Read gen Mikà 1 Bible Online

Mikà 1 - gen bible

Mikà 1

¹Tɔhonɔ̀ be ènyà ɖì na Mikà kè so Mɔ̀rasɛtì, lè Yudà be èfìɔ Yotàm, Àkaz kudo Ezekìas be hùenu. Ènyàa kù ɖo Sàmarìa kudo Yèruzàlɛm ŋuti.

²Dùkɔ̃wo mì ɖo èto. Ànyigbã kudo ènu kèwo lè e jia, mì sè! Tɔhonɔ̀ Mawu la dohùɛ do mì so kaka yebe Nɔ̀pe Kɔ̀kɔ̀ɛ.

³Ɛ̃ɛ, Kpɔɖa Tɔhonɔ̀ to so yebe Nɔ̀pe Kɔ̀kɔ̀ɛ ɖiɖi gbãnà. E le zɔ̃ to ànyigbã be ètowo tamè.

⁴Ètowo le ɖiɖi jè e mè lè yebe àfɔ̀wo gɔ̃mè. Bàlìwo le srè sìgbè vɛlɛ̀ kè yì èzò gbɔa nène, le srà sìgbè àlekè èsì srànà lè bàlì mèa nène.

⁵Ekèawo kpata le so Yakɔb be àxuedo a be àglajèje kudo Izràɛlviwo be ègbèji mà-nɔ gbɔ. Vɔ̀ àmè kɛ ye kplɔ̀ Izràɛl do àglajèje kèa mè ò? Mu nyi Sàmarìa ye à? Àmè kɛ ye kplɔ̀ Yudà ɖo mà-kɔ̀ mà-kɔ nyinyi mè ò? Mu nyi Yèruzàlɛm ye à?

⁶Tɔhonɔ̀ gblɔ̃ be: “Mù la trɔ Sàmarìa be èdùa wɔ̀ ànyigbã puplu eye wo la dè vɛ̃-gble ɖo e ji. Mù la mlì yebe èglìwo yì ɖo kaka bàlì mè eye mù la na yebe dodoewo la ze glãlã.

⁷Mù la gbã yebe legbawo gudu-gudu eye mù la lɔ yebe ènu nɔ̀amèsiwo kɔ̀ ɖo èzò mè. Mù la kãkã yebe vòdu kudo àtikpàkpawo. Ɖo yebe mà-kɔ̀ mà-kɔ nyinyi ŋuti e kpɔ ènu kèawo keŋu be àlè. Eye ekèawo la gbà na mà-kɔ̀ mà-kɔ la gbà yì e ji kpe è.

⁸Eŋuã, mù la làmɔɛ̃, la do hèhè. Mù la to àma-àma, la zɔ̃ àfɔ̀ gbalo. Mù la do àpa sìgbè ègbevũwo nène. Mù la fã sìgbè tatabòliwo nène.

⁹Nyàwo be nyi be ènu kè le wɔ̀ Sàmarìa, mu la vɔ̀ ò. Ènu kèa to Yudà kaka yì kɔ̀ ɖo Yèruzàlɛm be èmɔ̃nu tututu. Èdù kè mè àpe dùkɔ̃ lèa.

¹⁰Mì mu gbà gblɔ̃ lè Gat kaka la fã àvi ò. Mì lòfũ, ne mìa blìbɔ̀ àfi mè lè Bɛt-Lèafrà.

¹¹Mì Sàfirò be àmèwo, mì nɔ̀ àma-àma ku ŋùkpɛ̃ ne mìa si àhùa. Sèvetanàn be àmè ɖe mu gbà xà to lè èdùa mè ò. Wo ne fã àvi lè Bɛ̀t-Esɛ̀l be èdùa mè kaka wo mu gbà nya fikè wo la sɔ èta dà ɖo ò.

¹²Màrɔtè be èdùmètɔwo le vɔ̃ na woabe nyɔna. Nyàwoa, Tɔhonɔ̀ be àdɔ̀mèzea va kɔ̀ ɖo Yèruzàlɛm be èmɔ̃nu.

¹³Làkistɔwo, mì bla àkpà na mìabe èsɔwo. Ɖo mìa cã mì kplɔ̀ Izràɛl be mà-kɔ̀ mà-kɔ do eye mì kplɔ̀ Yèruzàlɛm do lè àglajèje mè.

¹⁴Ekèa ŋuti ye mì ɖo la klã jo lè Mɔresɛ̀t-Gatviwo ŋuti. Vɔ̀ Àkzib be èdùa ya la trɔ zũ ŋùɖo mà-ɖo ètù ɖe kpò na Izràɛl be èfìɔwo.

¹⁵Ɛ̃ɛ, mù la na ye wo la gbà va xɔ̀ mìabe èdù Màrɛsà. Izràɛl be àhùaga gãgãwo la yì si wla ɖo Adulàm be àkpãdowo mè.

¹⁶Yèruzàlɛmtɔwo, mì yì kpà èɖà. Mì plɔ ètaa ne mìabe èta ne nɔ̀ koli koli sìgbè àklàsu tɔ̀ nène. Mì fã mìabe èvi ɖèvewo, ɖo wo la kplɔ̀ wo àhùale jo lè mìa gbɔ yì èdù mà-sɔɛwo mè.