Read gen Àmè Hɛ̃hlɛ̃ 19 Bible Online

Àmè Hɛ̃hlɛ̃ 19 - gen bible

Àmè Hɛ̃hlɛ̃ 19

¹Tɔhonɔ̀ gblɔ̃ na Mosè ku Arɔ̀n be:

²Èse kè Tɔhonɔ̀ do a be ɖoɖowo ye nyi ekèawo: Gblɔ̃ na Izràɛlviwo be wo ne kplɔ̀ ènyì-nɔ jɛ̃ ɖe kè ènu ɖekpe mu wɔ̀ àfi ɖe na ò a, kè ŋuti gbegble ɖekpe mu lè ò, eye be nyi èlã kè wo mu do èkɔ̀kùti na kpɔ ò a va na wò.

³Mì la sɔ ɛ̀ do àsi na hũbonɔ Eleazàr. Wo la ɖè ènyìa to lè àsàɖaa mè, eye wo la sò èhlò na ɛ̀, lè hũbonɔa be ŋùmè.

⁴Hũbonɔ Eleazàr la sɔ àlɔ̀vi tɔ èhũa mè, la sɔ wu ɖoɖa Ègòdodo be gòxɔa mɔnu, zè adrɛ̃.

⁵E yomè a, wo la tɔ èzò ènyì-nɔ bliboa lè Eleazàr be ŋùku mè; àgbàze, èlãa, èhũa ku àdɔ̀mènuawo.

⁶Hũbonɔa la sɔ sedàti, la sɔ kpatima,[23] ku àvɔ jɛ̃ hɛli kè le klɛ̃a, la sɔ wo dãŋùgbe ɖo èzò-ka kè mè ènyì-nɔa le fiɔ̃ lèa be dòdòmè.

⁷Ekèa yomè a, hũbonɔa la nyà yebe àwùwo, la kù èsì lè; ne e wɔ̀ ekèa vɔ̀a, gbɔ̀xue be la trɔ gbɔ̀ va àsàɖaa mè. Gãkea, hũbonɔa la nɔ̀ màkɔ̀ mà-kɔ kaka na fìɛ̃si mè.

⁸Àmè kè la tɔ èzò ènyì-nɔa, la nyà yebe àwùwo eye e la lè èsì. E la nɔ̀ mà-kɔ̀ mà-kɔ kaka na fìɛ̃si mè.

⁹Vɔ̀a, ŋusù kè be ŋuti kɔ̀a ye la lɔ ènyìa be àfia, eye be la sɔ ɖo àsàɖaa godo, lè Tèpe Kɔ̀kɔ̀ɛ ɖe. Àfia ye Izràɛlviwo la lebè na, ne woa sɔ nɔ wɔ̀ lèlèɖì be èsì. Vɔsa ɖo nuvuɛ̃ ta be nyi.

¹⁰Àmè kè lɔ ènyì-nɔa be àfia cã la nyà yebe àwùwo, eye be la nɔ̀ kɔ̀kɔ̀ɛ kaka na fìɛ̃si mè. Ekèa la nyi èse kòkòɖàbì na Izràɛlviwo ku àmèjro kè lè woa dòmèa.

¹¹Àmè kè tɔ àsi àmè kuku àlo, ènu kuku ɖekpekpea, la nɔ̀ màkɔ̀ màkɔ kaka na ŋùkèkè adrɛ̃.

¹²Ŋùkèkè ètɔ̃gɔ̃a gbèa, e la sɔ èsì kèa sɔ lè ye ɖokoe ɖì, eye ŋùkèkè adrɛ̃gɔ̃ a gbèa, yebe ŋuti la kɔ̀. Vɔ̀a ne mu lè ye ɖokoe ɖì, ŋùkèkè ètɔ̃gɔ̃a gbè ò a, ŋùkèkè adrɛ̃gɔ̃ a gbèa, yebe ŋuti mu la kɔ̀ ò.

¹³Àmè ɖekpekpe àmè kè la tɔ àsi àmèkuku, àmè kè la tɔ àsi àmè kè ku zè ɖèka, eye mu la lè ye ɖokoe ɖì ò a, pòɖi Tɔhonɔ̀ be nɔ̀pea: wo la crɔ̃ leke be àmèa lè Izràɛlviwo dòmè. Ekè nène be àmèa mu na wo hlɛ̃ lèlèɖì be èsìa ɖo e ŋuti ò a, ye ŋuti mu kɔ̀ ò, eye àmèa gbà lè màkɔ̀ màkɔ.

¹⁴Èsea ye nyi ekèa: ne àmè ɖe ku lè gòxɔ̀ ɖe mèa, àmè ɖekpekpe kè la ɖo gòxɔa mèa ku àmè kèwo lè e mèawo keŋu la nɔ̀ màkɔ̀ màkɔ ŋùkèkè adrɛ̃.

¹⁵Eye, ènu ɖekpekpe kè lè nùvò, eye wo mu cɔ̃nu ò a lè màkɔ̀ màkɔ.

¹⁶Àmè ɖekpekpe àmè kè va kè ɖo àmè kè wo sɔ èwui wùa ŋuti, lè àgblè mè, àlo, kè be àfɔ̀ va klɛ̃ àmèkuku, àlo, àmèkuku be èpu, àlo, yɔ̀doa, e la nɔ̀ màkɔ̀ màkɔ ŋùkèkè adrɛ̃.

¹⁷Na ŋusù màkɔ̀ mà-kɔ kèa, wo la tɔzɔ̀ èlã kè wo sɔ savɔ ɖo èvuɛ̃ taa, wo la lɔ èzòa be àfia, kɔ̀ ɖo èze ɖe mè; wo la kɔ̀ ètɔ̀ sàsra be èsì ɖo e ji.

¹⁸Ŋusù kè ŋuti kɔ̀a la sɔ kpatima be àlɔ̀zɛ̃ tɔ èsìa mè, sɔ wu ɖo gòxɔa ku ènu kèwo lè e mèawo ku àmè kèwo lè e mèawo ŋuti, àlo, la sɔ wu ɖo àmè kè tɔ àsi àmèkuku be èpu, àmè kè wo wù, àlo kpɔ yɔ̀doa ŋuti.

¹⁹Ŋusù kè ŋuti kɔ̀a, la wu èsìa ɖo ŋusù kè ŋuti mu kɔ̀ ò a ŋuti, ŋùkèkè ètɔ̃gɔ̃a ku adrɛ̃gɔ̃ a gbè. Ŋùkèkè adrɛ̃gɔ̃ a gbèa, e la lè yebe èvuɛ̃a ɖì lè e ŋuti keŋu-keŋu. Ŋusùa la nyà yebe àwùwo, la lè èsì, eye, fìɛ̃si mèa, yebe ŋuti la kɔ̀.

²⁰Vɔ̀a, ŋusù kè jè màkɔ̀ màkɔ mè, eye mu na wo lè è ɖì ò a, wo la crɔ̃ leke be ŋusùa jo lè àmèha a mè, ɖoa, ekè mu na wo wu lèlèɖì be èsìa ɖo e ŋuti ò a, yebe ŋuti mu kɔ̀ ò. E la va pòɖi Tɔhonɔ̀ be nɔ̀pea.

²¹Ekèa la nyi èse kòkòɖàbì na Izràɛlviwo. Àmè kè wu lèlèɖì be èsìa, la nyà yebe àwùwo. Eye àmè kè tɔ àsi lèlèɖì be èsìa, la nɔ̀ màkɔ̀ màkɔ kaka na fìɛ̃si mè.

²²Ènu ɖekpekpe kè la tɔ àmè màkɔ̀ màkɔ ŋutia la nɔ̀ màkɔ̀ màkɔ, eye àmè ɖekpekpe àmè kè la tɔ e ŋutia la nɔ̀ màkɔ̀ màkɔ, kaka na fìɛ̃si mè.