Read gen Àmè Hɛ̃hlɛ̃ 3 Bible Online

Àmè Hɛ̃hlɛ̃ 3 - gen bible

Àmè Hɛ̃hlɛ̃ 3

¹Mosè ku Arɔ̀n be èviwo ye nyi ekèawo, wàlɛbɛ kè Tɔhonɔ̀ pò nupo na Mosè lè Sinaì be ètoa jia.

²Arɔ̀n be èviwo be nyikɔwo ye nyi: Nadàb, àmègãxoa, Abihù, Eleazàr ku Itamàr[1].

³Woawo ye nyi Arɔ̀n be ŋusùvi kèwo wo do àmì èta na, sɔ ɖo wo hũbonɔwo, sɔ sùmɔ̀ sumɔ be èdɔa do àsi na wo.

⁴Vɔ̀a, Nadàb ku Abihù ku lè Tɔhonɔ̀ be ŋùkɔ̀, wàlɛbɛ kè wo sɔ èzò màkɔ̀ màkɔ va ɖo Tɔhonɔ̀ be ŋùmè a[2]. Wo ku lè Sinaì be zògbè a ji, ŋusùvi mà ji. Eleazàr ku Itamàr ye wɔ̀nà sùmɔ̀ sumɔ be èdɔa lè woa tɔ, Arɔ̀n be ŋùmè.

⁵Tɔhonɔ̀ gblɔ̃ na Mosè be:

⁶“Na Levì be jìjimèviwo ne dɔ̃ va, ne woa nyi Arɔ̀n, hũbonɔa be sumɔ̃viwo.

⁷Wo la nɔ sumɔ Arɔ̀n eye wo la nɔ sumɔ àmèha bliboa lè Ègòdodo be gòxɔa be ŋùkɔ̀, la nɔ wɔ̀ èdɔ kèwo kùɖo Zòɖùɖu-Ɖakà a ŋutia.

⁸Wo la nɔ lebè na Ègòdodo be gòxɔa be ŋutinuwo kpata, eye wo la nɔ sumɔ Izràɛlviwo ku èdɔ kèwo kã Zòɖùɖu-Ɖakà a.

⁹Ekèa ŋuti wò la sɔ Levì be jìjimèviwo na Arɔ̀n ku èviawo ɖo, wò la sɔ wo kè Arɔ̀n ku yebe èviwo nyàwo, lè Izràɛlviwo be nyikɔ mè.

¹⁰Wò la ɖo Arɔ̀n ku yebe èviwo ɖèvidɔa nu, ne woa nɔ wɔ̀ sɛ̃sɛ̃ be èdɔa. Àmè gbalo ɖekpekpe kè la gogo àɖakàa la ku.”

¹¹Tɔhonɔ̀ gblɔ̃ na Mosè be:

¹²“Kpɔɖa, nyè ŋutɔ mù le sɔ Levìwo lè Izràɛlviwo dòmè, ɖo ŋùkɔ̀gbeviwo keŋu tèpe, ɖo èvi kèwo keŋu gbe hũ àdɔ̀awo tèpe. Levìwo keŋu nyi tɔ̀ nyè.

¹³Ɖoa, ŋùkɔ̀gbeviwo keŋu nyi tɔ̀ nyè: gbè kè gbè mù crɔ̃ ŋùkɔ̀gbeviwo keŋu lè Ejiptè-nyigbã jia, mù sɔ Izràɛlviwo be ŋùkɔ̀gbeviwo keŋu sɔ wɔ̀ tɔ̀ nyè, àmèha a tɔ̀ ku èlãhaa tɔ̀wo kpata: woawo keŋu nyi tɔ̀ nyè[3]. Ènyè ye nyi Tɔhonɔ̀!”

¹⁴Tɔhonɔ̀ gblɔ̃ na Mosè lè Sinaì be zògbè a ji be:

¹⁵“Hlɛ̃ Levì be jìjimèviwo, ɖo xòmèawo ku hɛ̃nuawo nu: wò la hlɛ̃ Levì be jìjimèvi kèwo nyi ŋusù, eye wo ɖo wètri ɖèkaa.”

¹⁶Mosè zɔ̃ ɖo Tɔhonɔ̀ be èsea ji, eye be hlɛ̃ Levì be jìjimèviawo, sìgbè lekè Tɔhonɔ̀ ɖè ègbè na ɛ̀a nène.

¹⁷Levì be èviwo ye nyi: Gɛrsɔ̀n, Kehàt ku Merarì.

¹⁸Gɛrsɔ̀n be èviwo, ɖo woabe hɛ̃nuwo nu ye nyi: Libnì ku Simeyì.

¹⁹Kehàt be èviwo ɖo woabe hɛ̃nuwo nu ye nyi: Amràm, Yisehar, Hebrɔ̀n ku Uzìɛl.

²⁰Merarì be èviwo, ɖo woabe hɛ̃nuwo nu ye nyi: Mahlì, ku Musì. Ekèawo ye nyi Levì be hɛ̃nuwo, kè wo hlɛ̃ wo ɖo xòmèawo nua.

²¹Gɛrsɔ̀n be jìjimèviwo ye nyi: Libnì be hɛ̃nua ku Simeyì be hɛ̃nua. Hɛ̃nu kèawo ye so Gɛrsɔ̀n be jìjimè.

²²Kè wo hlɛ̃ Gɛrsɔ̀n be jìjimèvi ŋusùwo, so wètri ɖèka jia, woa kpata, wo lè àgbètɔ hotu ètɔ̃ àlɔ̀ woeàtɔ̃ (7500).

²³Gɛrsɔ̀n be jìjimèviwo ye do àsàɖa ɖo èwèzɛ̃pe, lè Ègòdodo be gòxɔa be ŋùgbedòmè.

²⁴Gɛrsɔ̀n be jìjimèviwo be ŋùkɔ̀nɔ̀tɔ ye nyi Elyasàf kè nyi Làɛl be èvia.

²⁵Gɛrsɔ̀n be jìjimèviwo be èdɔ lè Ègòdodo be gòxɔa mè ye nyi be woa nɔ lebè na nɔ̀pea, woa nɔ lebè na gòxɔa, woa nɔ lebè na kùŋùtu kè wo sɔ lɔ̃ gòxɔa, woa nɔ lebè na gòxɔa be èxɔ̀mɔnuvɔa,

²⁶woa nɔ lebè na kùŋùtu kèwo wo sɔ wɔ̀ gòxɔa ku gbàjàa ji be èkpa kè trɔ do gòxɔa be èxɔ̀mɔnuvɔa, woa nɔ lebè na vɔsakpea, woa nɔ lebè na èkà kèwo wo la sɔ nɔ le gòxɔa ɖotèa, eye wo la nɔ kpɔ gòxɔa tùtu be ènyàwo gbɔ.

²⁷Kehàt be jìjimèviwo ye nyi: Amràmviwo be hɛ̃nua, Yiseharviwo be hɛ̃nua, Hebrɔ̀nviwo be hɛ̃nua ku Uzìɛlviwo be hɛ̃nua. Ekèawo ye nyi Kehàt be jìjimèviwo be hɛ̃nuwo.

²⁸Kè wo hlɛ̃ Kehàt be jìjimèvi ŋusùwo kpata, so wètri ɖèka jia, woa kpata wo lè àgbètɔ hotu ènè àlɔ̀ àdɛ̃ (8600) kèwo la nɔ wɔ̀ èdɔ lè kɔ̀kɔ̀ɛpea.

²⁹Kehàt be jìjimèviwo be hɛ̃nuwo do àsàɖa ɖo àkpa ɖèka, lè àpùgo na Ègòdodo be gòxɔa.

³⁰Kehàt be jìjimèviwo be ŋùkɔ̀nɔ̀tɔ ye nyi Elisafàn, kè nyi Uzìɛl be èvia.

³¹Woabe èdɔ ye nyi be woa nɔ lebè na Zòɖùɖu-Ɖakà a, Èse be èkpeawo, kãligbɛ̃tia, vɔsakpeawo ku Tèpe Kɔ̀kɔ̀ɛa be ŋutinu kèwo wo sɔ wɔ̀nà sɛ̃sɛ̃dɔa, sɔ kpe ɖo èxɔ̀mèsòvɔa ku lekè wo la nɔ tù gòxɔa be èdɔwɔ̀nawo keŋu ŋuti.

³²Levìwo be ŋùkɔ̀nɔ̀tɔ gãa ye nyi Eleazàr, Hũbonɔ Arɔ̀n be èvia. E ye kpɔna àmè kèwo keŋu wɔ̀nàdɔ lè Tèpe Kɔ̀kɔ̀ɛa ŋutiawo ji.

³³Merarì be jìjimèviwo ye nyi: Mahlì be èviwo be hɛ̃nu mèviwo ku Musì be hɛ̃nu mèviwo. Woawo ye so Merarì be hɛ̃nu mè.

³⁴Kè wo hlɛ̃ Merarìviwo be ŋusùviwo, so wètri ɖèka jia, wo lè àgbètɔ hotu ètɔ̃ àlɔ̀ èvè (6200).

³⁵Merarìviwo be ŋùkɔ̀nɔ̀tɔ ye nyi Surìɛl, Abihayil be èvia. Woabe hɛ̃nuwo do àsàɖa ɖo àkpa ɖèka, lè àvego na Nɔ̀pe Kɔ̀kɔ̀ɛ.

³⁶Merarì be jìjimèviwo be èdɔ ye nyi be woa nɔ lebè na Nɔ̀pe Kɔ̀kɔ̀ɛ be àtiwo, yebe sɔtiwo ku sɔtiawo be àfɔ̀kpawo, sɔ bɔ̀ ɖo woabe ŋutinuwo keŋu ku nɔ̀pea be tùtu ŋuti.

³⁷Wo la gbà nɔ lebè na sɔti kèwo ye trɔ do gbàjà jia, ku woabe àfɔ̀kpawo, woabe èkà-letiawo ku woabe èkàwo.

³⁸Àmè kèwo do àsàɖa ɖo Nɔ̀pe Kɔ̀kɔ̀ɛ be ŋùkɔ̀a, lè èwèzɛ̃pe, jè ŋùkɔ̀ Nɔ̀pe Kɔ̀kɔ̀ɛ, wo ye nyi Mosè, Arɔ̀n ku yebe èviwo. Woabe èdɔ ye nyi be woa nɔ kpɔ Nɔ̀pe Kɔ̀kɔ̀ɛ be èdɔwo gbɔ, lè Izràɛlviwo be nyikɔ mè. Ne àmè gbalo ɖe gogo Nɔ̀pe Kɔ̀kɔ̀ɛ, wo la wù ì.

³⁹Levì kèwo keŋu Mosè ku Arɔ̀n hlɛ̃ ɖo hɛ̃nuwo nu, sɔ zɔ̃ ɖo Tɔhonɔ̀ be ègbèɖèɖe jia, Levì kèwo nyi ŋusù, ɖo so wètri ɖèka sɔ yìa, lè àgbètɔ hotu woeɖèka (22000).

⁴⁰Tɔhonɔ̀ gblɔ̃ na Mosè be: “Hlɛ̃ ŋùkɔ̀gbevi kèwo nyi ŋusùvi, kèwo ɖo so wètri ɖèka jiawoa keŋu lè Izràɛlviwo dòmè, ne wòa ŋlɔ̀ woabe nyikɔwo ɖɛ.

⁴¹Wò la sɔ Levìawo ɖo àlɔ̀ ji ɖɛ na mù, la sɔ ɖɔ̀lì Izràɛlviwo be ŋùkɔ̀gbevi ŋusùwo keŋu. Nène a ke ye wò la sɔ Levìwo be èlãhawo ɖo àlɔ̀ ji ɖɛ na mù, la sɔ ɖɔ̀lì Izràɛlviwo be èlãhawo be ŋùkɔ̀gbeviwo keŋu. Ènyè ye nyi Tɔhonɔ̀.”

⁴²Mosè hlɛ̃ Izràɛlviwo be ŋùkɔ̀gbevi ŋusùwo keŋu, sìgbè lekè Tɔhonɔ̀ ɖo è na ɛ̀a nène.

⁴³Ŋùkɔ̀gbevi ŋusù kèwo keŋu be nyikɔwo wo ŋlɔ̀awo lè àgbètɔ hotu woeɖèka àlɔ̀ èvè èkà takpo ci woètɔ̃ (22273).

⁴⁴Tɔhonɔ̀ gblɔ̃ na Mosè be:

⁴⁵“Sɔ Levìwo ɖɔ̀lì Izràɛlviwo be ŋùkɔ̀gbevi ŋusùwo keŋu, eye wòa sɔ Levìwo be èlãhawo ɖɔ̀lì Izràɛlviwo be èlãhawo. Tɔ̀ nyè ye nyi Levìwo. Ènyè ye nyi Tɔhonɔ̀.

⁴⁶Na Izràɛlviwo be ŋùkɔ̀gbevi àlɔ̀ èvè èkà takpo ci woètɔ̃ (273) kèwo ye ci Levìwo be hɛ̃hlɛ̃ mè jia be èfɛ̃ kè wò la sɔ xɔ̀ wo plèa,

⁴⁷wò la sɔ sekɛ̀l àtɔ̃ ɖo àmè ɖèka nu, e la nyi kɔ̀kɔ̀ɛpea be sekɛ̀l kè nyi gerà èwì, na sekɛ̀l ɖèkaa.

⁴⁸Wò la sɔ ègàa na Arɔ̀n ku èvia ŋusùwo; e la nyi èci kè wò sɔ le xɔ̀ ŋùkɔ̀gbevi kèwo ci Levìwo be hɛ̃hlɛ̃mè jia plèa.”

⁴⁹Mosè xɔ̀ àmè kèwo be hɛ̃hlɛ̃mè ci Levìwo be ŋùkɔ̀gbeviwo be hɛ̃hlɛ̃mè jiawo be xɔ̀xɔplè be ècia.

⁵⁰E xɔ̀ Izràɛlviwo be ŋùkɔ̀gbeviwo be ègà kè nyi kɔ̀kɔ̀ɛpe be sekɛ̀l àlɔ̀ woètɔ̃ èkà takpo ci àdɛ̃ (1365).

⁵¹E yomè a, Mosè sɔ xɔ̀xɔplè be ègàa na Arɔ̀n ku yebe ŋusùviawo, sìgbè lekè Tɔhonɔ̀ ɖo è na ɛ̀a nène.