Read gen Àmè Hɛ̃hlɛ̃ 18 Bible Online

Àmè Hɛ̃hlɛ̃ 18 - gen bible

Àmè Hɛ̃hlɛ̃ 18

¹Tɔhonɔ̀ gblɔ̃ na Arɔ̀n be: “Èwò, ŋusùvi wòwo ku xòmè wò, so Levì be kɔ̀ta mè ye la nɔ̀ àgɔ̀ ɖekpe kè wo la jè do kɔ̀kɔ̀ɛpea ŋutia nu. Eye, èwò ku ŋusùvi wòwo ye la nɔ̀ àgɔ̀ kè wo la jè, lè miabe sɛ̃sɛ̃dɔ wɔ̀wɔa mèa nu.

²Wò la na nɔ̀vi wòwo, àmè kèwo so Levì be kɔ̀ta mè, kɔ̀ta kè mè ètɔ wò be hɛ̃nu soa mèa, wo la gogo wò, lè gòxɔa be sɛ̃sɛ̃dɔa mè. Wo la nɔ do wò àlɔ̀, vɔ̀a, èwò ku ŋusùvi wòwo ye la nɔ̀ Zòɖùɖu be gòxɔa nu.

³Wò la nɔ dɔ̃ wo, eye wo la nɔ wɔ̀ èdɔwo keŋu, lè Ègòdodo be gòxɔa kpata nu; gãkea, wo mu la nɔ gogo kɔ̀kɔ̀ɛpea be ènu ɖekpe, àlo vɔsakpea ò, àleke be wo mu gbà hɛ̃ èku va na àmè ɖekpe, sìgbè woawo ŋutɔwo, àlo mìawo nène ò.

⁴Wo la nyi àpo àlɔ̀dotɔ kèwo la nɔ wɔ̀ èdɔ lè Ègòdodo be gòxɔa nu; wo la nɔ wɔ̀ èdɔwo kpata, eye àmè bu ɖekpe mu la va kpe mì ò.

⁵Mìawo ye la nɔ wɔ̀ kɔ̀kɔ̀ɛpea ku vɔsakpea be sɛ̃sɛ̃dɔwo. Ekèa la na be Izràɛlviwo mu la va nɔ̀ àpe àdɔ̀mèze nu ò.

⁶Eye, kpɔɖa, nyè ŋutɔ mù sɔ lè mìa nɔ̀vi Izràɛlvi Levìwo dòmè, mù sɔ wo le na mì, wo nyi ènu nanawo na Tɔhonɔ̀, ne woa nɔ wɔ̀ sɛ̃sɛ̃dɔ lè Ègòdodo be gòxɔa mɔnu.

⁷Vɔ̀a, èwò ku ŋusùvi wòwo ya, mì la nɔ wɔ̀ hũbonɔ be èdɔa, sɔ kù ɖo ènu sia ènu kè kã vɔsakpea ku ènu kèwo lè èxɔ̀mèsòvɔa godoawo ŋuti. Mì la nɔ wɔ̀ èdɔ kè nyi mìa tɔ̀a. Mù sɔ hũbonɔ be èdɔa do àsi na mì. Èdɔ ŋua ye mù ɖo na mì. Àmè gbalo kè gogo èdɔ kèa la ku.”

⁸Tɔhonɔ̀ gblɔ̃ na Arɔ̀n be: “Kpɔɖa, nyè ŋutɔ, mù sɔ ènu nana kèwo kpata Izràɛlviwo ɖo la nɔ na mùa jikpɔkpɔ do àsi na wò. E la nyi èwò ku èvi wòwo be àjɔ̀, kaka sɔ yì.

⁹Lè ènu nana kɔ̀kɔ̀ɛ kè wo mu la fiɔ̃, sɔ savɔ ò a mèa, ekè la nyi tɔ̀ wòa ye nyi ekèa: ènu nanawo kèwo keŋu nyi èwɔ be ènu nanawo, vɔsa ɖo èvuɛ̃ ta be ènu nanawo keŋu ku àmè dòmè jràɖo be ènu nana kèwo keŋu nyi àjɔ̀, wo la na mùawo. Ènu nana kɔ̀kɔ̀ɛ kèawo keŋu la nyi èwò ku èvi wòwo tɔ̀.

¹⁰Mì la ɖù wo lè Nɔ̀pe Kɔ̀kɔ̀ɛ. Ŋusùwo keŋu teŋu ɖù wo. Wò la do ènu kɔ̀kɔ̀ɛ be bùbu woa ŋuti.

¹¹Ekèa cã gbà nyi tɔ̀ wò: àjɔ̀ kèwo keŋu wo la ɖè lè Izràɛlviwo be ènu nanawo keŋu ŋutia, ènu kèwo keŋu wo la hɛ̃ vaawo keŋu ŋutia, mù sɔ wo le na èwò ku ŋusùvi wòwo ku nyɔ̃nùvi wòwo. Èse kòkòɖàbì be nyi na mì. Àmè kèwo keŋu ŋuti gbe kɔ̀ lè àpo àxomè kpòa, la ɖù ì.

¹²Mù sɔ àmì yeye nyuɛ̃tɔa, vɛ̃ yeye nyuɛ̃tɔa ku èlù, kpe ɖo ènuku cucugbã kèwo keŋu wo hɛ̃ va na Tɔhonɔ̀a ŋuti, sɔ na wò.

¹³Ènuku cucugbã kèwo keŋu la so Izràɛlviwo be ànyigbãa be àgblè mè va na Tɔhonɔ̀a cã nyi tɔ̀ wò. Àmè kèwo keŋu la nɔ̀ ègbè ji, lè àpo àxomèawo keŋu teŋu ɖù wo.

¹⁴Ènu kèwo keŋu wo la sɔ ɖè àjɔ̀gbè lè Izràɛl-nyigbã jia cã nyi tɔ̀ wò.

¹⁵Tɔ̀ wò ke ye nyi ŋùkɔ̀gbevi kèwo keŋu wo sɔ va na Tɔhonɔ̀a, Mawu be ènuɖoɖowo keŋu ku èlãwo be ŋùkɔ̀gbeviwo. Vɔ̀a, wò la na, wo la xɔ̀ àgbètɔ be ŋùkɔ̀gbeviwo plè, ku èlã màkɔ̀-mà-kɔ̀wo be ŋùkɔ̀gbeviwo.

¹⁶Ekè wo la xɔ̀ plèa ɖo la ɖo wètri ɖèka, eye be la nɔ̀ àsì kè wò la do a ji. Àsìa ye nyi klòsalòga sekɛ̀l àtɔ̃, lè kɔ̀kɔ̀ɛpea be sekɛ̀l be àsì ji. Sekɛ̀l ɖèka, la nyi gerà èwì.

¹⁷Vɔ̀a, wò mu la na, wo la xɔ̀ ènyì, àlo àlɛ̃, àlo ègbɔ be ŋùkɔ̀gbevi ya plè ò, ɖoa, woa ŋuti kɔ̀. Wò la kɔ̀ woabe èhũ ɖo vɔsakpea ji, eye wò la fiɔ̃ woabe àmì, eye be la nyi ènu ɖùɖu kè la hũɛ gbligbli do Tɔhonɔ̀a.

¹⁸Èlãa, tɔ̀ wò be la nyi, sìgbè lekè àkɔtaa ku ɖùsimè be àta kèwo wo la sɔ ɖo Tɔhonɔ̀ be ŋùmè a nyi tɔ̀ wòa nène.

¹⁹Ekèa la nyi èse kòkòɖàbì na mì be, mù sɔ àjɔ̀ kèwo keŋu wo ɖènà lè Izràɛlviwo be ènu kɔ̀kɔ̀ɛwo ŋuti na Tɔhonɔ̀a na wò ku ŋusùvi wòwo ku nyɔ̃nùvi wòwo. Ekèa nyi Èzòɖùɖu kòkòɖàbì kè mù sɔ èjè wɔ̀a, lè Tɔhonɔ̀ be ŋùmè, na wò ku jìjimèvi wòwo.”

²⁰Tɔhonɔ̀ gblɔ̃ na Arɔ̀n be: “Wò mu la ɖo ècrɔ̃nu lè woabe èdùa mè ò, eye wò mu la ɖo mamã ɖe lè woa dòmè ò. Ènyè ye la nyi àpo mamã ku àpo ècrɔ̃nu lè Izràɛlviwo dòmè.”

²¹“Levì be jìjimèviwo tɔ̀ ye nyi ekèa: Mù sɔ ènu be mamã mè èwogɔ̃ kèwo keŋu wo la xɔ̀ lè Izràɛl-nyigbã jia na wo[22], ɖo èdɔ kèwo wo wɔ̀nà lè Ègòdodo be gòxɔa mèa nu.

²²Ekèa la na be Izràɛlvi kpɔ̀tɛawo mu la gogo Ègòdodo be gɔ̀xɔa, ne èvuɛ̃ ne va ci èkɔ̀ na wo, ne woa va ku ò.

²³Levì be jìjimèviwo ye la nɔ wɔ̀ èdɔ kèwo kã Ègòdodo be gòxɔa. Wo la nɔ nɔ̀ woabe àgɔ̀jèjewo nu. Ekèa la nyi èse kòkòɖàbì na mìabe jìjimèviwo. Wo mu la xɔ̀ ècrɔ̃nu ɖekpe, lè Izràɛlviwo dòmè ò.

²⁴Vɔ̀a, mù le sɔ ènu nana kèwo la nyi àjɔ̀ kè Izràɛlviwo la na Tɔhonɔ̀a be mamã èwogɔ̃a le wɔ̀ ècrɔ̃nu na wo. Ekèa ŋuti mù to na wo be wo mu la xɔ̀ ècrɔ̃nu ɖekpe lè Izràɛlviwo dòmè ò.”

²⁵Tɔhonɔ̀ gblɔ̃ na Mosè be:

²⁶“Wò la gblɔ̃ na Levìwo be: Ne mì xɔ̀ ènu nana be mamã èwogɔ̃ kè mù sɔ le wɔ̀ ècrɔ̃nu na mìa lè Izràɛlviwo sia, mì la ɖè ènu nana be mamã èwogɔ̃a be mamã èwogɔ̃a, sɔ na àjɔ̀ Tɔhonɔ̀.

²⁷Ekèa la nyi àjɔ̀ kè mìawo cã, mì la na, sìgbè lekè àmè kpɔ̀tɛawo cã nana èlù kè wo lɔ, lè èlùfupea ku àhà kè wo ɖè, lè àhàfiɔ̃pea nène.

²⁸Nène a ye mìawo cã, mì la ɖè àjɔ̀ na Tɔhonɔ̀, lè ènu nana be mamã èwogɔ̃ kèwo kpata mì la xɔ̀ lè Izràɛlviwo sia mè.

²⁹Lè ènu kèwo keŋu wo la na mìa ŋutia, mì la ɖè Tɔhonɔ̀ be àjɔ̀a, ɖekpe mà to lè e mè. Eye, mì la ɖè è lè yebe àkpa nyuɛ̃tɔa ŋuti, la sɔ wɔ̀ ènu nana kɔ̀kɔ̀ɛ.

³⁰Wò la gbà gblɔ̃ na wo be: Ne mì ɖè àkpa kè nyɔ wua lè ènu kèawo ŋutia, e la nɔ̀ ènu kè so èlùfupe ku àhàfiɔ̃pea tèpe na mì, Levì be jìjimèviwo.

³¹Mì la teŋu ɖù ènu kèawo lè àfi ɖekpekpe, ku mìabe xòmèa. Nyàwoa, mìabe èdɔ kèwo mì wɔ̀ lè Ègòdodo be gòxɔa mèa be èfɛ̃tu ye.

³²Ne mì le wɔ̀ ekèa keŋuã, mì mu la sɔ èvuɛ̃ ɖe sɔ kù èkɔ̀, wàlɛbɛ kè ènu nanaawo be àkpa nyuɛ̃tɔa ye mì le ɖèa ò. Nène a, mì mu la dovlo Izràɛlviwo be ènu nana kɔ̀kɔ̀ɛawo, ne mìa va ku ò.