Read gen Àmè Hɛ̃hlɛ̃ 4 Bible Online

Àmè Hɛ̃hlɛ̃ 4 - gen bible

Àmè Hɛ̃hlɛ̃ 4

²Mì ŋlɔ̀ Kehàt be jìjimèviwo be ŋùkɔ̀nɔ̀tɔwo be nyikɔwo, lè Levìwo dòmè, ɖo woabe hɛ̃nuwo ku xòmèwo nu,

³àmè kèwo ɖo, so èpè ègbã ji, sɔ yì èkà ci èwo jia, wo ɖo la va wɔ̀ èdɔ lè Ègòdodo be gòxɔa mè.

⁴Èdɔ kè Kehàt be èviwo la wɔ̀ lè Ègòdodo be gòxɔa mèa ye nyi be, woawo ye la nɔ lebè na ènu kɔ̀kɔ̀ɛwo be ènu kɔ̀kɔ̀ɛwo.

⁵Ne àsàɖaa la hɔ̃ joa, Arɔ̀n ku yebe ŋusùviwo ye la va ɖè èxɔ̀mèsòvɔa, eye wo la sɔ cɔ̃ Zòɖùɖu-Ɖakà a.

⁶Wo la tɔ̃ ènyɔ̃ be àgbàze, sɔ cɔ̃ e ji. Wo la sɔ àmàdodo àyòŋùklɛ be àvɔ cɔ̃ e kpata ji. Ekèa yomè a, wo la do Zòɖùɖu-Ɖakà a be àtiawo.

⁷Wo la ɖo àmàdodo àyòŋùklɛ be àvɔ ɖo ènu nana be èkplɔ̃a ji, eye wo la fɔ̀ àgbã gbɛjɛwo, kogòwo, àgbãwo ku èsìtutu be ègòwo ɖo e ji. Wo la sɔ kpɔ̃nɔ kòkòɖàbìa ɖo èkplɔ̃ kèa ji.

⁸Wo la sɔ àvɔ jɛ̃ hɛ̀lì cɔ̃ e ji, gbɔ̀xue la sɔ ènyɔ̃ be àgbàze cɔ̃ e ji, eye wo la do èkplɔ̃a be àtiawo.

⁹E yomè a, wo la sɔ àmàdodo àyòŋùklɛ be àvɔ cɔ̃ kãligbɛ̃ti ku yebe kãligbɛ̃awo, èzòkasɔnuawo, àfixɔ̀gbãviawo, àmìgoawo ku woabe ŋutinuawo keŋu.

¹⁰Wo la bla wo ɖo àkpò kè wo la sɔ ènyɔ̃ be àgbàze tɔ̃a mè, eye wo la dà àkpòa ɖo yebe àblɔ̀ŋùgɔ a ji.

¹¹Wo la ɖo àmàdodo àyòŋùklɛ be àvɔ ɖo sìka vɔsakpea ji. Wo la sɔ ènyɔ̃ be àgbàze be àkpòa cɔ̃ na ɛ̀, eye wo la do àtiawo na sìka vɔsakpea.

¹²Ekèa yomè a, wo la sɔ ènu kèwo keŋu wo zãna na sɛ̃sɛ̃dɔa lè kɔ̀kɔ̀ɛpea bla ɖo àmàdodo àyòŋùklɛ be àvɔ mè, la sɔ do ènyɔ̃ be àgbàze be àkpòa mè. Wo la kɔ àkpòa ɖo yebe àblɔ̀ŋùgɔ a ji.

¹³Wo la ɖè àfì lè vɔsakpea ji, eye wo la ɖo àvɔ jɛ̃ hɛli ɖo e ji.

¹⁴Wo la fɔ̀ ènu kèwo keŋu wo zãna, sɔ wɔ̀nà sɛ̃sɛ̃dɔa ɖo e ji: gànu be èzeviawo, gafòawo, sɔfìawo, èsìwuwu be kogòawo ku vɔsakpea be ŋutinuwo keŋu. Wo la sɔ ènyɔ̃ be àgbàze be àkpòa cɔ̃ woa ji, eye wo la do àtiawo na vɔsakpea.

¹⁵Wàlɛbɛ kè wo le hɔ̃ àsàɖaa joa, Arɔ̀n ku èviawo la pòtɛ Nɔ̀pe Kɔ̀kɔ̀ɛ vɔ̀, la bla ɛ̀ ku yebe ŋutinuwo, la wu e nu, gbɔ̀xue Kehàt be èviwo la va kɔ ɛ̀ jo. Kehàt be èviwo mu la tɔ àsi Nɔ̀pe Kɔ̀kɔ̀ɛ ku yebe ŋutinuwo, ne wo mu bla wo ò. Ne wo tɔ àsi woa, wo la ku. Èdɔ kè Kehàt be èviwo la wɔ̀ lè Nɔ̀pe Kɔ̀kɔ̀ɛ ku yebe ŋutinuwo ŋutia ye nyi be, wo la kɔkɔ wo, babla kpò.

¹⁶Eleazàr, hũbonɔ Arɔ̀n be èvia be èdɔ ye nyi be, ne nɔ kpɔ kãligbɛ̃ be àmìa gbɔ, e la gbà nɔ kpɔ ègbe ku àmì hɔ̃hɔ̃ɛ kè wo la nɔ tɔzòa, gbè sia gbè be ènu nana, àmì kɔ̀kɔ̀ɛ, ku ènu sia ènu kè lè Nɔ̀pe Kɔ̀kɔ̀ɛ mèa ku yebe ŋutinuwo keŋu gbɔ, sɔ bɔ̀ ɖo èdɔ kèwo keŋu kã Nɔ̀pe Kɔ̀kɔ̀ɛ mèawo keŋu ŋuti.

¹⁷Tɔhonɔ̀ gbà gblɔ̃ na Mosè be:

¹⁸“Mì mu gbà na Kehàt be èviwo be hɛ̃nua ne crɔ̃ jo lè Levìwo dòmè ò.

¹⁹Ènu kè mì la wɔ̀ na wo, ne woa nɔ̀ àgbè, ne wo mu gbà gogo kɔ̀kɔ̀ɛpea, ne woa ku òa ye nyi be: Arɔ̀n ku èviawo la kplɔ̀ woa dòmètɔ ɖe sia ɖe va yebe èdɔ gbɔ, ɖo ènu kè be la kɔkɔa gbɔ.

²⁰Ekèa la na be wo mu la va kpɔ kɔ̀kɔ̀ɛpea, vitukui ɖe ŋutɔ cã ò. Ne mu nyi nène ò a, wo la ku.”

²¹Tɔhonɔ̀ gblɔ̃ na Mosè be:

²²“Wò la ŋlɔ̀ Gɛrsɔ̀n be jìjimèviwo cã be nyikɔwo ɖo hɛ̃nu ku xòmèwo nu.

²³Wò la hlɛ̃ àmè kèwo keŋu ɖo so èpè ègbã, sɔ yì èkà ci èwoa ji, eye wo ɖo la wɔ̀ woabe èdɔ lè Ègòdodo be gòxɔa mèa.

²⁴Èdɔ kèwo ye la nyi Gɛrsɔ̀n be hɛ̃nu mèviwo tɔ̀ ku ènu kèwo wo la sɔa ye nyi be:

²⁵Woawo ye la kɔkɔ kùŋùtu kèwo wo sɔ tù Nɔ̀pe Kɔ̀kɔ̀ɛ ku Ègòdodo be gòxɔa kudo yebe ènyɔ̃ be àgbàze kùŋùtu kè wo sɔ cɔ̃ ɛ̀a, bɔ̀ ɖo Ègòdodo be gòxɔa be èxɔ̀mɔnuvɔa ŋuti.

²⁶Wo la kɔkɔ gbàjàa ji be èkpa a be àvɔawo cã, èkpa kè trɔ do Nɔ̀pe Kɔ̀kɔ̀ɛ ku vɔsakpea be èmɔnuvɔa, bɔ̀ ɖo woabe èkàwo ku èdɔwɔ̀nu kèwo nyi ènu kèwo keŋu wo sɔ do àsi na Gɛrsɔ̀n be jìjimèviwo ne woa teŋu wɔ̀ woabe èdɔa ŋuti[4].

²⁷Arɔ̀n ku èviawo be kpɔ̀kplɔ gɔ̃mè ye Gɛrsɔ̀n be jìjimèviwo la wɔ̀ woabe èdɔwo keŋu lè, lè èdɔ kèwo wo ɖo la wɔ̀a ku àgbã kè wo la droawo mè. Mì la sɔ ènu kèwo keŋu wo la droa do àsi na wo.

²⁸Ekèa ye nyi èdɔ kè Gɛrsɔ̀n be jìjimèviwo be hɛ̃nuwo la wɔ̀ lè Ègòdodo be gòxɔa mè, lè hũbonɔ Itamàr, Arɔ̀n be èvia gɔ̃mèa.

²⁹Wò la hlɛ̃ Merarì be èviwo ɖo hɛ̃nu ku xòmèwo nu.

³⁰Wò la hlɛ̃ àmè kèwo ɖo so èpè ègbã, sɔ yì èkà ci èwoa ji, eye wo ɖo la wɔ̀dɔ lè Ègòdodo be gòxɔa mèawo.

³¹Èdɔ kè kã woa ye nyi ekèa: wo la nɔ kɔkɔ Nɔ̀pe Kɔ̀kɔ̀ɛ be àtiwo, èxɔ̀gbatiwo, sɔtiwo ku sɔtiwo be àfɔ̀kpawo, eye be la nyi èdɔ kè kpò wo la nɔ wɔ̀a.

³²Wo la gbà nɔ kɔkɔ sɔti kèwo trɔ do gbàjà jia ku woabe àfɔ̀kpawo kudo woabe ègũmètiawo gbàkudo woabe èkàwo, sɔ bɔ̀ ɖo èdɔwɔ̀nuwo keŋu ŋuti. Mì la sɔ ènu kè àmè sia àmè la kɔkɔa, fiɔ ɛ̀.

³³Ekèa ye nyi Merarì be jìjimèviwo be hɛ̃nuwo be èdɔ. Èdɔ kè kpata nyi woa tɔ̀, lè Ègòdodo be gòxɔa mè, lè Itamàr, Arɔ̀n be èvia be kpɔ̀kplɔ gɔ̃mèa ye nyi eŋuã.

³⁴Mosè, Arɔ̀n ku àmèha a be ŋùkɔ̀nɔ̀tɔwo hlɛ̃ Kehàt be èviwo ɖo hɛ̃nuwo ku xòmèwo nu,

³⁵wo hlɛ̃ àmè kèwo keŋu ɖo so èpè ègbã, sɔ yì èkà ci èwo ji, àmè kèwo keŋu ɖo la wɔ̀dɔ lè Ègòdodo be gòxɔa mèa.

³⁶Woabe hɛ̃nuwo mètɔwo be hɛ̃hlɛ̃ mè lè àgbètɔ hotu ɖèka àlɔ̀ adrɛ̃ èkà ci èwo (2750).

³⁷Ekèawo ye nyi Kehàt be jìjimèviwo be hɛ̃nuwo mètɔ kèwo keŋu le wɔ̀dɔ lè Ègòdodo be gòxɔa mè, àmè kèwo ye Mosè ku Arɔ̀n hlɛ̃, ɖo ègbè kè Tɔhonɔ̀ ɖè na wo to Mosè jia nu.

³⁸Gɛrsɔ̀n be jìjimèviwo be hɛ̃hlɛ̃ mè, kè wo hlɛ̃ wo ɖo hɛ̃nuwo ku xòmèwo nua,

³⁹àmè kèwo keŋu ɖo so èpè ègbã sɔ yì èkà ci èwo ji, eye wo ɖo la wɔ̀ èdɔ lè Ègòdodo be gòxɔa mèa,

⁴⁰kè wo hlɛ̃ wo ɖo woabe hɛ̃nuwo ku woabe xòmèwo nua, woabe hɛ̃hlɛ̃ mè lè àgbètɔ hotu ɖèka àlɔ̀ àdɛ̃ takpo ci èwo (2630).

⁴¹Ekèa ye nyi Gɛrsɔ̀n be jìjimèviwo be hɛ̃hlɛ̃ mè, àmè kèwo keŋu wɔ̀nà èdɔ lè Ègòdodo be gòxɔa mè, ekèwo Mosè ku Arɔ̀n hlɛ̃, ɖo Tɔhonɔ̀ be ègbèɖèɖe jia.

⁴²Ekèa ye nyi Merarì be jìjimèviwo, ekè wo hlɛ̃ wo ɖo hɛ̃nuwo ku xòmèwo nua,

⁴³àmè kèwo ɖo so èpè ègbã sɔ yì èpè èkà ci èwoa ji, eye wo ɖo la wɔ̀ èdɔ lè Ègòdodo be gòxɔa mèa,

⁴⁴woabe hɛ̃nu mètɔwo lè àgbètɔ hotu ɖèka àlɔ̀ woèvè (3200).

⁴⁵Ekèa ye nyi Merarì be jìjimèviwo be hɛ̃nuwo be hɛ̃hlɛ̃ mè, ekè Mosè ku Arɔ̀n hlɛ̃ wo, ɖo Tɔhonɔ̀ be ègbè kè be ɖè na wo to Mosè jia.

⁴⁶Levì kèwo kpata Mosè, Arɔ̀n ku Izràɛlviwo be ŋùkɔ̀nɔ̀tɔwo hlɛ̃, ɖo hɛ̃nuwo ku xòmèwo nua,

⁴⁷àmè kèwo keŋu ɖo so èpè ègbã sɔ yì èkà ci èwoa ji, eye wo ɖo la nɔ tù Ègòdodo be gɔ̀xɔa, àlo, la nɔ kɔkɔ ɛ̀a,

⁴⁸woabe hɛ̃hlɛ̃ mè lè àgbètɔ hotu ènè àlɔ̀ àtɔ̃ ci èkà èvè (8580).

⁴⁹Sɔ zɔ̃ ɖo Tɔhonɔ̀ be ègbèɖèɖe ji, eye lè Mosè be kpɔ̀kplɔ nua, wo do èdɔ kè àmè sia àmè la wɔ̀a, àsi na àmè sia àmè, ku ènu kè àmè sia àmè la droa, àsi na wo àmètɔ̀ àmètɔ̀, eye àmè sia àmè ɖo yebe èdɔ kè Tɔhonɔ̀ do àsi na ɛ̀a, to Mosè ji.