Read gen Mikà 5 Bible Online

Mikà 5 - gen bible

Mikà 5

¹Tɔhonɔ̀ gblɔ̃ be: “Èwò Bɛtlɛhɛ̀m, èwò ye nyi èdù kè hùe glo lè Yudà be èdùwo kpata dòmè. Vɔ̀ èwò mè ye mù jro la ɖè àmè kè la kplɔ̀ Izràɛl lè àpe nyikɔ mèa so. Àmè kèa be jɔ̀jɔmè lè so gbèɖegbè ke.”

²Ekèa ŋuti ye Tɔhonɔ̀ ɖè àsi lè woa ŋuti kaka va na wàlɛbɛ kè ye wo la jì àmè kè wo ɖo la jìa. Àmè kèwo nyi àhùalewo la trɔ gbɔ̀ va Izràɛlviwo dòmè.

³E ye la nyi èfìɔvi ɖè ɖovò, kè la kplɔ̀ dùkɔ̃a kudo ŋusɛ̃ lè Tɔhonɔ̀, yebe Mawu be gogo mè. Àmèwo kpata la nɔ̀ ŋuti fàfa mè lè èdùa mè ɖo yebe gãnyinyia la yì ànyigbã a be nukpòpewo kpata.

⁴E ye la hɛ̃ ŋuti fàfaa va. “Ne Àsirìatɔwo va la hlà miabe ànyigbã a eye wo gɛ̃ ɖo miabe fìɔsawo mèa, mi la ɖo àhùaga sùgbɔ na wo.

⁵Wo la sɔ woabe àhùawɔ̀nuwo ɖè ŋusɛ̃ fiɔ Àsirìa be ànyigbã kè nyi Nemrɔ̀d be èdùa.” “Àhùaga ɖè ɖovòa ye la ɖè mi to lè Àsirìatɔwo simè ne wo gɛ̃ ɖo miabe ànyigbã jia eye wo xa miabe èdùa.”

⁶Izràɛl be àmè kèwo la ci àgbè lè dùkɔ̃wo dòmèa, la nɔ̀ sìgbè fɔ̃fɔ̃mè be àhũjàja kè Tɔhonɔ̀ wu ɖoɖaa, sìgbè èji kè jà, kɔ̀ ɖo ègbe ji eye mu biɔ ènu ɖe so àmè ɖe si kaka la kù ɖo àmè ɖe ŋuti ò nène.

⁷Àmè kèwo ci àgbè kèawo la ɖo ŋusɛ̃ sìgbè jãŋùta tɔ̀ nène lè ègbemèlãwo dòmè. Wo la nɔ̀ sìgbè jãŋùtavi kè ɖo àlɛ̃haa dòmè nène. Àfi ɖekpe kè e ɖoa, e la trɛ̃ èlã kè e lea eye àmè ɖekpe mu la teŋu xɔ̀ ɛ̀ lè e si ò.

⁸Ɛ̃ɛ, Tɔhonɔ̀ la sitè ɖo kɛ̃tɔ wòwo ŋuti eye e la flì wo!

⁹Tɔhonɔ̀ gblɔ̃ be: “Ŋùkèkè ɖe gbãnà, kè ji mù la crɔ̃ mìabe èsɔwo lè. Mù la na mìabe àhùakèkeviwo la bu keŋu-keŋu.

¹⁰Mù la gùdù mìabe èdùwo. Mù la gbã mìabe àgbògbòwo.

¹¹Mù la na mìabe kpajijewo la tɔtè. Wo mu la gbà kpɔ àmè kè kùnà ènu mè so ènukɛ̃klɛ̃wo ŋutia dòmètɔ ɖekpe lè mìa dòmè ò.

¹²Mù la gùdù mìabe legbaviwo kudo vòduwo. Eye mì mu la gbà sɛ̃ ènu kèwo mì sɔ mìabe àlɔ̀wo wɔ̀a ò.

¹³Mù la mù vòdu-tikpo kèwo mì li ɖotèa kpata, eye mù la crɔ̃ àpo èdùawo.

¹⁴E yomè a, àdɔ̀mèze nyèa la ɖùɖù ŋutɔ. Mù la ɖo e tèpe na dùkɔ̃ kèwo mu wɔ̀ ɖo àpe ègbèɖèɖe ji òa.”