Read gen Àmè Hɛ̃hlɛ̃ 33 Bible Online

Àmè Hɛ̃hlɛ̃ 33 - gen bible

Àmè Hɛ̃hlɛ̃ 33

¹Kè Izràɛlviwo to so Ejiptè-nyigbã ji ku woabe àhùakɔ̃wo, lè Mosè ku Arɔ̀n be kpɔ̀kplɔ nua, àfi kèwo wo to, eye wo nɔ̀tè ɖoawo ye nyi ekèawo.

²Mosè ŋlɔ̀ woabe èmɔzɔ̃zɔ̃a ɖo woabe tope kèwo wo jo lè, zɔ̃ ɖo Tɔhonɔ̀ be ègbèɖèɖe nua ɖɛ: Woabe topeawo ye nyi ekèawo:

³Wètri cucugbãa be ŋùkèkè woeàtɔ̃gɔ̃a gbèa, wo jo lè Ramsɛ̀s be èdùa mè. Toŋutivayì be ŋùkè gbè ye Izràɛlviwo jo fàa, lè Ejiptètɔwo keŋu be ŋùmè.

⁴Wàlɛbɛ ŋua, Ejiptètɔwo le ɖì woa dòmètɔ kèwo Tɔhonɔ̀ wù, kèwo nyi woabe ŋùkɔ̀gbeviwo. Tɔhonɔ̀ sɔ yebe ŋusɛ̃ wɔ̀ ekèa, sɔ le ɖo kòjo ku woabe vòduwo.

⁵Kè Izràɛlviwo jo lè Ramsɛ̀s vɔ̀a, wo va do àsàɖa ɖo Sukɔ̀t.

⁶Kè wo jo lè Sukɔ̀t vɔ̀a, wo va do àsàɖa ɖo Etàm, lè kaka zògbè a be ètomè ɖaa.

⁷Kè wo jo lè Etàm vɔ̀a, wo trɔ gbɔ̀ va Pi-Hahirɔ̀t, kpã ŋùkɔ̀ Baal-Sefɔ̀n, eye wo do àsàɖa ɖo Migdɔ̀l be ŋùkɔ̀.

⁸Kè wo jo lè Hahirɔ̀t be ŋùkɔ̀a, wo sò àpùa, jè zògbè a ji, eye, kè wo zɔ̃ ŋùkèkè ètɔ̃ lè Etàm be zògbè a ji vɔ̀a, wo do àsàɖa do Marà.

⁹Kè wo jo lè Marà vɔ̀a, wo yì ɖo Elìm, àfi kè èsìdo woèvè ku èdeviti èkà takpo ci wo (70) lèa. Wo do àsàɖa ɖo funua.

¹⁰Kè wo jo lè Elìm vɔ̀a, wo yì do àsàɖa ɖo plãŋùpòfɛ̃[39] be àpùa to.

¹¹Kè wo jo lè plãŋùpòfɛ̃ be àpùa toa, wo yì do àsàɖa ɖo Sìn be zògbè a ji.

¹²Kè wo jo lè Sin be zògbè a jia, wo yì do àsàɖa ɖo Dofkà.

¹³Kè wo jo lè Dofkàa, wo yì do àsàɖa ɖo Alùs.

¹⁴Kè wo jo lè Alùsa, wo yì do àsàɖa ɖo Refidìm, àfi kè dùkɔ̃a mu kpɔ èsì lè la nù ò a.

¹⁵Kè wo jo lè Refidìm vɔ̀a, wo yì do àsàɖa ɖo Sinaì be zògbè a ji.

¹⁶Kè wo jo lè Sinaì be zògbè a jia, wo yì do àsàɖa ɖo Kibrɔ̀t-Tavà.

¹⁷Kè wo jo lè Kibrɔ̀t-Tavàa, wo yì do àsàɖa ɖo Haserɔt.

¹⁸Kè wo jo lè Haserɔt vɔ̀a, wo yì do àsàɖa ɖo Ritmà.

¹⁹Kè wo jo lè Ritmàa, wo yì do àsàɖa ɖo Rimɔ̀n-Perɛ̀z.

²⁰Kè wo jo lè Rimɔ̀n-Perɛ̀z yomè a, wo yì do àsàɖa ɖo Libnà.

²¹Kè wo jo lè Libnàa, wo yì do àsàɖa ɖo Risà.

²²Kè wo jo lè Risàa, wo yì do àsàɖa ɖo Kehelatà.

²³Kè wo jo lè Kehelatàa, wo yì do àsàɖa ɖo Sɛfɛ̀r be ètoa ji.

²⁴Kè wo jo lè Sɛfɛ̀r be ètoa jia, wo yì do àsàɖa ɖo Haradà.

²⁵Kè wo jo lè Haradàa, wo yì do àsàɖa ɖo Makehɛlɔ̀t.

²⁶Kè wo jo lè Makehɛlɔ̀t yomè a, wo yì do àsàɖa ɖo Tahat.

²⁷Kè wo jo lè Tahat vɔ̀a, wo yì do àsàɖa ɖo Terà.

²⁸Kè wo jo lè Teràa, wo yì do àsàɖa ɖo Mitkà.

²⁹Kè wo jo lè Mitkà a, wo yì do àsàɖa ɖo Hasmɔnà.

³⁰Kè wo jo lè Hasmɔnàa, wo yì do àsàɖa ɖo Mosèrɔt.

³¹Kè wo jo lè Mosèrɔt vɔ̀a, wo yì do àsàɖa ɖo Bene-Yakàn.

³²Kè wo jo lè Bene-Yakàn yomè a, wo yì do àsàɖa ɖo Hɔr-Gidgàd.

³³Kè wo jo lè Hɔr-Gidgàd vɔ̀a, wo yì do àsàɖa ɖo Yɔtbatà.

³⁴Kè wo jo lè Yɔtbatà a, wo yì do àsàɖa ɖo Avronà.

³⁵Kè wo jo lè Avronàa, wo yì do àsàɖa ɖo Esiɔ̀n-Gebɛ̀r.

³⁶Kè wo jo lè Esiɔ̀n-Gebɛ̀r vɔ̀a, wo yì do àsàɖa ɖo Sìn be zògbè a ji, lè Kadɛ̀s.

³⁷Kè wo jo lè Kadɛ̀s yomè a, wo yì do àsàɖa ɖo Hɔr be èto ji, lè Edɔ̀m-nyigbãa be ènukpòpewo.

³⁸Kè Tɔhonɔ̀ ɖè ègbèa, hũbonɔ Arɔ̀n yì Hɔr be ètoa ji, eye be ku lè funua, lè èpè èkà kè Izràɛlviwo to so Ejiptè-nyigbã ji vɔ̀ yomè a be wètri àtɔ̃gɔ̃a, be ŋùkèkè cucugbãa ji.

³⁹Arɔ̀n sĩ, ɖo èpè èkà ètɔ̃ ci ètɔ̃ (123), wàlɛbɛ kè be ku lè Hɔr be ètoa jia.

⁴⁰E yomè a, Kanàntɔwo, Kanàn be èfìɔ Arad kè nɔ̀nà Kanàn-nyigbãa be àpùgoa sè be Izràɛlviwo va.

⁴¹Kè wo jo lè Hɔr be ètoa jia, Izràɛlviwo do àsàɖa ɖo Salmɔnà.

⁴²Kè wo jo lè Salmɔnàa, wo yì do àsàɖa ɖo Punɔ̀n.

⁴³Kè wo jo lè Punɔ̀n vɔ̀a, wo yì do àsàɖa ɖo Ovɔ̀t.

⁴⁴Kè wo jo lè Ovɔ̀t yomè a, wo yì do àsàɖa ɖo Iye-Àbàrim, lè Mòab be lipò ji.

⁴⁵Kè wo jo lè Iyìm[40]vɔ̀a, wo yì do àsàɖa ɖo Dibɔ̀n-Gad.

⁴⁶Kè wo jo lè Dibɔ̀n-Gad vɔ̀a, wo yì do àsàɖa ɖo Almɔ̀n-Dìblatayimà.

⁴⁷Kè wo jo lè Almɔ̀n-Diblatayimàa, wo yì do àsàɖa ɖo Àbàrim be ètoawo tamè, kpã ŋùkɔ̀ Nebò be èdùa.

⁴⁸Kè wo jo lè Àbàrim be ètoawo tamèa, wo yì do àsàɖa ɖo Mòab be ànyigbã gbàjà ji, lè Yɔrdàn be ètɔ̀a to, lè Yerikò lɔ̀ge.

⁴⁹Wo do àsàɖa ɖo Yɔrdàn be ètɔ̀a to, so kaka Yesimɔ̀t, sɔ yì kaka Abɛ̀l-Sitìm, lè Mòab be ànyigbã gbàjàa ji.

⁵⁰Tɔhonɔ̀ gblɔ̃ na Mosè, lè Mòab be ànyigbã gbàjàa ji, lè Yɔrdàn be ètɔ̀a to, lè Yerikò lɔ̀ge be:

⁵¹“Ne mì sò Yɔrdàn be ètɔ̀a, sɔ ɖo Kanàn-nyigbã jia,

⁵²Mì la nyà dùkɔ̃ kèwo keŋu lè ŋùkɔ̀ na mìawo, mì la xɔ̀ ànyigbãa lè woa si, mì la crɔ̃ woabe vòdu be èkpetatawo kpata. Mì la crɔ̃ woabe ègàsèsre be legbawo kpata, eye mì la gũ woabe ètotamè be vɔsakpewo kpata.

⁵³Mì la xɔ̀ ànyigbãa, eye mì la nɔ̀ e ji, ɖoa, mìawo ye mù sɔ ànyigbã ŋua na, ne bèa nyi mìa tɔ̀.

⁵⁴Mì la dà àkɔ̀, sɔ mã ànyigbãa ɖo mìabe kɔ̀taawo dòmè. Ne kɔ̀taa lòlòa, yebe mamãa la lòlò, eye, ne kɔ̀taa hùea, yebe mamãa la hùe. Àmè sia àmè be ècrɔ̃nu la nyi àfi kè àkɔ̀dàda la sɔ do àsi na ɛ̀a. Mì la wɔ̀ mamã ɖo mìa tɔwo be kɔ̀taawo nu.

⁵⁵Vɔ̀a, ne mì mu nyà èdùamètɔwo jo lè mìabe ŋùkɔ̀ ò a, eŋuã, woa dòmètɔ kèwo mì la gble ɖɛawo la trɔ zũ àŋùja lè mìabe ŋùkuwo ji ku àklãŋùti lè mìabe àxàda mè. Wo la jã mì lè ànyigbã kè ji mì la nɔ̀a ji,

⁵⁶eye ènu kè mù ɖo ɖo woa ŋutia, mìawo ye mù la wɔ̀ ɛ̀ ku.”