Read gen Mikà 7 Bible Online

Mikà 7 - gen bible

Mikà 7

¹Oò, bàɖà kɛ ye zɛ̃ àxue na mù leke ò! Mù lè sìgbè àmè kè to wàlɛbɛ kè wo yà ènukuwo vɔ̀a nène. Sìgbè àmè kè to yì le ji vɛ̃ kusɛ̃sɛ̃ wàlɛbɛ kè kusɛ̃sɛ̃ ɖìɖi ɖekpe mu lè òa nène. Nyè mu kpɔ vɛ̃ be èkpò ɖèka tètè, kaka la kpɔ vòti kusɛ̃sɛ̃ yeye kè jɔ̀nàjì na mù ŋutɔ cã ò!

²Mawu be àmèwo bu lè èdùa mè. Àmè wɔ̀ ànùkua ɖekpe mu gbà lè ò. Àmè sia àmè le ji èmɔ̃nu ne bèa do àmè èku. Eye àmè sia àmè le tre èmɔ̃ na nɔ̀via.

³Wo wɔ̀nà ènu drã mà kpɔ ŋùgbe. Woabe ègawo biɔna èfɛ̃tu ne woabe èdɔwo. Kòjoɖotɔwo biɔna àjɔ̀. Dùmèmègãwo gblɔ̃nà ènu kè wo la sɔ na woa zè ɖèka. Wo ɖona ègbè èdu sɔ wɔ̀nà woabe ènu dakàwo.

⁴Àmè kè kã ɖo e mè lè woa dòmèa lè sìgbè àŋùja kè wo bɔ̀a nène, gbà nyrã wu àklãŋùti be àve ŋutɔ cã. Kpɔɖa, mìabe ètodɔ̃ be ŋùkèkèa va ɖo. Mìabe ŋùkɔ̀nɔ̀tɔwo kudo gblɔ̃ɖɛtɔwo gblɔ̃ ɛ̀ va yì. Eye fifìa mì ci jojojoe, le vɔ̃.

⁵Mì mu gbà kã ɖo mìa xlɔ̃ ɖe ji ò. Mì kpɔ nyuɛ̃ ɖe! Mì mu gbà pò nupo kaka la pò lè mìa srɔ̃ ŋutɔ cã gbɔ ò.

⁶Ɖo èvi ŋusù le zũ ètɔa, èvi nyɔ̃nù le sitè ɖo ènɔa ŋuti. Lɔ̃xoyɔvi nyɔ̃nù le sitè ɖo lɔ̃xoa ŋuti. Àmè ŋutɔ be àxuedo le nyi yebe kɛ̃tɔ.

⁷Vɔ̀ ènyè ya, mù trɔ ɖoɖa Tɔhonɔ̀ gbɔ. Mù tɔtè le kpɔ Mawu kè la hlùɛ̃ mù a. Mawu nyè la ɖo èto mù.

⁸Mì, miabe kɛ̃tɔwo, mì mu gbà kpɔ jìjɔɛ so ènu kè le wɔ̀ mia ŋuti ò. Ne mi jè ànyi a, mi la fɔ̃, sitè. Ne mi lè vìvìti mèa, Tɔhonɔ̀ ye la nyi miabe kɔ̀kɔ̀ɛ!

⁹Mi ɖo la dojì sɛ̃sɛ̃ɖe lè Tɔhonɔ̀ be àdɔ̀mèzea nu, ɖo mi wɔ̀ èvuɛ̃ do è. Vɔ̀, èŋù ɖe la kè, ye e la xɔ̀ ènyà ɖo mia ta eye e la sò jɔ̀jɔɛ na mi. E la kplɔ̀ mi va kɔ̀kɔ̀ɛa nu eye e la ɖɔ mi kudo yebe àdɔ̀kùnuwo.

¹⁰Wàlɛbɛ kè miabe kɛ̃tɔwo la kpɔ ekèa, wo la ɖɔ ku ŋùkpɛ̃. Woawo kè biɔna mi sã be: “Nukɛ Tɔhonɔ̀ mìabe Mawu a, le wɔ̀ ò?” Mi la fìnyà wo sìgbè àlekè wo fìnyànà bàba lè èmɔ̃dodo jia nène. Eye mia ŋutɔ, mi la kpɔ e tèpe.

¹¹Ŋùkèkè kè gbãnàa ye wo la trɔ tù mìabe èdùa. Gbè ŋua gbèa, mìabe ànyigbã a la kèkè ɖo ji kpe è.

¹²Nène a, mìa nɔ̀viwo la trɔ gbɔ̀ va mìa dòmè. Wo la so Ejiptè kudo Àsirìa, so kaka Ejiptè be ètɔ̀ sàsra gãa kudo Efratà be ètɔ̀a to, so kaka àpùwo to kudo èto-nyigbãwo ji.

¹³Ànyigbã be àkpa kpɔ̀tɛa, la trɔ zũ zògbè pupui ɖo woabe ènu drã wɔ̀wɔwo ŋuti.

¹⁴Tɔhonɔ̀, kplɔ̀ àpo dùkɔ̃a kudo àpo àlɛ̃kplɔ̀kpoa. Dùkɔ̃ kèa ɖèka pɛɛ kpò ye lè ànyigbã pupu kpakpla ɖe be dòdòmè eye àtikusɛ̃sɛ̃wo trɔ do è. Kplɔ̀ ɛ̀ sìgbè àlekè wò wɔ̀ ɛ̀ lè Bàcam be ègbeɖùpewo kudo Gilead nyigbã jia nène.

¹⁵Sìgbè wàlɛbɛ kè wò ɖè mi to lè Ejiptè a, gbà ɖè àpo ŋusɛ̃-bɔ a fiɔ mi ɖè.

¹⁶Dùkɔ̃wo la kpɔ wo eye wo la ɖɔ kudo ŋùkpɛ̃, togbɔ be wo nyi ŋusɛ̃tɔwo ŋutɔ cã a. Ènu la ku na wo eye wo mu la jro, la sè ènyà ɖekpe ò.

¹⁷Wo la ɖiɖɔ hũhũ sìgbè èdã nène. Sìgbè èlã kè zɔ̃nà lè pòdo jia nènea, wo la to lè woabe àgbògbòawo mè jojojoe va gbɔ wò Tɔhonɔ̀, miabe Mawu. Àpo ŋusɛ̃a la ɖo vɔ̃vɔ̃ na wo ŋutɔ;

¹⁸Mawu ɖe lè sɔ̀ kudo wòa? Èwò kè klɔna àmè be àgɔ̀jèjea eye wò sɔna èvuɛ̃ kènà a. Ɖo wò kpɔ̀tɔ̀ ɖo lɔ̃lɔ̃ na àpo dùkɔ̃mèviwo. Àpo àdɔ̀mèzea mu nɔ̀nà ànyi kaka yì ò eye àpo àdɔ̀mè nyuɛ̃a lè tɛ̀gbɛ̀ɛ.

¹⁹Wò sɔ̀gbè la gbà kpɔ ɖo e mè na mi, wò la gùdù miabe èvuɛ̃wo eye wò la na miabe àgɔ̀jèjewo kpata la yì ɖì ɖo àpù be ègũ cicria mè.

²⁰Eye Yakɔb be àxuedo a la kpɔ àpo ègbèji nɔ̀nɔ. Abràham be xòmèa la kpɔ àpo lɔ̃lɔ̃ a sìgbè àlekè wò fìã àjɔ̀gbè na mia tɔgbewo va yìa nène.