Read gen Àmè Hɛ̃hlɛ̃ 26 Bible Online

Àmè Hɛ̃hlɛ̃ 26 - gen bible

Àmè Hɛ̃hlɛ̃ 26

¹Tɔhonɔ̀ gblɔ̃ na Mosè ku hũbonɔ Eleazàr, Arɔ̀n be èvia be:

²“Mì hlɛ̃ Izràɛlviwo be àmèha bliboa be xòmètɔ kèwo ɖo èpè èwì ku e jivɔwo, ekèwo lè Izràɛlviwo be àhùakɔ̃a mèa.”

³Mosè ku hũbonɔ Eleazàr pò nupo na wo lè Mòab be ànyigbã gbàjàa ji, lè Yɔrdàn be ètɔ̀a to, lè Yerikò gbɔ. Wo gblɔ̃ be:

⁴“Wo la hlɛ̃ ŋusù kèwo ɖo èpè èwì ku e jivɔwo, ɖo ègbè kè Tɔhonɔ̀ do àsi na Mosè a ji.” Kɔ̀ta kèwo hũ so Ejiptè vaawo ye nyi ekèawo:

⁵Rubɛ̀n ye nyi Izràɛl be èvi àmègãxoa. Rubɛ̀n be jìjimèviwo ye nyi: Hanɔ̀k kè jì Hanɔ̀kviwo be hɛ̃nua, Palù kè jì Palùviwo be hɛ̃nua;

⁶Hɛsrɔ̀n kè jì Hɛsrɔ̀nviwo be hɛ̃nua; Karmì kè jì Karmìviwo be hɛ̃nua;

⁷Àmè kèawo ye nyi Rubɛ̀n be jìjimèviwo be hɛ̃nuwo. Woa kpata, wo lè ŋusù hotu èwì vɔ ɖèka àlɔ̀ woeadrɛ̃ takpo ci èwo (43730).

⁸Palù be èvi ye nyi Eliav

⁹Eliav be èviwo ye nyi: Nemùɛl, Datàn ku Abiràm. Datàn ku Abiràm kèawo ye nyi àmèha a be àmèdɔ̃dɔ̃ kèwo ye jè àgla ɖo Mosè ku Arɔ̀n ŋutia. Wo nɔ̀ Korà be èhasòsoa ŋuti wàlɛbɛ kè e jè àgla ɖo Tɔhonɔ̀ ŋutia.

¹⁰Ànyigbã a kè ènu, eye be mì wo ku Korà kpata, wàlɛbɛ kè Korà be èhasòsoa crɔ̃, eye èzò vũvũ àgbètɔ àlɔ̀ èvè èkà ci èwoa (250). Àmè kèawo nyi kpɔwɔɛ.

¹¹Wàlɛbɛ ŋua, Korà be èviwo ya mu ku ò.

¹²Simeɔ̀n be jìjimèviwo, ɖo woabe hɛ̃nuwo nu: Nemùɛl jì Nemùɛlviwo be hɛ̃nu; Yamìn jì Yamìnviwo be hɛ̃nu, Yakìn jì Yakìnviwo be hɛ̃nu;

¹³Zerà jì Zeràviwo be hɛ̃nu; Saolò jì Saolòviwo be hɛ̃nu.

¹⁴Àmè ŋuawo ye nyi Simeɔ̀n be jìjimèviwo be hɛ̃nuwo. Woa kpata wo lè ŋusù hotu woeɖèka àlɔ̀ èvè (22200).

¹⁵Gad be jìjimèviwo, ɖo woabe hɛ̃nuwo nu; Sefɔ̀n jì Sefɔ̀nviwo be hɛ̃nu; Hagì jì Hagìviwo be hɛ̃nu; Sunì jì Sunìviwo be Hɛ̃nu.

¹⁶Oznì jì Oznìviwo be Hɛ̃nu; Erì jì Erìviwo be hɛ̃nu;

¹⁷Arɔ̀d jì Arɔ̀dviwo be hɛ̃nu, Arelì jì Arelìviwo be hɛ̃nu,

¹⁸Àmè kèawo ye nyi Gad be jìjimèviwo be hɛ̃nuwo. Woa kpata wo lè ŋusù hotu èwì àlɔ̀ àtɔ̃ (40500).

¹⁹Yudà be èviwo ye nyi Ɛr ku Onàn. Ɛr ku Onàn wo ku lè Kanàn-nyigbã ji.

²⁰Yudà be jìjimèviwo ye nyi ekèawo, ɖo woabe hɛ̃nuwo nu. Yebe jìjimèvi Selà jì Selàviwo be hɛ̃nu; Perɛ̀s jì Perɛ̀sviwo be hɛ̃nu; Zerà jì Zeràviwo be hɛ̃nu.

²¹Perɛ̀s be jìjimèviwo ye nyi ekèawo: Hɛsrɔ̀n jì Hɛsrɔ̀nviwo be hɛ̃nu; Hamul jì Hamulviwo be hɛ̃nu.

²²Àmè ŋuawo ye nyi Yudà be jìjimèviwo be hɛ̃nuwo; woa kpata, wo lè ŋusù hotu ègbã vɔ ènyi àlɔ̀ àtɔ̃ (76500).

²³Isakàr be jìjimèviwo ɖo woabe hɛ̃nuwo nu ye nyi ekèa: Tolà jì Tolàviwo be hɛ̃nu; Pu a jì Puaviwo be hɛ̃nu;

²⁴Yàsuv jì Yàsuv be jìjimèviwo be hɛ̃nu; Simrɔ̀n jì Simrɔ̀nviwo be hɛ̃nu.

²⁵Àmè ŋuawo ye nyi Isakàr be jìjimèviwo be hɛ̃nuwo. Woa kpata, wo lè ŋusù hotu ègbã vɔ èvè àlɔ̀ ètɔ̃ (64300).

²⁶Zabulɔ̀n be jìjimèviwo ɖo woabe hɛ̃nuwo nu ye nyi ekèa: Serɛ̀d jì Serɛ̀dviwo be hɛ̃nu; Elɔ̀n jì Elɔ̀nviwo be hɛ̃nu; Yahlɛ̀l jì Yahlɛ̀lviwo be hɛ̃nu.

²⁷Àmè ŋuawo ye nyi Zabulɔ̀nviwo be hɛ̃nuwo; woa kpata, wo lè ŋusù hotu ègbã àlɔ̀ àtɔ̃ (60500).

²⁸Yosɛ̀f be èviwo ɖo woabe hɛ̃nuwo nu ye nyi ekèa: Manasè ku Efràyim.

²⁹Manasè be jìjimèviwo: Makìr jì Makìrviwo be hɛ̃nu; Makìr jì Gilead; Gilead jì Gìleadviwo be hɛ̃nu.

³⁰Gilead be jìjimèviwo ye nyi ekèawo; Iezɛ̀r jì Iezɛ̀rviwo be hɛ̃nu; Helɛ̀k jì Helɛ̀kviwo be hɛ̃nu;

³¹Asrìɛl jì Asriɛ̀lviwo be hɛ̃nu; Sɛkɛ̀m jì Sɛkɛ̀mviwo be hɛ̃nu;

³²Semidà jì Semidàviwo be hɛ̃nu; Hefɛ̀r jì Hefɛ̀rviwo be hɛ̃nu;

³³Selofehàd kè nyi Hefɛ̀r be èvia mu jì ŋusùvi ò; nyɔ̃nùviwo kpò be jì. Selofehàd be nyɔ̃nùviwo be nyikɔwo ye nyi: Mahlà, Nɔa, Hoglà, Milkà ku Tirsà.

³⁴Àmè ŋuawo ye nyi Manasè be hɛ̃nuwo; woa kpata, wo lè ŋusù hotu èwì vɔ àdɛ̃ àlɔ̀ adrɛ̃ (52700).

³⁵Efràyim be jìjimèviwo, ɖo woabe hɛ̃nuwo nu ye nyi ekèa: Sutɛlà jì Sutɛlàviwo be hɛ̃nu; Bekɛ̀r jì Bekɛ̀rviwo be hɛ̃nu; Tahàn jì Tahànviwo be hɛ̃nu;

³⁶Sutɛlà be jìjimèviwo ye nyi ekèa: Eràn jì Erànviwo be hɛ̃nu.

³⁷Àmè ŋuawo ye nyi Efràyim be hɛ̃nuwo. Woa kpata, wo lè ŋusù hotu woeàdɛ̃ àlɔ̀ àtɔ̃ (32500). Woawo ye nyi Yosɛ̀f be jìjimèviwo, ekè wo hlɛ̃ wo ɖo woabe hɛ̃nuwo nua.

³⁸Bɛnyamìn be jìjimèviwo ɖo woabe hɛ̃nuwo nu ye nyi ekèa: Belà jì Belàviwo be hɛ̃nu; Asbɛ̀l jì Asbɛ̀lviwo be hɛ̃nu; Ahiràm jì Ahiràmviwo be hɛ̃nu;

³⁹Sefufàm jì Sefufàmviwo be hɛ̃nu; Hufàm jì Hufàmviwo be hɛ̃nu.

⁴⁰Belà be èviwo ye nyi: Ardè ku Namàn. Ardè jì Ardèviwo be hɛ̃nu eye Namàn jì Namànviwo be hɛ̃nu.

⁴¹Àmè kèawo ye nyi Bɛnyamìn be jìjimèviwo, ekè wo hlɛ̃ wo ɖo woabe hɛ̃nuwo nua; woa kpata, wo lè ŋusù hotu èwì vɔ èvè àlɔ̀ woeàdɛ̃ (45600).

⁴²Dàn be jìjimèviwo ɖo woabe hɛ̃nuwo nu ye nyi ekèa: Suhàm jì Suhàmviwo. Ekèawo ye nyi Dàn be hɛ̃nuwo, ekè wo hlɛ̃ wo ɖo woabe hɛ̃nuwo nua.

⁴³Suhàmviwo be hɛ̃nuwo mètɔwo kpata lè ŋusù hotu ègbã vɔ èvè àlɔ̀ ènè (64400).

⁴⁴Àsɛr be jìjimèviwo ɖo woabe hɛ̃nuwo nu ye nyi ekèa: Yimnà jì Yimnàviwo be hɛ̃nu; Yisvì jì Yisvìviwo be hɛ̃nu; Berìa jì Berìaviwo be hɛ̃nu.

⁴⁵So Berìa be hɛ̃nu mèa, hɛ̃nu èvè buwo gbà to; woawo ye nyi: Hebɛ̀rviwo be hɛ̃nu ku Malkìɛlviwo be hɛ̃nu.

⁴⁶Wo yɔna Àsɛr be nyɔ̃nùvi be Sarà.

⁴⁷Àmè ŋuawo ye nyi Àsɛr be jìjimèviwo be hɛ̃nuwo. Woa kpata, wo lè àgbètɔ hotu èwì vɔ àdɛ̃ àlɔ̀ woènè (53400).

⁴⁸Neftalì be jìjimèviwo, ɖo woabe hɛ̃nuwo nu ye nyi ekèa: Yahsɛ̀l jì Yahsɛ̀lviwo be hɛ̃nu; Gumì jì Gumìviwo be hɛ̃nu;

⁴⁹Yesɛ̀r jì Yesɛ̀rviwo be hɛ̃nu; Silɛ̀m jì Silɛ̀mviwo be hɛ̃nu.

⁵⁰Àmè kèawo ye lè hɛ̃nu kèwo so Neftalì be jìjimè, ekè wo hlɛ̃ wo ɖo hɛ̃nuwo nua; woa kpata, wo lè àmè hotu èwì vɔ èvè àlɔ̀ woènè (45400).

⁵¹Ekèa na be Izràɛlviwo kpata be hɛ̃hlɛ̃ mè lè ŋusù hotu àlɔ̀ ètɔ̃ ci àkpe ɖèka àlɔ̀ adrɛ̃ takpo ci èwo (601730).

⁵²Tɔhonɔ̀ gblɔ̃ na Mosè be:

⁵³“Hɛ̃nu ŋuawo nu ye wo la ma ànyigbãa ɖo: ènu kè hɛ̃nu ɖe sia ɖe la xɔ̀a, la nɔ sɔ̀ do àmè nenè kè lè hɛ̃nua mèa nu.

⁵⁴Wò la mã ènu sùgbɔ ɖo hɛ̃nu kè mè àmè sùgbɔ lèa nu, eye wò la ma ènu kè hùea ɖo hɛ̃nu kè mè àmè hùe lèa nu. Hɛ̃nu ɖe sia ɖe la xɔ̀ ènu kè sɔ̀ ku àmè nenè kè lè e mèa.

⁵⁵Àkɔ̀ kpò ye wo la dà, la sɔ ma ànyigbãa. Ènu kè hɛ̃nuawo la xɔ̀a, la nɔ̀ àmè nenè kè lè woa tɔwo be hɛ̃nu ɖe sia ɖe mèa nu.

⁵⁶Àkɔ̀ dàda ye la na àkpa kè hɛ̃nu ɖe sia ɖe la xɔ̀, ne wo mã ènu ɖo hɛ̃nu kèwo mètɔwo sùgbɔ ku kèwo mètɔwo mu sùgbɔ ò a nua[27].”

⁵⁷Levìwo be hɛ̃hlɛ̃ mè ye nyi ekèa, wàlɛbɛ kè wo hlɛ̃ àmèwo ɖo hɛ̃nuwo nua: Gɛrsɔ̀n jì Gɛrsɔ̀nviwo; Kehàt jì Kehàtviwo; Merarì jì Merarìviwo.

⁵⁸Levì be hɛ̃nuwo ye nyi ekèawo: Livnìviwo be hɛ̃nu, Hebrɔ̀nviwo be hɛ̃nu, Mahlìviwo be hɛ̃nu, Musìviwo be hɛ̃nu, Koràviwo be hɛ̃nu. Kehàt ya jì Amràm.

⁵⁹Amràm be èsrɔ̃ be nyikɔ ye nyi Yokɛvɛ̀d kè nyi Levì be èvi kè èsrɔ̃a jì na ɛ̀, lè Ejiptè a. Nyɔ̃nùa gbà jì Arɔ̀n, Mosè ku Mirìam kè nyi woa dàdaa na Amràm.

⁶⁰Arɔ̀n ya jì Nadàv, Abihù, Eleazàr ku Itamàr.

⁶¹Nadàv ku Abihù wo ku, wàlɛbɛ kè wo sɔ èzò kè ŋuti mu kɔ̀ ò a va Tɔhonɔ̀ be ŋùmè a.

⁶²Ne wo hlɛ̃ Levì kèwo keŋu nyi ŋusù, so èpè ɖèka jia, woa kpata wo lè àgbètɔ hotu woeɖèka èkà èwì vɔ àtɔ̃ (23000). Wo mu hlɛ̃ àmè kèawo ku Izràɛlvi kpɔ̀tɛawo ò, ɖoa, wo mu ɖo ènu ɖekpe la xɔ̀ lè ànyigbã kè wo le mã na Izràɛlviwoa mè ò.

⁶³Àmè ŋuawo ye nyi àmè kèwo Mosè ku hũbonɔ Eleazàr hlɛ̃, wàlɛbɛ kè wo hlɛ̃ Izràɛlviwo lè Mòab be ànyigbã gbàjàa ji, lè Yɔrdàn be ètɔ̃a to, jè ŋùkɔ̀ Yerikò be èdùa.

⁶⁴Àmè kèawo dòmètɔ ɖekpe mu gbà kpɔ̀tɔ̀, lè àmè kèwo Mosè ku hũbonɔ Eleazàr hlɛ̃ lè Izràɛlviwo dòmè, lè Sinaì be zògbè a ji ò.

⁶⁵Ɖoa, Tɔhonɔ̀ gblɔ̃ na wo be wo la ku lè zògbè a ji; ekèa na be woa dòmètɔ ɖekpe mu gbà kpɔ̀tɔ̀ ci àgbè, tovò na Kàlɛb, Yefunè be èvia ku Yosùa, Nun be èvia ò.