Read gen Àmè Hɛ̃hlɛ̃ 8 Bible Online

Àmè Hɛ̃hlɛ̃ 8 - gen bible

Àmè Hɛ̃hlɛ̃ 8

¹Tɔhonɔ̀ gblɔ̃ na Mosè be:

²“Pònupo na Arɔ̀n, ne wòa gblɔ̃ na ɛ̀ be: Ne wò sũ kãligbɛ̃awo a, kãligbɛ̃ adrɛ̃awo ɖo la kɔ̀ kãligbɛ̃-tia be ŋùkɔ̀.”

³Ɖoɖo kèa ji ye Arɔ̀n zɔ̃ ɖo: E sũ kãligbɛ̃awo, eye kãligbɛ̃awo le kɔ̀ ɖoɖa ŋùkɔ̀gbe, ɖo leke Tɔhonɔ̀ ɖo è na ɛ̀, to Mosè jia nu.

⁴Àlekè wo wɔ̀ kãligbɛ̃tia ye nyi ekèa: wo tù ì ku sìka, wo tù ì so gɔ̃mèa, kaka va ɖo àfi kè be vũ lèa. Wo wɔ̀ ɛ̀ ɖo ènu kè be tata Tɔhonɔ̀ sɔ fiɔ Mosè a ji.

⁵Tɔhonɔ̀ gblɔ̃ na Mosè be:

⁶Sɔ Levìwo lè Izràɛlviwo dòmè, ne wòa wɔ̀ wo kɔ̀kɔɛɖe.

⁷Ènu kè wò la wɔ̀ na wo, la sɔ kɔ̀ woa ŋutia ye nyi ekèa: Wu èsì kɔ̀kɔ̀ɛ ɖo woa ŋuti; wo ne plɔ woabe èfuwo keŋu-keŋu; wo ne nyà woabe àwùwo, eye woa lè woa ɖokoewo ɖì.

⁸Wo la sɔ ènyì-su ɖèka ku vɔsa be èwɔ kè hiãa, wo la blù ì ku àmì. E yomè a, wò la sɔ ènyì-su bu, sɔ savɔ ɖo ènuvuɛ̃ ta.

⁹Wò la na Levìwo la dɔ̃ va Ègòdodo be gòxɔa nu, eye wò la bɔ̀ Izràɛl be àmèha a keŋu.

¹⁰Wò la na Levìawo la dɔ̃ va Tɔhonɔ̀ be ŋùkɔ̀, eye Izràɛlviwo la ɖo àlɔ̀ woa ji.

¹¹Ekèa yomè a, Arɔ̀n la sɔ Levìawo ɖo Tɔhonɔ̀ be ŋùmè, sìgbè lekè Izràɛlviwo sɔna vɔsa nana Tɔhonɔ̀a nène. Woabe èdɔ do àsi ye nyi be wo la nɔ wɔ̀ Tɔhonɔ̀ be sɛ̃sɛ̃dɔ.

¹²Levìawo la dà àlɔ̀ ɖo ènyì-suawo be èta ji. Wò la sɔ ènyì-suawo savɔ na Tɔhonɔ̀. Ɖèka la nyi vɔsa ɖo ènuvuɛ̃ ta, èvègɔ̃a la nyi ènumème vɔsa, ɖo Levìawo ta, nuvuɛ̃ sɔsɔkè.

¹³Wò la sɔ Levìawo ɖo Arɔ̀n ku yebe ŋusùviwo be ŋùkɔ̀, eye wò la sɔ wo do àsi na Tɔhonɔ̀, sìgbè lekè wo sɔna vɔsa nana Tɔhonɔ̀a nène.

¹⁴Nène a ye wò la ɖè Levìawo ɖo vò lè Izràɛlviwo dòmè, eye wo la nyi tɔ̀ nyè.

¹⁵Ekèa yomè a, Levìawo la va sumɔ lè Ègòdodo be gòxɔa mè. Ekèa ŋuti wò la kɔ̀ woa ŋuti, ne wòa sɔ wo na sìgbè vɔsa na Tɔhonɔ̀ nène.

¹⁶Ɖoa, kè wo sɔ wo na mùa, wo trɔ zũ tɔ̀ nyè blibo, lè Izràɛlviwo dòmè. Mù sɔ wo ɖo ŋùkɔ̀gbeviwo kpata tèpe, kè le nyi be wo dɔ̀lì èvi kèwo keŋu hũ àdɔ̀ na woa nɔ̀wo lè Izràɛlviwo dòmèa.

¹⁷Ɖoa, Izràɛl ŋusùvi cucugbã ɖe sia ɖe nyi tɔ̀ nyè, àgbètɔwo cã, èlãwo cã. Gbè kè gbè mù wù ŋùkɔ̀gbeviwo keŋu lè Ejiptè-nyigbã jia, mù sɔ wo keŋu sɔ wɔ̀ tɔ̀ nyè.

¹⁸Vɔ̀a, mù sɔ Levìwo sɔ ɖɔ̀lì Izràɛlviwo be ŋùkɔ̀gbe ŋusùviwo kpata,

¹⁹eye mù sɔ wo le do àsi na Arɔ̀n ku yebe ŋusùviwo; lè Izràɛl be ŋusùviwo dòmèa, mù sɔ Levìwo na Arɔ̀n ku yebe ŋusùviwo, ne woa nɔ wɔ̀ Izràɛlviwo be sɛ̃sɛ̃dɔ lè Ègòdodo be gòxɔa mè, ne woa nɔ wɔ̀ èkɔ̀nu na sɔsɔkè. Ekèa la na be Izràɛlviwo mu la va dɔ̃ gogo kɔ̀kɔ̀ɛpea, ne jɔ̀gbèvuɛ̃ ɖe mu gbà va jɔ̀ ɖo woa ji ò.”

²⁰Mosè ku Arɔ̀n kudo Izràɛlviwo be àmèha a kpata wɔ̀ ènu kèwo keŋu Tɔhonɔ̀ ɖo na wo, so Levìwo ŋutia. Izràɛlviwo wɔ̀ ènu kèwo tututu Tɔhonɔ̀ ɖo na Mosè, be wo ne wɔ̀ na Levìwoa.

²¹Levìawo lè woa ɖokoewo ɖì, eye wo nyà woabe àwùwo. Arɔ̀n sɔ wo na Tɔhonɔ̀, sìgbè vɔsa nène, eye be wɔ̀ èvuɛ̃ sɔsɔkè be èkɔ̀nu na wo, sɔ kɔ̀ woa ŋuti.

²²Ekèa yomè a, Levìawo yì jè woabe èdɔwo gɔ̃mè, lè Ègòdodo be gòxɔa mè, lè Arɔ̀n ku yebe ŋusùviwo be ŋùku mè. Lekea, ènu kèwo keŋu Tɔhonɔ̀ do àsi na Mosè be wo ne wɔ̀ na Levìwoa ye wo wɔ̀ na wo.

²³Tɔhonɔ̀ gblɔ̃ na Mosè be:

²⁴“Levìwo be ɖoɖowo ye nyi ekèawo: So èpè wìvɔàtɔ̃ jia, Levì ɖe sia ɖe ɖo la wɔ̀ yebe èdɔ do àsi, lè Ègòdodo be gòxɔa mè.

²⁵Ne e ɖo èpè èkà ci èwoa, Levìa be èdɔ do àsia nu la sò. Èdɔa mu la gbà nyi èjizĩzĩ na ɛ̀ ò.

²⁶Vɔ̀a, e la nɔ do àlɔ̀ nɔ̀viawo lè èdɔ vòvòvòwo mè lè Ègòdodo be Gòxɔa mè. Wo mu la gbà zĩ e ji na èdɔa ò. Lekea ye wò la wɔ̀ na Levìwo be èdɔa.”