Read gen Àmè Hɛ̃hlɛ̃ 9 Bible Online

Àmè Hɛ̃hlɛ̃ 9 - gen bible

Àmè Hɛ̃hlɛ̃ 9

¹Èpè èvè yomè, kè Izràɛlviwo to lè Ejiptè-nyigbã ji vɔ̀a, wètri cucugbãa mèa, Tɔhonɔ̀ pò nupo na Mosè, lè Sinaì be zògbè a ji. E gblɔ̃ na ɛ̀ be:

²“Àzã kè mù la ɖoa ji ye Izràɛlviwo la nɔ ɖù Toŋutivayì be àzãa lè.

³Mì la nɔ ɖù àzã kèa, lè wètri kèa be ŋùkèkè woènègɔ̃a gbè, lè fìɛ̃si mè. Ne mì le ɖù àzã kèa, mì la nɔ zɔ̃ ɖo Toŋutivayì be ɖoɖowo ku yebe èkɔ̀nuwo ji tututu.”

⁴Ekèa yomè a, Mosè ɖè ègbè na Izràɛlviwo be wo ne ɖù Toŋutivayì be àzãa.

⁵Wo ɖù àzãa lè Sinaì be zògbè a ji, lè wètri cucugbãa be ŋùkèkè woènègɔ̃a gbè[8]. Izràɛlviwo zɔ̃ ɖo ènu kè tututu Tɔhonɔ̀ ɖo na Mosè a ji.

⁶Hùe ŋua nua, ŋusù ɖewo ŋuti mu kɔ̀ ò, ɖoa, wo tɔ àsi àmèkuku. Ekè wo mu la teŋu ɖù Toŋutivayì be àzãa, gbè ŋua gbè ò a, wo yì kpɔ Mosè ku Arɔ̀n, gbè ŋua gbè ke.

⁷Wo gblɔ̃ na Mosè ku Arɔ̀n be: “Mia ŋuti mu kɔ̀ ò, ɖoa, mi tɔ àsi àmèkuku. Ekèa ŋuti ye mi mu la teŋu sɔ miabe vɔsa va na Tɔhonɔ̀ ku Izràɛlvi kpɔ̀tɛawo ò.”

⁸Mosè gblɔ̃ na wo be: “Mì nɔ̀tè, ne ma sè ɖoɖo kè Tɔhonɔ̀ la wɔ̀ so mìa ŋutia ɖa.”

⁹Tɔhonɔ̀ ɖo e ŋuti na Mosè be:

¹⁰“Pònupo na Izràɛlviwo, ne wòa gblɔ̃ na wo be: Ne ŋusù ɖe tɔ àsi àmèkuku, eye yebe ŋuti mu kɔ̀ ò, àlo, e yì èmɔ dìdi ɖe jia, e la ɖù Toŋutivayì be àzãa, la sɔ kafu Tɔhonɔ̀. Ènyà kèa kã mìawo ŋutɔwo ku mìabe jìjimèviwo keŋu.

¹¹Vɔ̀a, wètri èvègɔ̃a be ŋùkèkè woènègɔ̃a gbè ye wo la ɖù ì, lè fìɛ̃si mè. Wo la ɖù Toŋutivayì be àlɛ̃via ku kpɔ̃nɔ àkpiti kudo ègbe vevewo.

¹²Wo mu la gble èɖe ɖɛ, èŋù la kè do è ò; wo mu la gbã àlɛ̃via be èpu cã ò; wo la zɔ̃ ɖo Toŋutivayì be àzãa be èkɔ̀nuwo ji tututu.

¹³Vɔ̀, ne ŋusù ɖe kè be ŋuti kɔ̀, eye mu yì èmɔ ji ò, mu wɔ̀ ɖo Toŋutivayì be àzãɖùɖu-kɔ̀nuawo ji ò a, wo la crɔ̃ àmè kèa lè yebe xòmèa dòmè. Kè e nyi be ŋusù kèa mu sɔ yebe vɔsa va na Tɔhonɔ̀, ɖo àzã kè wo cã ɖɛa ji ò a, ŋusù kèa la nɔ̀ èvuɛ̃ kè be wɔ̀a nu.

¹⁴Ne àmèjro ɖe, kè lè mìa dòmèa le ɖù Toŋutivayì be àzãa, sɔ le kafu Tɔhonɔ̀a, àmèjro kèa la zɔ̃ ɖo Toŋutivayì be èkɔ̀nuwo ku ɖoɖowo ji. Èkɔ̀nu ɖèka ji ye mìawo cã ku àmèjro kè lè mìabe èdùa mèa cã, mì la zɔ̃ ɖo.”

¹⁵Gbè kè gbè wo tù Nɔ̀pe Kɔ̀kɔ̀ɛ, lilikpo bablaa[9] va cɔ̃ Zòɖùɖu-Ɖakà a be gòxɔa. Fìɛ̃si mèa, e nɔ̀ sìgbè èzò nène, kaka na ŋùdekɛ̃nyɛ mè.

¹⁶So gbè ŋua gbèa, nènea ye be nyi gbè sia gbè; lilia cɔ̃na Nɔ̀pe Kɔ̀kɔ̀ɛ, eye, èzã mèa, e nɔ̀nà sìgbè èzò nène.

¹⁷Ne lilia gbe kɔ yì èji lè gòxɔ tamè kpòa, Izràɛlviwo hɔ̃nà jo, zè ɖèka; eye, ne lilia gbà ɖiɖi va àfi ɖe a, funua ye Izràɛlviwo dona àsàɖa ɖo.

¹⁸Ne Tɔhonɔ̀ ɖè ègbèa, Izràɛlviwo hɔ̃nà woabe àsàɖaa jo, eye, ne Tɔhonɔ̀ gbà ɖè ègbèa, wo gbà dona àsàɖa. Wo nɔ̀nà funua, kaka na gà kè mè lilia la nɔ̀ Nɔ̀pe Kɔ̀kɔ̀ɛ tamèa.

¹⁹Ne lilia nɔ̀ Nɔ̀pe Kɔ̀kɔ̀ɛ tamè, dìdì ɖe, eye be wɔ̀ ŋùkèkè sùgbɔa, Izràɛlviwo yìnà Tɔhonɔ̀ be sùmɔ̀ sumɔ be èdɔa ji, ɖona èto Tɔhonɔ̀, eye wo mu jona ò.

²⁰Gà ɖewo mèa, ŋùkèkè ɖewo kpò lilia wɔ̀nà lè Nɔ̀pe Kɔ̀kɔ̀ɛ tamè. Ne Tɔhonɔ̀ gbe ɖè ègbè kpòa, Izràɛlviwo dona àsàɖaa, eye ne Tɔhonɔ̀ gbà ɖè ègbè kpòa, Izràɛlviwo gbà hɔ̃nà jo.

²¹E vana e mè be, lilia nɔ̀nà ànyi, so fìɛ̃si, yì ŋùdekɛ̃nyɛ mè. Ne lilia gbe hɔ̃ ŋùdekɛ̃nyɛ mè kpòa, Izràɛlviwo hɔ̃nà jo. Àlo, lilia nɔ̀nà ànyi ŋùkèkè ɖèka ku èzã ɖèka. Ne lilia gbe hɔ̃ kpòa, Izràɛlviwo hɔ̃nà jo.

²²Ne lilia ci Nɔ̀pe Kɔ̀kɔ̀ɛ ji ŋùkèkè èvè, wètri ɖèka, àlo e nɔ̀ funua dìdi ɖe a, Izràɛlviwo nɔ̀nà funua, wo mu hɔ̃nà woabe àsàɖaa jo ò. Vɔ̀, ne lilia gbe hɔ̃ yì èji kpòa, Izràɛlviwo hɔ̃nà jo.

²³Tɔhonɔ̀ ye ɖènà ègbè na Izràɛlviwo, eye wo dona àsàɖa; Tɔhonɔ̀ ye ɖènà ègbè na Izràɛlviwo, eye wo hɔ̃nà woabe àsàɖaa jo. Wo wɔ̀nà Tɔhonɔ̀ be sùmɔ̀ sumɔ be èdɔa, ɖo ègbè kè Tɔhonɔ̀ ɖo na wo, to Mosè jia nu.