Read gen Mikà 6 Bible Online

Mikà 6 - gen bible

Mikà 6

¹Mì ɖoto ènu kè Tɔhonɔ̀ gblɔ̃a be: “Yì ɖokòjo sɔ hlùɛ̃ mù lè ètowo kudo ètokɔ̃ɛwo be ŋùkɔ̀. Ɖè àpe susu fiɔ.”

²Mìa ètowo kudo ànyigbã be dodoewo, mì ɖoto ne mìa sè, Tɔhonɔ̀ le ɖokòjo kudo yebe dùkɔ̃a. Ɛ̃ɛ, Tɔhonɔ̀ le ɖo kòjo kudo yebe dùkɔ̃a, e le biɔ Izràɛl àkɔ̃ŋùta.

³E gblɔ̃ na ɛ̀ be: “Dùkɔ̃ nyè, nukɛ ye mù wɔ̀ na wò ò? Nukɛ mè ye mù donupo na wò lè ò? Ɖoeŋuti na mù!

⁴Yɔ̀ɔ! Mù ɖè wò to lè Ejiptè. Mù tu wò èkà lè kluvi nyinyi si. Mù na wò kplɔ̀tɔwo sìgbè Mosè, Arɔ̀n kudo woa nɔ̀vi nyɔ̃nù Mirìam. Eŋuã ye mu jɔ̀jì na wò òa?

⁵Dùkɔ̃ nyè, ɖo ŋùku e ji be Mòab be èfìɔ Bàlak ji ŋutɔ cã be yèa wɔ̀ funyafunya kudo wò. Ɖoŋù ènyà kè Beɔ̀r be èvi Bàlam ɖo e ŋuti na ɛ̀a. E yomè a, mù kplɔ̀ wò to Citìm va kaka Gilgàl. Wò ŋutɔ wò kpɔ ènu jɔ̀ àsu kèwo ènyè Tɔhonɔ̀, mù wɔ̀ na wòa.”

⁶Wò gblɔ̃nà be: “Nukɛ ye mù la na ne mù jèklò lè Tɔhonɔ̀, Mawu kè lè èji hũia be ŋùkɔ̀ ò? Ènyìsuviwo ye mù la na ne woa sɔ wo wɔ̀ ènumème vɔsaa?

⁷Àlo, Tɔhonɔ̀ le ji àgbò hotu hotu kudo àmì kplikpã hotu hotuwoa? Àlo mù la sɔ ŋusùvi cucugbã nyèa sɔ savɔ na ɛ̀ ne bèa sɔ èvuɛ̃ kudo ègbèjimà-nɔ nyèawo sɔ kè mù a?”

⁸Tɔhonɔ̀ le ji be wòa nya ènu kè nyi ènyuɛ̃a. Ènu kè be le biɔ àmè ɖekpekpe àmèa ye nyi be: “Wɔ̀ ènu jɔ̀jɔɛ, lɔ̃ àdɔ̀mè nyuɛ̃ wɔ̀wɔ eye wòa nɔ̀ àgbè kudo àpo Mawu lè àmè ɖokoe bɔ̀bɔ mè.”

⁹Tɔhonɔ̀ le pò nupo na dùkɔ̃a. E la hlùɛ̃ àmè kèwo ye sènà ègbè na ɛ̀a. “Mì ɖoto, mìa Yudà be kɔ̀ta mètɔwo, mìa àmè kèwo keŋu bɔ̀ lè èdùa mèa!

¹⁰Lè àmè bàɖà be àxomèa, wo kpɔna àdɔ̀kùnɔ̀ kèwo wo xɔ̀ to èmɔ̃ bàɖàwo jia kòkòkò. Wo gbà zãna jijenu kèwo mu sɔ̀gbè òa cã. Ènu bàɖà ke ye nyi ekèa. Mù la teŋu bɔ̀ ènu ɖo ekèa jia?

¹¹Àmè ɖewo le zã èfĩ jijenuwo eye wo sɔna suŋubui dànu kèwo mu sɔ̀gbè òa, sɔ dona sìkelìa[1]mè. Mù la kpɔ wo be wo mu nya òa?

¹²Èdùa mè be ècitɔwo kpɔ̀tɔ̀ le tafu wɔ̀amènɔ̀wo Èdùamètɔwo nyi àjèɖàtɔwo. Ne wo kè ènua, àjèɖàɖa be ènyà sɔ̃ŋu ye tona so woabe ènuwo mè.

¹³Ekèa ŋuti ye mù tɔ wo pòpo, do wo èdɔ̀. Mù la crɔ̃ wo ɖo woabe èvuɛ̃wo ŋuti.

¹⁴Wo la ɖù ènu co wo mu la ɖɔpò kpɔ ò. Wo la ɖɔ ènu kè nyi àdɔ̀wùamèa kpɔ. Wo la bɔ̀ ènuɖùɖu ɖɛ zãŋù co e la gble keŋu-keŋu. Eye ne mì teŋu wɔ̀ eye èɖewo mu gble òa, mù la crɔ̃ wo to àhùa wɔ̀wɔ mè.

¹⁵Wo la do ènu, co wo mu la yà ɖekpe ò. Wo la fiɔ̃ àmì, co wo mu la teŋu zã àmì kèa ò. Wo la fiɔ̃ vɛ̃ kusɛ̃sɛ̃, co wo mu la nù vɛ̃ kèa ò.

¹⁶Wo le èfìɔ Ɔmrì ku èvia Àkab kudo yebe àxuedo a be èdɛ̃ vuɛ̃ a ɖo àsi. Wo kplɔ̀ woabe wɔ̀nàawo do. Nène a, mù la kò mì, àmè kèwo lè èdùa mèa. Eye dùkɔ̃ nyèa be ŋùkpɛ̃a la trɔ va mìa ji.”