Read gen Àmè Hɛ̃hlɛ̃ 21 Bible Online

Àmè Hɛ̃hlɛ̃ 21 - gen bible

Àmè Hɛ̃hlɛ̃ 21

¹Kè Arad be èfìɔ, Kanànvi kè lè èdùa be àpùgoa, sè be Izràɛlviwo to Atarìm be èmɔa, gbãnà a, wo ɖè àhùa kpe na Izràɛlviwo, eye wo ɖo àsi Izràɛl be àhùale ɖewo ji.

²E yomè a, Izràɛlviwo fìã àjɔ̀gbè na Tɔhonɔ̀ be: “Ne wò lɔ̃, sɔ dùkɔ̃ kèa do àsi na mia, eŋuã, mi la crɔ̃ woabe èdùwo gbidi-gbidi.”

³Tɔhonɔ̀ ɖo èto Izràɛlviwo, eye be sɔ Kanànviwo do àsi na wo. Izràɛlviwo crɔ̃ Kanàntɔwo ku woabe èdùwo gbidi-gbidi. Wo ɖo nyikɔ na tèpe kèa be Hɔrmà.

⁴Ekè Izràɛlviwo jo lè Hɔr be ètoa jia, wo to plãŋùpòfɛ̃ be àpù to be èmɔa; wo trɔ do Edɔ̀m-nyigbãa, vɔ̀a, dùkɔ̃a gbɔjɔ gbà bu ŋùɖo keŋu-keŋu.

⁵Ekèa na be wo tɔ nupo pòpo ɖo Mawu ku Mosè ŋuti be: “Nukɛ ŋuti ye mì kplɔ̀ mi jo lè Ejiptè ɖo ò? Ne mia ku lè zògbè kèa ji ye à! Ɖoa, ènu ɖùɖu cã, èsì cã mu lè fikèa ò, eye, èhiã jèje be ènu ɖùɖu kèa cã le nyɔŋu na mi!”

⁶Ekèa na be Tɔhonɔ̀ ɖo àɖi sɛ̃ŋu be èdãwo ɖoɖa dùkɔ̃a dòmè. Èdãawo ɖù àmè sùgbɔ, eye àmè sùgbɔ ku lè Izràɛlviwo dòmè.

⁷E yomè a, dùkɔ̃a va kpɔ Mosè, eye be gblɔ̃ na Mosè be: “Mi wɔ̀ ènuvuɛ̃, ekè mi pò nupo ɖo èwò ku Tɔhonɔ̀ ŋutia. Tɔ̀ wò jɔ̀, ɖè kuku na Tɔhonɔ̀, ne bèa ɖè èdãawo jo lè mia dòmè!” Mosè ɖè kuku ɖo dùkɔ̃a ta.

⁸Tɔhonɔ̀ gblɔ̃ na Mosè be: “Na ne woa wɔ̀ àɖi sɛ̃ŋu be èdãa be nɔ̀nɔmè; wòa sɔ ɛ̀ ka ɖo àti ŋuti, àleke be ne èdã ɖù àmè ɖe, eye be kɔ èta yì èji kpɔ èdã kè lè àtia ŋuti kpòa, bèa ci àgbè.”

⁹Mosè sɔ gàjɛ̃ wɔ̀ èdã, sɔ ka ɖo àti ŋuti, eye, ne èdã ɖù àmè ɖe[24], eye be ɖè èkɔ̀ kpɔ gàjɛ̃ be èdãa kpòa, e cina àgbè.

¹⁰Kè Izràɛlviwo joa, wo yì do àsàɖa ɖo Ovɔ̀t.

¹¹Kè wo jo lè Ovot yomè a, wo yì do àsàɖa ɖo Iyì-Avarim, lè zògbè kè kpã ŋùkɔ̀ Mòab-nyigbã a ji, lè èwèzɛ̃pe lɔ̀ge.

¹²Kè wo jo lè funua, wo yì do àsàɖa ɖo Zerɛ̀d be ètɔ̀ wɔ̀adã to.

¹³Kè wo jo lè funua, wo yì do àsàɖa ɖo Arnɔ̀n be ètɔ̀ kè ɖì so Àmɔrìtɔwo be ànyigbã ji, va to zògbè a jia godo. Arnɔ̀n be ètɔ̀a ye nyi lipò, lè Mòab-nyigbã a ku Amɔrì-nyigbãa dòmè.

¹⁴Ekèa ŋuti wo ŋlɔ̀ ɖo Tɔhonɔ̀ be àhùawɔ̀wɔ xoma a mè be: “Wahɛ̀b lè Sufà be kɔpewo mè ku yebe ètɔ̀ wɔ̀adãwo; Arnɔ̀n

¹⁵ku yebe ètomè be èdɔ̃viwo srà ɖì àbù a, tùtà Arò be nutowo mè eye wo va to Mòab be lipòa ji.”

¹⁶Kè Izràɛlviwo jo lè funua, wo yì ɖo Beɛr, kè gɔ̃mè ye nyi vudoa. Beɛr fikèa ye Tɔhonɔ̀ gblɔ̃ na Mosè lè be: “Bɔ̀ dùkɔ̃a, ne ma na wo èsì.”

¹⁷Ekèa yomè a, Izràɛlviwo to èhà kèa ɖoɖa be: 'Vudo, ji èsì! Mì kpɔ jìjɔɛ so e ŋuti!

¹⁸Vudo kèa ye ŋùkɔ̀nɔ̀tɔwo ɖè! Dùkɔ̃a be hùɛ̃yiwo ye ɖè è! Wo ɖè è ku woabe àtikplɔwo, wo ɖè è ku woabe àcɛ̀ be èkpòwo!” Kè wo jo lè zògbè a jia, wo yì Màtanà.

¹⁹Kè wo jo lè Màtanàa, wo yì Nahalìɛl, lè Bamɔt-nyigbã ji

²⁰Kè wo jo lè Bamot nyigbã jia, wo yì bàlì kè hũ ɖo Mòab be àgblèjia mè. Pisgà be ètoa tamè pòta na zògbè a.

²¹Izràɛlviwo dɔ̃ àmè yì gblɔ̃ na Sihɔ̀n, Àmorìtɔwo be èfìɔa be:

²²“Tɔ̀ wò jɔ̀, ɖè èmɔ na mi, ne mia to àpo ànyigbã ji, va yì. Mi mu la zɔ̃ to àgblèwo mè, àlo, to vɛ̃-bɔwo mè ò. Mi mu la nù vudowo mè be èsì cã ò. Ɖe kpò mi la to èmɔ gãa ji, to ànyigbã wòa ji va yì.”

²³Vɔ̀a, Sihɔ̀n mu na èmɔ Izràɛlviwo, ne woa to yebe ànyigbã ji, va yì ò. E bɔ̀ yebe dùkɔ̃a be àhùakɔ̃a, eye be to, la yì kpe àkɔ ku Izràɛlviwo, lè zògbè a ji. E va ɖo Yahsà, funua ye be ɖè àhùa kpe na Izràɛlviwo lè.

²⁴Izràɛlviwo wù wo ku èwui, eye wo xɔ̀ woabe èdùa, so Arnɔ̀n, kaka va ɖo Yàbɔk, eye wo gbà xɔ̀ ɛ̀, kaka sɔ ɖo Amɔ̀nviwo be àgbògbò be lipòa ji.

²⁵Izràɛl xɔ̀ èdùawo keŋu, eye Izràɛlviwo xɔ̀ tèpe nɔ̀ lè Amɔrìviwo be èdùwo mè, lè Hɛsbɔ̀n, ku èdùvi kèwo tɛ ɖo e ŋutiawo mè.

²⁶Ɖoa, Hɛsbɔ̀n be èdùa, Amɔrìviwo be èfìɔ Sihɔ̀n be èdù be nyi sã. E wɔ̀ àhùa ku Mòab be èfìɔ xoxoa, eye be xɔ̀ yebe èdùa lè e si kaka va ɖo Arnɔ̀n.

²⁷Ekèa ŋuti ye èhàkpàtɔwo gblɔ̃ be: Mì va Hɛsbɔ̀n! E jè be woa gbìgbɔ̀ tù Sihɔ̀n be èdùa, ne woa gbìgbɔ̀ likè è!

²⁸Èzò to so Hɛsbɔ̀n, èzò ɖe to so Sihɔ̀n be èdùa mè, eye be vũvũ Arò, lè Mòab-nyigbã ji. E vũvũ vòdu kèwo ye ɖùfìɔ lè Arnɔ̀n be ètoa jia.

²⁹Hèlu na wò, Mòab! Wò crɔ̃ lòo, Kehɔ̀s be dùkɔ̃! E na yebe ŋusùviwo zrò ɖo ègbe, eye, yebe nyɔ̃nùviwo trɔ zũ àhùalewo na Sihɔ̀n, Amɔrìviwo be èfìɔa!

³⁰Miabe àŋùtiwo trɔ̃ wo; eye, so Hɛsbɔ̀n kaka yì Divɔ̀n dùa mèa, àmèwo crɔ̃ keŋu, mi kãkã ènuwo, kaka yì ɖo Nɔfà, eye èzòa bì èdùa kaka yì Màdabà.”

³¹Izràɛlviwo xɔ̀ tèpe nɔ̀ lè Amɔrìviwo be ànyigbã ji.

³²Mosè dɔ̃ àmè yì sã ŋùku kpɔ Yazɛ̀r be èdùa mè; Izràɛlviwo xɔ̀ èdùvi kèwo ye trɔ do Yazɛr-dùa, eye Mosè nyà Àmorìtɔ kèwo ye lè èdùawo mèa.

³³E yomè a, wo trɔ jè Basàn be èmɔ ji. Ɔg kè nyi Basàn be èfìɔa to va dogò wo ku yebe dùkɔ̃a be àhùakɔ̃ bliboa, eye wo ɖè àhùa kpe na Izràɛlviwo lè Edreì.

³⁴Tɔhonɔ̀ gblɔ̃ na Mosè be: “Mù gbà vɔ̃ ò! Mù sɔ Ɔg do àsi na wò, ye ŋutɔ cã, yebe dùkɔ̃ bliboa cã ku yebe èdùa keŋu; ènu kè wò wɔ̀ ku Sihɔ̀n, Àmorìtɔwo be èfìɔ kè ɖùfìɔ lè Hɛsbɔ̀n nyigbã jia ke ye wò la wɔ̀ ku Ɔg cã.”

³⁵Izràɛlviwo ɖù Ɔg ku èviawo kudo yebe dùkɔ̃ bliboa ji, àleke be àmè ɖekpe mu kpɔ̀tɔ̀ ci àgbè ò. Nène a ye Izràɛlviwo xɔ̀ èdùa yeŋu.