Read gen Àmè Hɛ̃hlɛ̃ 27 Bible Online

Àmè Hɛ̃hlɛ̃ 27 - gen bible

Àmè Hɛ̃hlɛ̃ 27

¹Ekèa yomè a, Selofehàd kè nyi Hefɛ̀r be èvi, eye Hefɛ̀r nyi Gilead be èvi, Gilead ŋutɔ nyi Makìr, Manasè tɔ̀ jìjìa be nyɔ̃nùviwo va, Yosɛ̀f be èvi so Manasè be hɛ̃nu ɖe mè. Nyɔ̃nùawo be nyikɔwo ye nyi Mahlà, Nɔà, Milkà ku Tirsà.

²Wo va Mosè be ŋùkɔ̀, lè hũbonɔ Eleazàr be ŋùkɔ̀, ku àmèha bliboa be ŋùkɔ̀nɔ̀tɔwo be ŋùkɔ̀, lè Ègòdodo be gòxɔa mɔnu.

³Wo gblɔ̃ na Mosè be: “Mia tɔ ku lè zògbè a ji; mu nɔ̀ Korà be èhasòsoa mè ò. Mu nɔ̀ àmè kèwo jè àgla ɖo Tɔhonɔ̀ ŋutiawo dòmè, lè Korà be èhasòsoa mè ò. Ye ŋutɔ be èvuɛ̃wo ŋuti ye be ku ɖo. Vɔ̀a, mu jì ŋusùvi ò.

⁴Kè mia tɔ mu jì ŋusùvi ò a ŋuti yebe nyikɔ la jo gũ, lè yebe hɛ̃nua mèa? Ekèa ŋutia, na miawo cã, ànyigbã, sìgbè lekè wò na mia tɔ be nɔ̀viwoa nène.”

⁵Mosè sɔ woabe ènyàa va Tɔhonɔ̀ be ŋùkɔ̀.

⁶Eye Tɔhonɔ̀ gblɔ̃ na Mosè be:

⁷“Selofehàd be nyɔ̃nùviawo be ènyà jɔ̀; wò la na wo ànyigbã kè la nyi woabe ècrɔ̃nu, sìgbè lekè wò na woa tɔ be nɔ̀viwoa nène. Nène a, wò la sɔ woa tɔ be ècrɔ̃nua do àsi na wo.

⁸E yomè a, wò la gblɔ̃ na Izràɛlviwo be: 'Ne ŋusù ɖe ku, ŋusùvi mà jia, mì la sɔ yebe ècrɔ̃nua do àsi na yebe nyɔ̃nùvi.

⁹Ne mu jì nyɔ̃nùvi cã ò a, mì la sɔ yebe ècrɔ̃nua do àsi na nɔ̀via ŋusùwo.

¹⁰Ne nɔ̀vi ŋusùwo cã mu lè e si ò a, mì la sɔ ècrɔ̃nua do àsi na ètɔa be nɔ̀vi ŋusùwo.

¹¹Ne ètɔa mu ɖo nɔ̀vi ŋusùwo ò a, mì la sɔ ècrɔ̃nua do àsi na yebe xòmètɔ kè gogo è lè yebe hɛ̃nu mèa: àmè ŋua ye la ɖù ècrɔ̃a.' Ekèa la nyi jɔ̀jɔɛwɔ̀wɔ be ɖoɖo kè le zɔ̃ ɖo ɖoɖo kèwo Tɔhonɔ̀ do àsi na Mosè a ji.”

¹²Tɔhonɔ̀ gblɔ̃ na Mosè be: “Lia Àbàrim be ètoawo dòmètɔ kèa ji, ne wòa kpɔ ànyigbã kè mù la sɔ na Izràɛlviwoa ɖa.

¹³Ne wò kpɔ ɛ̀ vɔ̀a, wò cã wò la trɔ yì tɔgbe wòwo gbɔ, sìgbè lekè fòfo wò Arɔ̀n cã trɔ yìa nène.

¹⁴Ɖoa, wàlɛbɛ kè mì lè Sin be zògbè a jia, kè Izràɛlviwo be àmèha a jè àgla ɖo ŋuti nyèa, mì trì èto, gà kè mè mù ɖè ègbè na mì be mìa ɖè àpe gogo fiɔ àmèha a, wàlɛbɛ kè mì la na èsì la to na woa.” Ekèa ye jɔ̀ lè Meribà be èsìa gbɔ, lè Kadɛ̀s, Sin be zògbè a ji.

¹⁵Eye Mosè gblɔ̃ na Tɔhonɔ̀ be:

¹⁶“Tɔhonɔ̀, Mawu kè tɔ̀ ye nyi ènu àgbè-àgbèwo keŋu be gbɔ̃gbɔ̃a, ne cã àmè kè la nɔ̀ àmèha a be ŋùkɔ̀a,

¹⁷àmè kè la nɔ̀ ŋùkɔ̀ na wo, la nɔ yì, la nɔ gbɔ̀, la nɔ kplɔ̀ wo to, la nɔ kplɔ̀ wo gbɔ̀, àleke be Tɔhonɔ̀ be àmèha a mu la nɔ̀ sìgbè àlɛ̃ha kè nu kplɔ̀tɔ mu lè ò a nène ò.”

¹⁸Tɔhonɔ̀ ɖo e ŋuti na Mosè be: “Yɔ Yosùa, Nun be èvia, ŋusù kè ji gbɔ̃gbɔ̃ nyè lèa ye àmè kèa nyi. Sɔ àlɔ̀ wòwo ɖo e ji.

¹⁹Wò la sɔ fiɔ hũbonɔ Eleazàr ku àmèha bliboa, eye wò la sɔ èdɔa do àsi na ɛ̀, lè woabe ŋùku mè.

²⁰Wò la sɔ lè àcɛ̀ wòa ŋuti na ɛ̀, àleke be Izràɛlviwo be àmèha a kpata ne nɔ ɖo èto è.

²¹E le na ɛ̀ be ne va hũbonɔ Eleazàr be ŋùkɔ̀, ne hũbonɔa ne nɔ sɔ Urìm biɔ Tɔhonɔ̀ be ɖoɖo na ɛ̀. Ɖoɖo kèa nu ye Yosùa ku Izràɛlviwo keŋu la nɔ to, nɔ yì, la nɔ gbɔ̀ ɖo: àmèha a kpata.”

²²Mosè wɔ̀ ènu kè Tɔhonɔ̀ ɖo na ɛ̀a; e kplɔ̀ Yosùa va ɖo hũbonɔ Eleazàr ku àmèha bliboa be ŋùkɔ̀.

²³E sɔ àlɔ̀ ɖo e ji, sɔ èdɔa do àsi na ɛ̀, sìgbè lekè Tɔhonɔ̀ gblɔ̃ ɛ̀, to Mosè jia nène.