbì kè nyi Vafsì be èvia lè ŋùkɔ̀ na Neftalì be kɔ̀taa.

¹⁵Guɛ̀l kè nyi Makì be èvia lè ŋùkɔ̀ na Gad be kɔ̀taa.

¹⁶Ŋusù kèwo Mosè dɔ̃ be wo ne yì sã ŋùku, sɔ kpɔ Kanàn-nyigbãa jia be nyikɔwo ye nyi ekèawo. Mosè ɖo nyikɔ na Hosèa kè nyi Nun be èvia be Yosùa[16].

¹⁷Kè Mosè dɔ̃ wo be wo ne yì bè kpɔ Kanàn-nyigbãa jia, e gblɔ̃ na wo be: “Mì lia ètoa to àpùgo lɔ̀ge, ne mìa gɛ̃ ɖo èto-nyigbãa ji.

¹⁸Mìa kpɔ lekè èdùa lè ɖoa, eye mìa kpɔ be èdùa mètɔwo ɖo ŋusɛ̃, àlo wo gbɔjɔ màa. Mìa kpɔ ne èdùa mètɔwo sùgbɔ, àlo wo mu sùgbɔ ò màa.

¹⁹Mìa kpɔ ne èdù kè mè dùkɔ̃ ŋua lèa nyɔ, àlo mu nyɔ ò mà a. Mìa kpɔ ne èdù kèwo mè wo lèawo nyi àsàɖawo loo, àlo wo nyi àgbògbòwo mà a.

²⁰Mìa kpɔ ne ànyigbã nyi ànyigbã nyuɛ̃ loo, àlo mu mìɔ̃nà ènu ò mà a. Mìa kpɔ ne àtiwo mìɔ̃ ɖo e ji loo, àlo wo mu mìɔ̃ ɖo e ji ò mà a. Mìa dojì, sɔ kɛ̃ yebe nuku ɖewo gbɔ̀.” Hùe ŋua nu tutu ye nyi vɛ̃ku yeyewo be hùenu.

²¹Ŋusùawo yì bè kpɔ ànyigbãa ji, so kaka Sin be zògbè a ji, va ɖo Rehov, lè Lebo-Hamat gbɔ.

²²Wo to àpùgo, lia ètoa, kaka yì ɖo Hebrɔ̀n, àfi kè Ahimàn, Sesayì ku Talmayì be dùkɔ̃ kèwo nyi Anàktɔwo be jìjimèviwo nɔ̀nàa. Wo tù Hebrɔ̀n be èdùa, èpè adrɛ̃, gbɔ̀xue wo va tù Tanìs be èdùa, lè Ejiptè-nyigbã ji.

²³Wo va ɖo kaka Ɛskɔ̀l be bàlìa mè, eye wo sò vɛ̃ti be àlɔ̀zɛ̃ ɖe kè ŋuti vɛ̃kpo ɖèka lè. Wo bla ɛ̀ ɖo àti ɖe ŋuti, eye àmè èvè ye teŋu kɔ ɛ̀. Wo gbã yòvobòɖà ku èvò be èkusɛ̃sɛ̃wo cã.

²⁴Wo yɔ tèpe ŋua be Ɛskɔ̀l bè bàlì mè, ekè gɔ̃mè ye nyi 'Vɛ̃kpo' be bàlì mè, ɖo vɛ̃kpo kè Izràɛlviwo gbã lè funua ŋuti.

²⁵Kè bèkpɔɛawo sã kpɔ Kanàn-nyigbãa ji vɔ̀, ŋùkèkè èkà yomè a, wo trɔ gbɔ̀.

²⁶Wo trɔ va kpɔ Mosè, Arɔ̀n ku Izràɛlviwo be àmèha bliboa, lè Paràn be zògbè a ji, lè Kadɛ̀s. Wo ɖè ènyàa na Mosè, Arɔ̀n ku Izràɛlviwo be àmèha bliboa, eye wo sɔ Kanàn-nyigbã ji be nukuawo fiɔ wo.

²⁷Wo gblɔ̃ na Mosè be: “Mi yì ànyigbã kè ji wò dɔ̃ mi ɖoɖaa ji, eye mi kpɔ be e nyi ànyigbã kè ji nyìnɔsi ku ànyisi bɔ lèa ji nyàwo. Ànyigbã ŋua ji be èkusɛ̃sɛ̃ ɖewo ye nyi ekèawo.

²⁸Gãkea, dùkɔ̃ kè lè ànyigbã a jia sɛ̃ŋu, èdùgãwo nyi àgbògbò gã klìkowo, eye mi kpɔ Anàk[17] be jìjimèviwo ŋutɔ cã.

²⁹Àmàlɛkviwo nɔ̀nà Nègev kè nyi àpùgoa be àgowo ji. Hitìtɔwo, Yebusìtɔwo ku Àmorìtɔwo nɔ̀nà ètoa ji, eye Kanànviwo nɔ̀nà àpùa to ku Yɔrdàn be ètɔ̀a ŋuti.”

³⁰Kàlɛb na Izràɛl dùkɔ̃ kè lè sitè ɖo Mosè ŋutia bɔ̀nu. E gblɔ̃ be: “Mi la yì! Mi la lia ètoa, la yì xɔ̀ ànyigbãa lè woa si! Mù kã ɖo e ji be mi la teŋu ɖù woa ji, eye mi la na, wo la bɔ̀bɔ̀ woa ɖokoewo na mi.”

³¹Vɔ̀a, ŋusù kèwo ye lia ètoa, yì kudo è sãa, wo gblɔ̃ ɖo e ŋuti be: “Mi mu la teŋu ɖè àhùa kpe na dùkɔ̃ ŋua ò! Wo sɛ̃ŋu wu mi!”

³²Wo tɔ ànyigbã kè ji wo yì sã ŋùku lèa be ènyà bàɖà gbɔ̃gblɔ̃ na Izràɛlviwo be: “Ànyigbã kè ji mi yìa vũvũna àmè kèwo lè e jiawo ɖùnà. Àmè kèwo keŋu mi kpɔ lè e jiawo nyi àmè jɔ̀ àsu kàkò, tràlàwo sɔ̃ŋu!

³³Kè mi kpɔ àmè jɔ̀ àsu kàkò ŋua kèwo nyi Anàk be jìjimèviwoa, àmè kèwo nyi àmè tràlà gã, àmè gbãgbĩwo sɔ̃ŋua, ɖe kpò mi kpɔ mia ɖokoewo sìgbè hùesuviwo nène. Nène a ke ye woawo cã, wo le kpɔ mi.