Read gen Àmè Hɛ̃hlɛ̃ 28 Bible Online

Àmè Hɛ̃hlɛ̃ 28 - gen bible

Àmè Hɛ̃hlɛ̃ 28

¹Tɔhonɔ̀ gblɔ̃ na Mosè be:

²“Ɖè ègbè na Izràɛlviwo be: Mì hɛ̃ ènu nana kèwo nyi tɔ̀ nyèawo va na mù, ɖo woabe hùewo nu: ènu ɖùɖu nyèa la nyi ènumème vɔsa kè be hɔ̃hɔ̃ɛ gbligbli la fa èjì na mùa.

³Wò la gblɔ̃ na wo be: Ènuɖùɖu kè mì la sɔ va Tɔhonɔ̀ be ŋùkɔ̀a ye nyi ekèawo: àlɛ̃vi èvè kèwo ɖo èpè ɖèka, eye àfi ɖekpe mu gble na ò a. Wo la nyi gbè sia gbè be ènumème vɔsa.

⁴Wo la sɔ ɖèka savɔ ŋùdekɛ̃nyɛ mè, eye, wo la sɔ èvègɔ̃a savɔ fìɛ̃si mè,

⁵wo la sɔ èwɔ meme efà be jijenu be mamã èwogɔ̃a ɖèka blù ku àmì zògbè.

⁶Ekèa nyi ènumème vɔsa gbè sia gbè tɔ̀ kè wo wɔ̀nà lè Sinaì be ètoa ji, eye be nyi ènu ɖùɖu kè be hɔ̃hɔ̃ɛa, fana àkɔ na Tɔhonɔ̀.

⁷Vɛ̃ sɛ̃sɛ̃ kè wo la sɔ wɔ̀ èsìkɔ̀ɖɛ be èkɔ̀nu kè wo la sɔ kpe ɖo ŋùdekɛ̃nyɛ mè be àlɛ̃via ŋutia la sù hɛ̃ be jijenu ɖèka be mamã ènègɔ̃a, eye wo la sɔ savɔ na Tɔhonɔ̀ lè kɔ̀kɔ̀ɛpea.

⁸Wo la sɔ àlɛ̃vi èvègɔ̃a savɔ fìɛ̃si mè. Ènu nana ku èsìkɔ̀ɖɛ kèwo wo wɔ̀ ŋùdekɛ̃nyɛ mèa ke ye wo la gbà sɔ kpe ɖo fìɛ̃si mè tɔ̀a cã ŋuti. Ekèa la nyi ènu ɖùɖu kè be hɔ̃hɔ̃ɛ gbigblia la fa àkɔ na Tɔhonɔ̀

⁹Lè jɛ̃gbɔ̃zã gbèa, wo la sɔ èpè ɖèka be àlɛ̃vi èvè kè be àfi ɖekpe mu gble ò a, savɔ ku èwɔ meme jijenu be mamã èwogɔ̃a èvè kè wo la blù ku àmìa kpe ɖo èsìkɔ̀ɖe kè hiãa ŋuti.

¹⁰Ènumème vɔsa kèa ye wo la nɔ wɔ̀ jɛ̃gbɔ̃zã sia jɛ̃gbɔ̃zã gbè, sɔ kpe ɖo ènumème be vɔsa gbè sia gbè tɔ̀a ku yebe èsìkɔ̀ɖɛa ŋuti.

¹¹Lè wètri ɖe sia ɖe be gɔ̃mèjèje a, mì la sɔ ènyì-su èvè, àgbò ɖèka ku èpè ɖèka be àlɛ̃vi adrɛ̃ wɔ̀ ènumème vɔsa, wo la nyi èlã kèwo be àfi ɖekpe mu gble ò a.

¹²Wo la sɔ èwɔ meme jijenu be mamã èwogɔ̃a be tèpe ètɔ̃ sɔ blù ku àmì, sɔ wɔ̀ vɔsa, kpe ɖo ènyì-su ɖe sia ɖe ŋuti. Wo la sɔ èwɔ meme jijenu be mamã èwogɔ̃a be tèpe èvè sɔ blù ku àmì, sɔ wɔ̀ vɔsa, kpe ɖo àgbòa ŋuti.

¹³Wo la sɔ èwɔ meme jijenu be mamã èwogɔ̃a ɖèka sɔ blù ku àmì, sɔ wɔ̀ vɔsa, kpe ɖo àlɛ̃vi ɖe sia ɖe ŋuti. Ekèa nyi ènumème vɔsa kè be hɔ̃hɔ̃ɛ gbligbli la fa àkɔ na Tɔhonɔ̀.

¹⁴Èsìkɔ̀ɖɛ kè wo hiãa ye nyi: vɛ̃ hɛ̃ be jijenu ɖèka be mamã mè na ènyì-su ɖe sia ɖe, vɛ̃ hɛ̃ be jijenu ɖèka be mamã ètɔ̃gɔ̃a, na àgbò ɖe sia ɖe, eye vɛ̃ hɛ̃ be jijenu be mamã ènègɔ̃a, na àlɛ̃vi ɖe sia ɖe. Ènumème vɔsa kèa ye wo la nɔ wɔ̀, wètri yeye ɖe sia ɖe be gɔ̃mèjèje.

¹⁵Sɔ kpe èa, mì la sɔ gbɔgbɔɛ ɖèka savɔ na Tɔhonɔ̀ ɖo nuvuɛ̃ ta; wo la sɔ kpe ènumème vɔsa gbè sia gbè tɔ̀a ku yebe èsìkɔ̀ɖɛa.

¹⁶Wètri cucugbãa be ŋùkèkè woènègɔ̃a gbè[28] ye nyi Toŋutivayì be àzãa, sɔ do bùbu Tɔhonɔ̀ ŋuti.

¹⁷Wètri kèa be ŋùkèkè woeàtɔ̃gɔ̃a gbè ye àzãa la jè e gɔ̃mè: mì la ɖù kpɔ̃nɔ àkpiti ŋùkèkè adrɛ̃.

¹⁸Yebe ŋùkèkè cucugbãa gbèa, mì la bɔ̀, la sɔ sɛ̃ Tɔhonɔ̀; mì mu la wɔ̀ èdɔ ɖekpe ò.

¹⁹Mì la wɔ̀ ènumème vɔsa na Tɔhonɔ̀: ènyì-suvi èvè, àgbò ɖèka, èpè ɖèka be àlɛ̃vi adrɛ̃, èlã kèwo be àfi ɖekpe mu gble ò a.

²⁰Mì la sɔ èwɔ kè wo blù ku àmì be ènu nana kè jè a kpe ɖo e ŋuti: ekèa ye nyi mamã èwogɔ̃ be tèpe ètɔ̃, na ènyì-su ɖèka, eye mamã èwogɔ̃a be tèpe èvè, na àgbò ɖèka.

²¹Wo la sɔ èwɔ kè wo blù ku àmìa be mamã èwogɔ̃a be tèpe ɖèka kpe è, na àlɛ̃vi ɖe sia ɖe.

²²Sɔ kpe èa, mì la sɔ gbɔgbɔɛ ɖèka savɔ ɖo nuvuɛ̃ ta, eye mì la sɔ wɔ̀ èvuɛ̃ sɔsɔkè be èkɔ̀nua ɖo mìabe nuvuɛ̃wo ta.

²³Mì la wɔ̀ vɔsa kèa keŋu, kpe ɖo ŋùdekɛ̃nyɛ be vɔsa kè nyi vɔsa gbè sia gbè tɔ̀a ŋuti.

²⁴Mì la gbà nɔ wɔ̀ ènu ɖùɖu vɔsa gbè sia gbè, kaka ŋùkèkè adrɛ̃, na Tɔhonɔ̀, ènu ɖùɖu kè be hɔ̃hɔ̃ɛ gbligbli la fa àkɔ na Tɔhonɔ̀a. Mì la nɔ wɔ̀ vɔsa kèawo, sɔ kpe ɖo ènumème vɔsa gbè sia gbè tɔ̀a ku yebe èsìkɔ̀ɖɛa ŋuti.

²⁵Ŋùkèkè adrɛ̃gɔ̃ a gbèa, mì la bɔ̀, la sɔ sɛ̃ mù; mì mu la wɔ̀ èdɔ ɖekpe[29] gbè ŋua gbè ò.

²⁶Lè nuku cucugbãwo[30] be àzã gbèa, ne mì va Tɔhonɔ̀ be ŋùkɔ̀, na kuasiɖawo be àzãa kè nyi nukuyàya be ènu nana be èkɔ̀nu gbèa, mì la bɔ̀, la sɔ sɛ̃ mù; mì mu la wɔ̀ èdɔ ɖekpe ò.

²⁷Mì la sɔ ènumème vɔsa kè be hɔ̃hɔ̃ɛ gbligbli la fa àkɔ na Tɔhonɔ̀. Woawo ye nyi ènyì-suvi èvè, àgbò ɖèka ku èpè ɖèka be àlɛ̃vi adrɛ̃.

²⁸Mì la sɔ èwɔ kè wo blù ku àmì be ènu nana kè jè a kpe ɖo e ŋuti: ekèa ye nyi mamã èwogɔ̃a be tèpe ètɔ̃, na ènyì-su ɖèka, eye mamã èwogɔ̃a be tèpe èvè, na àgbò ɖèka.

²⁹Wo la sɔ èwɔ kè wo blù ku àmìa be mamã èwogɔ̃a be tèpe ɖèka kpe è, na àlɛ̃vi ɖe sia ɖe.

³⁰Sɔ kpe èa, mì la sɔ gbɔgbɔɛ ɖèka, sɔ wɔ̀ èvuɛ̃ sɔsɔkè be èkɔ̀nua, ɖo mìabe èvuɛ̃wo ta.

³¹Mì la wɔ̀ vɔsa kèawo ku woabe èsìkɔ̀ɖɛ be èkɔ̀nuawo, kpe ɖo ènumème vɔsa gbè sia gbè tɔ̀a ŋuti ku ènu nana kè la kpe ɖo e ŋutia, eye mì la sɔ èlã kèwo àfi ɖekpe mu gble na ò a, wɔ̀ vɔsa kèawo.