Read gen Àmè Hɛ̃hlɛ̃ 31 Bible Online

Àmè Hɛ̃hlɛ̃ 31 - gen bible

Àmè Hɛ̃hlɛ̃ 31

²“Biɔ èhlɔ̃ na Izràɛlviwo ɖo èvuɛ̃[33] kè Midìantɔwo wɔ̀ ɖo woa ŋutia nu; ekèa yomè a, wò la trɔ yì tɔgbe wòwo gbɔ.”

³Mosè gblɔ̃ na dùkɔ̃a be: “Ŋusùwo ne bla àkpà lè mìa dòmè, ne woa yì àhùa. Wo la kpe àhùa ku Midìantɔwo, la sɔ biɔ èhlɔ̃ na Tɔhonɔ̀.

⁴Mì cã àhùasuka àkpe ɖèka lè Izràɛl be kɔ̀ta sia kɔ̀ta mè.”

⁵Ekèa ŋutia, wo ɖè ŋusù èkà èwìvɔàtɔ̃ lè Izràɛlviwo be àhùakɔ̃ àlɔ̀ èwo-èwowo dòmè, eye, so kɔ̀tawo keŋu mèa, e wɔ̀ àgbètɔ hotu àdɛ̃ (12000) kèwo bla àkpà, la jè èmɔ na àhùa gbèjia.

⁶Mosè ɖo àmè èkà èwì vɔ àtɔ̃, so kɔ̀ta ɖe sia ɖe mè ɖoɖa àhùagbea ji; e ɖo wo ɖoɖa ku hũbonɔ Pinhàs, Eleazàr be èvia. Hũbonɔa le kɔ̀kɔ̀ɛpea be ènuwo[34] ɖo àsi, kpe ɖo èzè kèwo wo la nɔ zã, la sɔ nɔ ɖè ègbèa ŋuti.

⁷Wo jè èmɔ, yì àhùa gbea ji, sìgbè lekè Tɔhonɔ̀ ɖè ègbè na Mosè a nène, eye wo wù Midìan be ŋusùwo keŋu.

⁸Kpe ɖo woa ŋutia, wo wù Midìantɔwo be èfìɔwo cã: wo wù èfìɔ àtɔ̃ kèwo nyi: Ɛvì, Rekɛ̀m, Sur, Hur ku Rɛvà. Wo sɔ èwui wù Bìleam kè nyi Beɔ̀r be èvia cã.

⁹Izràɛlviwo le Midìan nyɔ̃nùwo ku woabe èviwo àhùale; wo le woabe èlãwo keŋu, woabe èlãhawo kpata, eye wo fɔ̀ woabe ènuɖoɖowo keŋu.

¹⁰Wo tɔzò èdù kèwo keŋu mè Midìantɔwo lèa ku woabe àsàɖawo.

¹¹E yomè a, Izràɛlviwo fɔ̀ ènu kèwo wo lɔawo keŋu, eye wo kplɔ̀ àmè ku èlã kèwo wo leawo jo.

¹²Wo kplɔ̀ àhùaleawo, ku ènu kèwo wo lɔawo va na Mosè, na hũbonɔ Eleazàr ku na Izràɛlviwo be àmèha a. Wo sɔ wo yì woabe àsàɖaa mè, lè Mòab be ànyigbã gbàjà kè lè Yɔrdàn be ètɔ̀a to, lè Yerikò gbɔa.

¹³Mosè, hũbonɔ Eleazàr ku Izràɛlviwo be ŋùkɔ̀nɔ̀tɔwo keŋu to lè àsàɖaa mè va dogò wo lè àsàɖaa godo.

¹⁴Mosè do àdɔ̀mèze do àhùakplɔ̀tɔ kèwo wo sɔ ɖo àmè èkà èwì vɔ àtɔ̃ (1000) ku àmè èkà èvè takpowo (100) be àhùakɔ̃ kèwo ye gbɔ̀ so àhùagbe ŋua jia.

¹⁵E gblɔ̃ na wo be: “Nukɛ! Mì gble nyɔ̃nùawo kpata ɖo àgbèa!

¹⁶Lè Peɔ̀r[35] be ènyàa mèa, mu nyi woawo tutu ye dɔ̃ Izràɛlviwo ɖo àhasì gbe, eye wo trɔ ŋùgbe do Tɔhonɔ̀, lè Bìleam be ènyàa nu, eye èdɔ̀ vuɛ̃ ɖe va jè Tɔhonɔ̀ be àmèha a ji ò a?

¹⁷Ekèa ŋutia, mì wù ŋusùviwo keŋu ku nyɔ̃nù kèwo ɖè èsrɔ̃a.

¹⁸Vɔ̀a, nyɔ̃nùvi kèwo kpata mu nya ŋusù, to èsrɔ̃ɖèɖe mè ò a, mì gble wo ɖo àgbè, na mìa ŋutɔwo.

¹⁹Eye, mìa ŋutɔwoa, mì la do àsàɖa ɖo àsàɖaa godo, ŋùkèkè adrɛ̃. Mì àmè kèwo kpata wù àmè, àlo, àmè kèwo tɔ àlɔ̀ àmèkukua, mì la lè mìa ɖokoewo ɖì, ŋùkèkè ètɔ̃gɔ̃a, ku adrɛ̃gɔ̃ a gbè, mia ŋutɔwo ku mìabe nyɔ̃nù àhùaleawo.

²⁰Nène a ke, mì la kɔ̀ àvɔwo keŋu, àgbàze nuwo, ègbɔfu be ènuwo ku ènu kèwo keŋu wo sɔ àti kpàawo ŋuti.”

²¹Hũbonɔ Eleazàr gblɔ̃ na gbãdãgbãwo be: “Èsea be ɖoɖo kèwo Tɔhonɔ̀ wɔ̀, do àsi na Mosè a wo ye nyi ekèawo:

²²Sìka, klòsalò, gàjɛ̃, gàyìbɔ, ègàɣe ku suŋubui,

²³ku ènu kèwo keŋu teŋu to èzò mèawo ŋuti kpò ye mì la sɔ èzò nɔ kɔ̀, gbɔ̀xue, la sɔ wo do àmèlèleɖì be èsì mè[36]. Ènu kèwo keŋu mu teŋu to èzò mè ò a, mì la sɔ èsì nɔ klɔ woa ŋuti.

²⁴Ne mì nyà mìabe àwùwo, ŋùkèkè adrɛ̃ a gbè vɔ̀a, mìa ŋuti la kɔ̀, eye, e yomè a, mì la trɔ gbɔ̀ va àsàɖaa mè.”

²⁵Tɔhonɔ̀ gblɔ̃ na Mosè be:

²⁶“Wò ku hũbonɔ Eleazàr, kudo àmèha a be xòmègawo, mì la hlɛ̃ àhùaleawo ku èlã kèwo wo lea, ɖèka ɖèka.

²⁷Wò la ma àmɔ̀nyɔ̀nuawo ɖo gbãdãgbãwo ku àmèha bliboa nu.

²⁸Wò la xɔ̀ àjɔ̀ lè gbãdãgbã kèwo yì àhùawo si, na Tɔhonɔ̀. Wò la xɔ̀ àgbètɔ ɖèka lè àlɔ̀ àtɔ̃ (500) ji, eye wò la xɔ̀ èlã ɖèka lè àlɔ̀ àtɔ̃ (500) ji, lè ènyì, èsɔ-àkɛtɛ, ku àlɛ̃ kudo ègbɔwo dòmè.

²⁹Wò la ɖè è lè woabe mamãwo mè, eye wò la sɔ na hũbonɔ Eleazàr; e la nyi àjɔ̀ kè wo ɖo la na Tɔhonɔ̀a.

³⁰Lè Izràɛlvi kpɔ̀tɛawo tɔ̀ mèa, wò la xɔ̀ àgbètɔ ɖèka lè èkà ci èwo (50) ji, èlã ɖèka lè èkà ci èwo (50) ji; lè ènyìwo, èsɔ-àkɛtɛwo, àlɛ̃wo ku ègbɔwo, èlãwo kpata dòmè, eye wò la sɔ wo na Levì kèwo le wɔ̀ èdɔ lè Tɔhonɔ̀ be Nɔ̀pe Kɔ̀kɔ̀ɛ.”

³¹Mosè ku hũbonɔ Eleazàr wɔ̀ ɖo ènu kè Tɔhonɔ̀ do àsi na Mosè a ji.

³²Lè àmɔ̀nyɔ̀nu kèwo gbãdãgbãwo hlà lè Midìantɔwo si, lè àhùagbea jia dòmèa, ekè kpɔ̀tɔ̀a kpata lè: àlɛ̃ ku ègbɔ hotu àlɔ̀ ètɔ̃ ègbã vɔ adrɛ̃ ci èkà èwì vɔ àtɔ̃ (675000),

³³ènyì hotu ègbã vɔ àdɛ̃ (72000),

³⁴èsɔ-àkɛtɛ hotu ègbã èkà èwì vɔ àtɔ̃ (61000),

³⁵àgbètɔwo yaa, vevetɔa, nyɔ̃nù kèwo mu nya ŋusù, eye wo mu ɖè èsrɔ̃ ò a, woa kpata wo lè àgbètɔ hotu woeàdɛ̃ (32000).

³⁶Àmɔnyɔnuawo be mamã mè lè àlɛ̃ ku ègbɔ hotu àlɔ̀ ɖèka èkà takpo ci ènyi àlɔ̀ woeàtɔ̃ (337500);

³⁷Àjɔ̀ kè wo ɖè na Tɔhonɔ̀ lè àlɛ̃ ku ègbɔwo dòmèa lè èlã àlɔ̀ àdɛ̃ èkà takpo ci woeàtɔ̃ (675);

³⁸ènyìawo lè hotu woènyi (36000), eye wo ɖè èkà takpo ci woèvè (72), sɔ na Tɔhonɔ̀;

³⁹èsɔ-àkɛtɛawo lè hotu woeàtɔ̃ àlɔ̀ àtɔ̃ (30500), eye wo ɖè èkà takpo ci ɖèka (61), sɔ na Tɔhonɔ̀;

⁴⁰àgbètɔawo lè àmè hotu ènyi (16000), eye wo ɖè ègbã vɔ èvè (32) sɔ na Tɔhonɔ̀.

⁴¹Mosè sɔ àjɔ̀ kè be ɖè na Tɔhonɔ̀a do àsi na hũbonɔ Eleazàr, sìgbè lekè Tɔhonɔ̀ ɖè ègbè na Mosè a nène.

⁴²Ènuawo ku àhùaleawo be mamã mè kè la nyi Izràɛlviwo tɔ̀, eye Mosè xɔ̀ lè àmè kèwo yì àhùawo sia,

⁴³àkpa kè wo sɔ na àmèha a nyi: àlɛ̃ ku ègbɔ hotu àlɔ̀ ɖèka èkà takpo ci ènyi àlɔ̀ woeàtɔ̃ (337500);

⁴⁴ènyì hotu woènyi (36000),

⁴⁵èsɔ-àkɛtɛ hotu woeàtɔ̃ àlɔ̀ àtɔ̃ (30500),

⁴⁶ku àgbètɔ hotu ènyi (16000).

⁴⁷Lè àkpa kè la nyi Izràɛlviwo tɔ̀a, Mosè ɖè àgbètɔ ɖèka lè èkà ci èwo (50) ji ku èlã ɖèka lè èkà ci èwo (50) ji, sɔ na Levì kèwo sumɔna lè Tɔhonɔ̀ be nɔ̀pea, sìgbè lekè Tɔhonɔ̀ ɖè ègbè na ɛ̀a nène.

⁴⁸Àhùaga ku àhùa be ŋùkɔ̀nɔ̀tɔwo va kpɔ Mosè;

⁴⁹wo gblɔ̃ na ɛ̀ be: “Sumɔvi wòwo hlɛ̃ gbãdãgbã kèwo wo sɔ do àsi na mia, eye àmè ɖekpe mu to lè woa mè ò.

⁵⁰Ekèa ŋutia, ne mia wɔ̀ àvũlele be èkɔ̀nu na mia ɖokoewo lè Tɔhonɔ̀ be ŋùkɔ̀a, mi hɛ̃ sìkanu kèwo nyi: àlɔ̀tinugawo, àlɔ̀gawo, àlɔ̀gaviwo, ètomègàviwo ku èwlɔ kèwo mia dòmètɔ ɖe sia ɖe teŋu kpɔa va.”

⁵¹Mosè ku hũbonɔ Eleazàr xɔ̀ sìkaa kè nyi àlɔ̀nu-dɔwɔ̀wɔwo lè woa si.

⁵²Sìka kè kpata wo ɖè, sɔ wɔ̀ àjɔ̀ na Tɔhonɔ̀a lè sekɛ̀l hotu ènyi àlɔ̀ adrɛ̃ èkà ci èwo (16750). Ekèa ye gbãdãgbã èkàwìvɔàtɔ̃ ku àlɔ̀-àlɔ̀wo be ŋùkɔ̀nɔ̀tɔwo sɔ va na Tɔhonɔ̀.

⁵³Gbãdãgbãawo mu na ènu ɖe àmɔ̀nyɔ̀nu kèwo woa ŋutɔ wo hlàa mè.

⁵⁴Mosè ku hũbonɔ Eleazàr xɔ̀ sìkaa lè gbãdãgbãawo be ŋùkɔ̀nɔ̀tɔwo si; wo sɔ ɛ̀ va Ègòdodo be gòxɔa mè, ne bèa nyi ŋùkuɖojinu na Izràɛlviwo lè Tɔhonɔ̀ be ŋùku mè.