Read gen Àmè Hɛ̃hlɛ̃ 25 Bible Online

Àmè Hɛ̃hlɛ̃ 25 - gen bible

Àmè Hɛ̃hlɛ̃ 25

¹Izràɛlviwo va nɔ̀ Sitìm, eye, lè funua, dùkɔ̃a tɔ àhasì wɔ̀wɔ ku Mòab be nyɔ̃nùviwo.

²Nyɔ̃nùvi kèawo kpe dùkɔ̃a mètɔwo va woabe vòduwo be vɔsa kɔ̀nuwo wɔ̀pe. Dùkɔ̃a ɖùnu lè funu, eye be jè èɖɛ̀ na Mòabtɔwo be vòduwo.

³Izràɛlviwo sɔ woa ɖokoewo ɖo Peɔ̀r be vòdu Baal gɔ̃mè. Ekèa na be Tɔhonɔ̀ do àdɔ̀mèze ɖo dùkɔ̃a ŋuti.

⁴Tɔhonɔ̀ gblɔ̃ na Mosè be: “Le dùkɔ̃a be ŋùkɔ̀nɔ̀tɔwo keŋu, ne wòa do èkà ève na wo, kpã ŋùkɔ̀ dɔ̃ŋùkusu, lè Tɔhonɔ̀ be ŋùkɔ̀, àleke be Tɔhonɔ̀ be àdɔ̀mèze hɛlia ne jo lè Izràɛlviwo ji.”

⁵Mosè gblɔ̃ na Izràɛlviwo be kòjoɖotɔwo be: “Mìa dòmètɔ ɖe sia ɖe ne wù yebe àmè kèwo sɔ woa ɖokoewo ɖo Peɔ̀r be vòdu Baal gɔ̃mèa!”

⁶Eye, kpɔɖa, Izràɛlviwo dòmètɔ ɖèka kplɔ̀ Midìan nyɔ̃nù ɖe va ɖo nɔ̀viawo dòmè, lè Mosè ku Izràɛlviwo be àmèha bliboa be ŋùmè, wàlɛbɛ kè tutu Izràɛlviwo le fã àvi lè Ègòdodo be gòxɔa mɔnua.

⁷Ekè hũbonɔ Pinhàs kè Eleazàr, Arɔ̀n be èvia jìa kpɔ ènu kèa, e sitè lè àmèha a dòmè, sɔ èhuã ɖo àsi,

⁸e kplɔ̀ Izràɛlvia do, ɖo gòxɔa mè, eye be sɔ èhuã trɔ̃ Izràɛlvia ku nyɔ̃nùa ɖodu, lè nyɔ̃nù kèa be gòxɔa mè. Ekèa yomè a, èdɔ̀ vuɛ̃ kè ɖo Izràɛlviwo dòmèa tɔtè.

⁹Àmè kèwo èdɔ̀ vuɛ̃ kèa wùawo kpata lè àgbètɔ hotu woèvè (24000).

¹⁰Tɔhonɔ̀ gblɔ̃ na Mosè be:

¹¹“Hũbonɔ Pinhàs kè Arɔ̀n be èvi Eleazàr jìa na be àpe àdɔ̀mèze ɖo Izràɛlviwo ŋutia nu fa, wàlɛbɛ kè be hùãŋu ɖo ŋuti nyè, lè woa dòmèa. Ekèa ŋuti ye àpe ŋuhuã mu na mù sɔ àdɔ̀mèze crɔ̃ Izràɛlviwo ò.

¹²Ye ŋutia, mù gblɔ̃ be: Kpɔɖa, mù sɔ ŋuti fàfa be zòɖùɖu na ɛ̀.

¹³Zòɖùɖu kèa nyi ye ku yebe jìjimèviwo tɔ̀. Zòɖùɖu kèa sɔ hũbonɔ be èdɔ kòkòɖàbì le do àsi na wo, ɖoa, e hùãŋu ɖo yebe Mawu ta, eye be wɔ̀ àvũlele be èkɔ̀nu ɖo Izràɛlviwo ta.”

¹⁴Izràɛlvi kè wo wùa, àmè kè wo wù ku Midìan nyɔ̃nùa be nyikɔ ye nyi Zimrì, Salù be èvi. E nyi Simeɔ̀n be kɔ̀taa be ŋùkɔ̀nɔ̀tɔwo dòmètɔ ɖèka.

¹⁵Eye nyɔ̃nù kè wo wùa, Midìan nyɔ̃nùa be nyikɔ ye nyi Kasbì, kè nyi Sur be èvia. Sur nyi hɛ̃nu ɖewo be ŋùkɔ̀nɔ̀tɔ lè Midìan be kɔ̀ta ɖe mè.

¹⁶Eye Tɔhonɔ̀ gblɔ̃ na Mosè be:

¹⁷“Mì ɖè àhùa kpe na Midìantɔwo ne mìa ɖù woa ji,

¹⁸ɖoa, wo ji ènyà lè mìa ŋuti ku àyè mɔnu kè wo to, lè Peɔ̀r be ènyàa ku Kasbì kè nyi Midìan be àmègã ɖèka be nyɔ̃nùvi, woa nɔ̀vi nyɔ̃nù kè wo wù, gbè kè gbè Peɔ̀r be ènyàa hɛ̃ èdɔ̀ vuɛ̃ vaa mè.”

¹⁹Èdɔ̀ vuɛ̃ kèa yomè a,