Read gen Àmè Hɛ̃hlɛ̃ 14 Bible Online

Àmè Hɛ̃hlɛ̃ 14 - gen bible

Àmè Hɛ̃hlɛ̃ 14

¹Kè Izràɛlviwo sè ènyà kèawoa, àmèha bliboa fã àvi, na àle lè èzã ŋua kpata mè.

²Dùkɔ̃a kpata sitè ɖo Mosè ku Arɔ̀n ŋuti eye wo gblɔ̃ na wo be: “Ne ɖe ye mi ku ɖo Ejiptè-nyigbã ji, àlo, mi jo ku ɖo zògbè kèa ji bòhũa, e la nyɔ wu!

³Nukɛ ŋuti ye Tɔhonɔ̀ kplɔ̀ mi le yì ànyigbã kèa ji, ne mia yì ku lè èwui nu, ne mia srɔ̃wo ku miabe èviwo woa nyi àhùale ɖo ò? Ne mi trɔ yì Ejiptè bòhũa ɖe, mu la nyɔ wua?”

⁴Wo gblɔ̃ na woa nɔ̀nɔwo be: “Mia cã kplɔ̀tɔ, ne mia trɔ yì Ejiptè!”

⁵Eye Mosè ku Arɔ̀n sɔ ŋùmè cɔ̃ ànyi lè Izràɛlviwo be àmèha a kpata be ŋùkɔ̀.

⁶Yosùa, Nun be èvia ku Kàlɛb, Yefunè be èvi kèwo cã yì sã, sɔ kpɔ Kanàn-nyigbãa jiawo zɛ̃ woabe àwùwo lè èkɔ̀.

⁷Wo gblɔ̃ na Izràɛlviwo be àmèha a kpata be: “Ànyigbã ŋua kè ji miawo ya, mì sã, toa, ànyigbã nyuɛ̃ ɖe ŋutɔ-ŋutɔ be nyi!

⁸Ne miabe ènu jè ŋùmè na Tɔhonɔ̀a, e la kplɔ̀ mi yì ànyigbã ŋua ji, eye be la sɔ ànyigbã ŋua kè ji ànyisi ku nyìnɔsi bɔ lèa na mi.

⁹Eŋuã, mì mu gbà jè àgla ɖo Tɔhonɔ̀ ŋuti ò; mì mu gbà vɔ̃ ànyigbã ŋua ji tɔwo ò. Àmè ŋuawoa, ɖe kpò mi la mì wo àgbligbà! Woabe vòduwo jo lè woa ji, vɔ̀a, mìawo ya, Tɔhonɔ̀ lè ku mì. Mì mu gbà vɔ̃ wo ò!”

¹⁰Àmèhaa kpata le gblɔ̃ be yèwo la pò èkpe wo wù, wàlɛbɛ kè Tɔhonɔ̀ be gogo ɖè ye ɖokoe fiɔ, lè Ègòdodo be gɔ̀xɔa mèa.

¹¹Tɔhonɔ̀ gblɔ̃ na Mosè be: “Kaka na gà kɛ mè ye dùkɔ̃ kèa la gbà nɔ crì mù ò? Kaka na gà kɛ mè ye be la gbà nɔ gbe be yè mu la xɔ̀ èji nyè sè, to e gbɔ be mù wɔ̀ jèsìdo sùgbɔ kèawo lè woa dòmè ò?

¹²Mù la dɔ̃ èto na dùkɔ̃ kèa ku èdɔ̀ vuɛ̃, eye mù la xɔ̀ ècrɔ̃nu kè mù ɖo ɖɛ na ɛ̀a, lè e si. Vɔ̀a, èwò ya, mù la sɔ wò wɔ̀ dùkɔ̃ gã kè la sɛ̃ŋu wu ìa.”

¹³Mosè ɖo e ŋuti na Tɔhonɔ̀ be: “Ejiptètɔwo sè be àpo ŋusɛ̃ ye wò sɔ ɖè dùkɔ̃ kèa jo lè woa gbɔ,

¹⁴eye wo gblɔ̃ ɛ̀ na ànyigbã kèa jitɔwo. Àmè kèawo sè be èwò, Tɔhonɔ̀, wò lè dùkɔ̃ wòa dòmè, be wò ŋutɔ, wò ɖè ɖokoe wò fiɔ wo, ŋùkumè ku ŋùkumè. Lili wòa cɔ̃na woa ji. Wò ŋutɔ, wò nɔ̀nà ŋùkɔ̀ na wo, ŋùkèkè mè, lè lili babla mè, eye, èzã mèa, wò nɔ̀nà èzò bìbi babla mè, kplɔ̀nà wo.

¹⁵Eŋuã, wò la crɔ̃ dùkɔ̃ kèa, sìgbè àmè ɖèka nènea? E yomè a, dùkɔ̃ kèwo sè àpo kãlìnu wɔ̀wɔwoa, la gblɔ̃ be:

¹⁶'Tɔhonɔ̀ mu ɖo ŋusɛ̃ la kplɔ̀ dùkɔ̃ kèa sɔ yì ànyigbã kè be àjɔ̀gbè be fìã na woa ji ò. Ekèa ŋuti be crɔ̃ wo lè zògbè a ji ɖo.'

¹⁷Ekèa ŋutia, Tɔhonɔ̀ nyè be ŋusɛ̃ ne ɖè ye ɖokoe fiɔ jro! Ɖoa, wò ŋutɔ, èwò ye gblɔ̃ be:

¹⁸'Ènyè ye nyi Tɔhonɔ̀; mù gbɔ̃nàjì ɖɛ blɛ̀wù, eye mù nyi xòmèfàtɔ. Mù wɔ̀nà ànùkua, mù sɔna àgɔ̀ ku àglajèje kènà àmè, vɔ̀a, mu nyi ènu ɖekpkekpe ji kpò mù ŋɛ̃na ŋùkuvi pu ò. Mù sɔna ètɔwo be àgɔ̀jèje pònà èviwo, kaka sɔ yì jìjimè ètɔ̃, àlo ènègɔ̃a ji.'

¹⁹Tɔ wò jɔ̀, sɔ dùkɔ̃ kèa be èvuɛ̃ kè è jro, sɔ zɔ̃ ɖo lekè lɔ̃lɔ̃ kè wò ɖo na ɛ̀a lòlò ɖoa ji, ku lekè wò lebè na ɛ̀, so gà kè mè wò ɖè è to[18] lè Ejiptè-nyigbã ji, kaka va na fifìa nu!”

²⁰Tɔhonɔ̀ ɖo e ŋuti na Mosè be: “Mù sɔ kè è, sìgbè lekè wò le biɔ ɛ̀a nène.

²¹Gãkea, kaka kè mù lè àgbè, kaka kè Tɔhonɔ̀ be gogoa ɖɔ ànyigbã bliboa jia,

²²àmè kèawo dòmètɔ ɖekpe, àmè kèwo kpɔ àpe gogo ku jèsìdo kèwo keŋu mù wɔ̀ lè Ejiptè-nyigbã ji ku zògbè a ji, vɔ̀ gbà tè mù kpɔ, zè èwo, wàlɛbɛ kè wo gbe be yèwo mu la sè àpe ègbè ò a,

²³woa dòmètɔ ɖekpe, mù le tà ènu be woa dòmètɔ ɖekpe mu la kpɔ ànyigbã kè be àjɔ̀gbè mù fìã na woa tɔgbewo ò! Àmè kèwo crì mùawo dòmètɔ ɖekpe mu la kpɔ ɛ̀ ò!

²⁴Vɔ̀a, sumɔ̃vi nyè Kàlɛb ya la kpɔ ɛ̀, ɖoa, gbɔ̃gbɔ̃ bu ye lè e mè, eye be sè ègbè nyè kè mu vɔ̃ ò a. Mù la kplɔ̀ ɛ̀ yì èdù kè mè be va yì kpɔa mè. Yebe jìjimèviwo la yì xɔ̀ ɛ̀,

²⁵wàlɛbɛ kè Àmàlɛktɔwo ku Kanàntɔwo la nɔ̀ bàlìa mèa. Èsɔ̀ xoxoa, mì la trɔ, la gbìgbɔ̀ tùtà zògbè a ji, tùtà plãŋùpòfɛ̃ be àpùa to.”

²⁶Tɔhonɔ̀ gblɔ̃ na Mosè ku Arɔ̀n be:

²⁷“Kaka na gà kɛ mè ye dùkɔ̃ jɔ̀vuɛ̃ kèa la nɔ̀ lì lihũi ɖo ŋuti nyè ò? Mù sè Izràɛlviwo be lihũi kè wo lì ɖo ŋuti nyè, wo mu le tɔtè ò a.

²⁸Gblɔ̃ na wo be: 'Mù tà àpe àgbè na mì be kaka kè mù lè àgbèa,' Tɔhonɔ̀ ye gblɔ̃ ɛ̀, 'ènyà kè mì gblɔ̃, mù sè a, be ènu mù la wɔ̀ ku mì.

²⁹Zògbè kèa ji ye mìabe àmèkpòtiwo la mlɔ̃! Mìa dòmètɔ kèwo keŋu ɖo to èpè èwì ŋuti, eye wo hlɛ̃a, mìa kpata, lekè mì gbe lè, eye mì le lì lihũi so ŋuti nyè kpòa!

³⁰Mù tà ènu na mì be mì mu la yì ànyigbã kè be àjɔ̀gbè mù fìã na mìa ji ò! Mìa dòmètɔ ɖèka be àfɔ̀ mu la yì, tovò na Kàlɛb, Yefunè be èvia ku Yosùa, Nun be èvia ò.

³¹Vɔ̀a, mìabe èvi kèwo ta mì le vɔ̃ ɖo be wo la le wo yì sàa ya, mù la kplɔ̀ wo yì; wo la jèsi ànyigbã kè mì gbea.

³²Mìawo ya, mìabe àmèkpòtiwo la ci zògbè kèa ji.

³³Mìabe èviwo la kplɔ̀ èlã lè zògbè kèa ji, èpè èkà sɔ̃ŋu. Wo la dro mìabe ànùkua màwɔ̀ be àgbã, kaka na gà kè mè mìawo ya, mì la ku vɔ̀ keŋu-keŋu, lè zògbè a jia.

³⁴Ekè e nyi ŋùkèkè èkà ye mì sɔ sã ŋùku lè ànyigbãa jia, mì la dro mìabe èvuɛ̃ be àgbã, èpè èkà, lè zògbè a ji, èpè ɖèka ɖo ŋùkèkè ɖèka nu, ne mìa sɔ nya be wo mu jènà àgla ɖo ŋuti nyè gbalo ò.

³⁵Ènyè, Tɔhonɔ̀ ye gblɔ̃ ɛ̀, be lekèa ye mù la wɔ̀ ku dùkɔ̃ jɔ̀vuɛ̃ kèa, kè sitè ɖo ŋuti nyèa! Woa kpata, wo la crɔ̃, lè zògbè kèa ji! Fikèa ye wo la ku lè!”

³⁶Eye, ŋusù kèwo Mosè dɔ̃ be wo ne yì sã ŋùku kpɔ Kanàn-nyigbã ji, eye kè wo trɔ gbɔ̀a, wo gblɔ̃ ènyà bàɖà so Kanàn-nyigbã ŋuti, sɔ do vɔ̃vɔ̃ na dùkɔ̃a, eye dùkɔ̃a sitè ɖo Mosè ŋutia,

³⁷ŋusù kèawo, àmè kèwo jɔ̀vuɛ̃, àleke be wo dovlo Kanàn-nyigbãa, Tɔhonɔ̀ do wo èdɔ̀ vuɛ̃ ɖe, eye wo ku.

³⁸Yosùa kè nyi Nun be èvia ku Kàlɛb kè nyi Yefunè be èvia kpò ye ci àgbè, lè ŋusù kèwo yì sã ŋùku lè Kanàn-nyigbãa jiawo dòmè.

³⁹Mosè gblɔ̃ Tɔhonɔ̀ be ènyàwo keŋu na Izràɛlviwo be dùkɔ̃ bliboa, eye dùkɔ̃a lòfũ ŋutɔ.

⁴⁰Kè èŋù kè, lè fɔ̃fɔ̃ mèa, dùkɔ̃a tùtà èto tamè. Wo le gblɔ̃ be: “Mi wɔ̀ ènuvuɛ̃ nyàwo, ekèa ŋutia, mi le yì àfi kè Tɔhonɔ̀ gblɔ̃a.”

⁴¹Mosè gblɔ̃ na wo be: “Nukɛ ŋuti mì gbà le dà èse kè Tɔhonɔ̀ do a ji ò? Ènu kè mì le wɔ̀a mu la jè e ji ò.

⁴²Mì mu gbà yì ètoa ji ò, ɖoa, Tɔhonɔ̀ mu lè mìa dòmè ò. Mì mu gbà wɔ̀ ne mìabe kɛ̃tɔwo ne ɖù mìa ji ò.

⁴³Àmàlɛktɔwo ku Kanàntɔwo lè ŋùkɔ̀ na mì lè funu, eye mì la ci woabe èwuiwo nu. Ekè mì trɔ lè Tɔhonɔ̀ yomè a, Tɔhonɔ̀ mu la nɔ̀ ku mì ò.”

⁴⁴Gãkea, Izràɛlviwo trì èto be yèwo la lia ètoa, yì e ji kpò ye, wàlɛbɛ kè Zòɖùɖu-Ɖakà a cã, Mosè cã mu ɖè àfɔ̀, to lè àsàɖaa mè ò a.

⁴⁵Àmàlɛktɔwo ku Kanàntɔ kèwo ye nɔ̀nà èto ŋuawo jiawo ɖì, va wù Izràɛlviwo, nyà wo ɖo èdù nu, wàlɛbɛ kè wo kã hlɛ̃a, kaka va ɖo Hɔrmà.