Read gen Àmè Hɛ̃hlɛ̃ 6 Bible Online

Àmè Hɛ̃hlɛ̃ 6 - gen bible

Àmè Hɛ̃hlɛ̃ 6

¹Tɔhonɔ̀ gblɔ̃ na Mosè be:

²“Pònupo na Izràɛlviwo, ne wòa gblɔ̃ na wo be: Ne ŋusù ɖe, àlo, nyɔ̃nù ɖe fìã àjɔ̀gbè be yèa kɔ̀ yè ɖokoe ŋuti, la sɔ yè ɖokoe na Tɔhonɔ̀a,

³leke be àmèa mu la nù vɛ̃ ku àhà sɛ̃sɛ̃ ò; mu la nù vɛ̃ sɛ̃sɛ̃ kè wo sɔ vɛ̃ wɔ̀, àlo, vɛ̃ sĩsĩ kè wo sɔ àhà sɛ̃sɛ̃ wɔ̀a ò. Mu la nù vɛ̃ku sɛ̃sɛ̃ bè èsì ɖekpe, eye mu la ɖù vɛ̃ku sɛ̃sɛ̃ mumu, àlo, vɛ̃ku sɛ̃sɛ̃ pupu ò.

⁴Hùenu kè mè keŋu be la kɔ̀ ye ɖokoe ŋuti lèa, mu la ɖù ènu ɖekpe kè wo sɔ vɛ̃ku sɛ̃sɛ̃ wɔ̀, àlo kè wo sɔ vɛ̃ku sɛ̃sɛ̃ be èku wɔ̀, àlo, kè wo sɔ vɛ̃ku sɛ̃sɛ̃ be àkpà wɔ̀a ò.

⁵Hùenu kè mè keŋu be la kɔ̀ ye ɖokoe ŋuti lèa, kàkla mu la jè èta ŋuti na ɛ̀, kaka na gà kè mè yebe àjɔ̀gbè be àzã kèwo be sɔ ye ɖokoe na Tɔhonɔ̀a la sù ò. Ye ŋuti la kɔ̀, eye be la ɖè àsi lè yebe èɖàwo ŋuti, wo la to fàa, lè èta na ɛ̀.

⁶Hùenu kè mè keŋu be la kɔ̀ ye ɖokoe ŋuti na Tɔhonɔ̀a, mu la gogo àmèkuku ò.

⁷Ne e nyi ètɔa, àlo, ènɔaa, ne e nyi nɔ̀via ŋusù, àlo, nɔ̀via nyɔ̃nùa, mu la gogo wo, la sɔ pòɖi ye ɖokoe, ne e va va e mè be woa dòmètɔ ɖe ku cã a, ɖoa, yebe Mawu be àmè ŋutikɔ̀kɔ ye lè èta na ɛ̀.

⁸Hùenu kè mè keŋu be la kɔ̀ ye ɖokoe ŋuti lèa, e ɖo la kɔ̀ na Tɔhonɔ̀.

⁹Ne e va jɔ̀ be àmè ɖe va ku lè àvòmè, lè yebe àxàda mè, sɔ gble èkɔ̀doa, e la plɔ èta, gbè kè gbè wo la gbìgbɔ̀ kɔ̀ e ŋutia. E la plɔ èta, ŋùkèkè adrɛ̃gɔ̃ a gbè,

¹⁰eye, ŋùkèkè ènyigɔ̃a gbèa, e la hɛ̃ peplelu èvè, àlo, àhɔ̃nevi èvè, va na hũbonɔa, lè Ègòdodo be gòxɔa mɔnu.

¹¹Hũbonɔa la sɔ ɖèka savɔ ɖo èvuɛ̃a ta, eye be la sɔ èvègɔ̃a wɔ̀ ènumème vɔsa. E yomè a, hũbonɔa la wɔ̀ èvuɛ̃-sɔkè be èkɔ̀nu na àmèa, ɖo èvuɛ̃ kè àmèa wɔ̀, ɖo àmè kuku ŋua ŋutia. Gbè ŋua gbè kea, wo la kɔ̀ àmèa be èta ŋuti.

¹²Àmèa la gbà sɔ ye ɖokoe do àsi na Tɔhonɔ̀, na hùenu kè ye ŋutɔ na ye ɖokoea, eye be la sɔ àlɛ̃vi kè xɔ̀ èpè ɖèkaa va wɔ̀ ènujràɖo vɔsa. Àzã kèwo be wɔ̀ va yì sãawo ya mu gbà lè e mè ò, ɖoa, èkɔ̀doa gble va yì.”

¹³Èse kè kplɔ̀ àmè kè kɔ̀ ye ɖokoe ŋuti na Tɔhonɔ̀a ye nyi ekèa be: Gbè kè gbè hùenu kè be sɔ ye ɖokoe na Tɔhonɔ̀a la wu e nua, wo la kplɔ̀ ɛ̀ va Ègòdodo be gòxɔa mɔnu,

¹⁴eye be la sɔ yebe ènu nana va na Tɔhonɔ̀: e la sɔ èpè ɖèka be àlɛ̃vi kè ènu ɖekpe mu wɔ̀ àfi ɖe na ò a wɔ̀ ènumème vɔsa, èpè ɖèka be àlɛ̃nɔvi kè ènu ɖekpe mu wɔ̀ àfi ɖe na ò a savɔ ɖo nuvuɛ̃ ta, e la gbà sɔ àgbò kè ènu ɖekpe mu wɔ̀ àfi ɖe na ò a, wɔ̀ ŋuti fàfa be vɔsa.

¹⁵Sɔ kpe ekèa, e la gbà sɔ kpɔ̃nɔ àkpiti kè wo sɔ èwɔ meme wɔ̀a, àjàfi ɖèka, klàko kè wo mlì ku àmìa, àcɔ̃mɔ̀ àkpiti kè ji wo kɔ̀ àmì ɖoa ku ènu nana kudo èsìkɔ̀ɖɛ kè hiãa.

¹⁶Hũbonɔa la sɔ wo va Tɔhonɔ̀ be ŋùmè, la sɔ savɔ ɖo yebe èvuɛ̃ ta, eye be la wɔ̀ ènumème vɔsa.

¹⁷Hũbonɔa la sɔ àgbòa wɔ̀ ŋuti fàfa vɔsa na Tɔhonɔ̀ ku kpɔ̃nɔ àkpiti be àjàfia. Hũbonɔa la wɔ̀ vɔsa ku èsìkɔ̀ɖɛ kè jè a.

¹⁸Àmè kè sɔ ye ɖokoe na Tɔhonɔ̀a la plɔ yebe èta kè ŋuti wo kɔ̀a, lè Ègòdodo be gòxɔa mɔnu, e la lɔ èɖà kè wo plɔ lè yebe èta kè ŋuti wo kɔ̀a, sɔ kɔ̀ ɖo èzò kè le bì lè ŋuti fàfa vɔsaa gɔ̃mèa mè.

¹⁹Ne àgbòa be àbɔta a bia, hũbonɔa la sɔ ɛ̀, la sɔ klàko àkpiti ɖèka ku àcɔ̃mɔ̀ àkpiti ɖèka, lè àjàfia mè, do àlɔ̀ mè na àmè kè sɔ ye ɖokoe na Tɔhonɔ̀a, wàlɛbɛ kè be ɖè leke be jèsìdoa jo lè èta vɔ̀a.

²⁰Hũbonɔa la sɔ woawo keŋu ɖo Tɔhonɔ̀ be ŋùmè ku èkɔ̀nu jèsìdo kè wo sɔ wɔ̀nà ɛ̀a, èkɔ̀nu kɔ̀kɔ̀ɛ ŋutɔ be nyi na hũbonɔa, bɔ̀ ɖo vɔsaa be àkɔta kè be la sɔ ɖo Tɔhonɔ̀ be ŋùmè a ku àta kè be la ɖèa ŋuti. Lè èkɔ̀nu kèa yomè a, àmè kè sɔ ye ɖokoe kã àtãŋu, sɔ kè Tɔhonɔ̀a teŋu nù vɛ̃ fàa.

²¹Ekèa ye nyi èse na àmè kè sɔ ye ɖokoe kã àtãŋu, sɔ kè Tɔhonɔ̀a. Ènu kèawo ye nyi ènu nana kèwo be la sɔ savɔ na Tɔhonɔ̀, ɖo èdɔ kèwo be xɔ̀awo ta, eye mi mu la gblɔ̃ àlè mà nya gblɔ̃ kèwo ye la to so e mè na ɛ̀, kpe ɖo woa ŋutia ò[7]. E la zɔ̃ ɖo àtãŋu kè be kã, wàlɛbɛ kè be sɔ ye ɖokoe do àsi na Tɔhonɔ̀a ji.”

²²Tɔhonɔ̀ gblɔ̃ na Mosè be:

²³“Pò nupo ku Arɔ̀n ku yebe ŋusùviwo, ne wòa gblɔ̃ na wo be: Ènyà kèwo mì la sɔ nɔ tusì na Izràɛlviwoa ye nyi ekèawo:

²⁴“Tɔhonɔ̀ ne tusì na wò, eye ne kpɔ ji wò!

²⁵Tɔhonɔ̀ ne kɔ̀ yebe ŋùmè, sɔ kpɔ wò, ne bèa na wò yebe màje!

²⁶Tɔhonɔ̀ ne trɔ yebe ŋùmè nyuɛ̃a ɖo ɖa, ne bèa na wò yebe ŋuti fàfa!”

²⁷Nène a ye wo la sɔ nyikɔ nyè ɖo Izràɛlviwo ŋuti, eye ènyè ya, mù la tusì na wo.”