Read gen Àmè Hɛ̃hlɛ̃ 34 Bible Online

Àmè Hɛ̃hlɛ̃ 34 - gen bible

Àmè Hɛ̃hlɛ̃ 34

¹Tɔhonɔ̀ gblɔ̃ na Mosè be:

²“Ɖè ègbè na Izràɛlviwo ne wòa gblɔ̃ na wo be: Ne mì ɖo Kanàn-nyigbã ji, ànyigbã kè mù sɔ le na mì, ne bèa nyi mìabe ècrɔ̃nua jia, be lipòwo nyi kèwo gbãnàa:

³Lè àpùgoa, mìabe lipò la tɔ e ji so Sìn be zògbè a ji, eye be la to Edɔ̀m be ànyigbãa be àxàda mè. Lè èwèzɛ̃pea, mìabe àpùgo be lipòa la so Èjè be gbàgàa be àpùgo be ènu gbɔ.

⁴E yomè a, mìabe lipòa la kpà to Akuabìm be ètoa be àpùgo, la to Sìn, ne bèa va ɖo Kadɛ̀s-Bàrneà be àpùgo. E la gbà so funua, tùtà Hasàr-Adàr, eye be la to Asmɔ̀n.

⁵Ne e so Asmɔ̀n kpòa, lipòa la trɔ kpà tùtà Ejiptè be ètɔ̀ wɔ̀ àdã a gbɔ, eye be la va ɖo àpùa to.

⁶Àpù Gãa[41] ye la nyi mìabe èwèɖoxɔ̀pe be lipòa.

⁷Mìabe àvego be lipòa ye nyi ekèa: Mì la tè lipòa, so kaka Àpù Gãa to, sɔ va ɖo Hɔr be ètoa ŋuti.

⁸So Hɔr be ètoa ŋutia, mì la tè è kaka va ɖo Lebò-Hamàt. Lipòa la va ɖo Sedàd.

⁹E yomè a, lipòa la gbà tùtà Zifrɔ̀n, eye be la yì ɖo Hasàr-Einàn. Lekea ye mìabe àpùgo be lipòa la nɔ̀a yeŋu.

¹⁰Na mìabe èwèzɛ̃pe be lipòa, mì la tè èflì ɖe, so Hasàr-Einàm sɔ yì Sefàm.

¹¹So Sefàm, lipòa la ɖiɖi to Riblà, lè èwèzɛ̃pe na Ayìn, eye be la gbà ɖiɖi kaka la yì tɔ Kinerɛ̀t be tɔ̀gbaa be èwèzɛ̃pe be àgowo ji.

¹²E yomè a, e la gbà ɖiɖi kaka yì Yɔrdàn be ètɔ̀a ŋuti, eye be la yì tɔ èjè be gbàgàa. Lekea ye mìabe èdùa la nɔ̀ ku lipò kèwo la trɔ do èa.”

¹³Mosè sɔ ɖoɖo kèawo do àsi na Izràɛlviwo, eye be gblɔ̃ na wo be: “Ànyigbã kèa ji ye mì la dà àkɔ̀, la sɔ mã àmè si àmè be ècrɔ̃nu na ɛ̀, lè ànyigbã kè Tɔhonɔ̀ gblɔ̃ be yè la sɔ do àsi na kɔ̀ta àsiɖèkɛawo ku Manasè be kɔ̀ta mamã mèa.

¹⁴Ɖoa, Rubɛ̀n be jìjimèviwo be kɔ̀taa ku woabe xòmèwo ku Gad be jìjimèviwo be kɔ̀taa ku woabe xòmèwo kudo Manasè be jìjimèviwo be kɔ̀taa be mamã mè ya xɔ̀ woabe ècrɔ̃nu vɔ̀.

¹⁵Kɔ̀ta èvè kèawo ku Manasè be kɔ̀taa be mamã mè xɔ̀ woabe ècrɔ̃nu lè Yɔrdàn be ètɔ̀a godo, lè Yerikò lɔ̀ge, lè èwèzɛ̃pe.”

¹⁶Tɔhonɔ̀ gblɔ̃ na Mosè be:

¹⁷“Àmè kèwo la ma mìabe ècrɔ̃nuawo na mì, lè èdùa mèawo ye nyi ekèawo: hũbonɔ Aleazàr ku Yosùa, Nun be èvia.

¹⁸Kɔ̀ta ɖe sia ɖe la cã ŋùkɔ̀nɔ̀tɔ ɖèka na ècrɔ̃nu mamãa, ne mì ɖo èdùa mèa.

¹⁹Àmè ŋuawo be nyikɔwo ye nyi: Kàlɛb, Yefunè be èvia, la nɔ̀ ŋùkɔ̀ na Yudà be kɔ̀taa.

²⁰Semuɛ̀l, Amihùd be èvia la nɔ̀ ŋùkɔ̀ na Simeɔ̀n be kɔ̀taa.

²¹Elidàd, Kislɔ̀n be èvia, la nɔ̀ ŋùkɔ̀ na Bɛnyamìn be kɔ̀taa.

²²Bukì, Yoglì be èvia, la nɔ̀ ŋùkɔ̀ na Dàn be kɔ̀taa.

²³Na Yosɛ̀f be jìjimèviwoa, Haniɛl, Efod be èvia la nɔ̀ ŋùkɔ̀ na Manasè be kɔ̀taa.

²⁴Kemùɛl, Siftàn be èvia, la nɔ̀ ŋùkɔ̀ na Efràyim be jìjimèviwo be kɔ̀taa.

²⁵Elisàn, Parnàk be èvia, la nɔ̀ ŋùkɔ̀ na Zabulɔ̀n be jìjimèviwo be kɔ̀taa.

²⁶Patìɛl, Azàn be èvia, la nɔ̀ ŋùkɔ̀ na Isakàr be jìjimèviwo be kɔ̀taa.

²⁷Ahihùd, Selumì be èvia, la nɔ̀ ŋùkɔ̀ na Àsɛr be jìjimèviwo be kɔ̀taa.

²⁸Pedahɛ̀l, Amihùd be èvia, la nɔ̀ ŋùkɔ̀ na Neftalì be jìjimèviwo be kɔ̀taa.

²⁹Àmè ŋuawo ye nyi àmè kèwo Tɔhonɔ̀ ɖè ègbè na be wo ne mã ècrɔ̃nu na Izràɛlviwo, lè Kanàn-nyigbãa ji.