Read gen Nàhum 1 Bible Online

Nàhum 1 - gen bible

Nàhum 1

¹Ekèa ye nyi ènu kè Mawu ɖèfiɔ so Ninivè ŋutia. Nàhum kè nyi Ɛlkɔ̀s ŋusùa ŋlɔ̀ ɖèɖèfiɔ kèa ɖo xoma kèa mè.

²Tɔhonɔ̀a, Mawu hùãŋu ku èhlɔ̃biɔtɔ ye be nyi. Tɔhonɔ̀ nyi èhlɔ̃biɔtɔ, eye yebe àdɔ̀mèze ɖona vɔ̃vɔ̃. Tɔhonɔ̀ biɔna èhlɔ̃ àmè kèwo crì ìa. E ɖènà yebe àdɔ̀mèze ɖo yebe èkɛ̃tɔwo ji.

³Tɔhonɔ̀ gbɔ̃nà èjì ɖɛ blɛ̀wù ŋutɔ, eye mu binajì kaba ò. Vɔ̀a, Tɔhonɔ̀ mu gblena àgɔ̀jèje ɖɛ, èto mà dɔ̃ ò. Àyapòpo be àdã vùdù vùdù ye nyi èmɔ̃ kè ji Tɔhonɔ̀ zɔ̃nà a, eye lilikpowo ye nyi hũhũ lè yebe àfɔ̀wo nu.

⁴E kã ŋùmè na àpù, eye àpùa pu, eye be na ètɔ̀sisiwo keŋu pu tako. Basàn be àtikusɛ̃sɛ̃-gblèwo ku Karmèl be àvewo pu eye Libàn be èsepòpowo yrɔ̀.

⁵Ètowo hũhũ lè ŋùkɔ̀ na ɛ̀, eye ètokɔ̃ɛwo srè yì ŋùgbe. Lè yebe ŋùkɔ̀a, ànyigbã le mlì kudo e ji nɔ̀tɔwo keŋu.

⁶Àmè kɛ ye la teŋu nɔ̀tè ɖo yebe èjìbibi nu ò? Àmè kɛ ye la teŋu nɔ̀ yebe àdɔ̀mèze be fìɔfìɔ nu ò? Yebe àdɔ̀mèze le bì vlà vlà, sìgbè èzò nène, eye àkpã mlìgò yìjiwo le wo lè nùkɔ̀ na ɛ̀.

⁷Tɔhonɔ̀ nyɔ eye be nyi bèbèpe lè àkpɔ̃-zãgbè; E cɔ̃na àmè kèwo dojì ɖo e ŋutia ji,

⁸e la sɔ èsìɖɔɖɔ wɔ̀adã hɔ̃ èdùa be dodoewo jo lè yebe tèpe eye be la nyà yebe èkɛ̃tɔwo ɖo nu, kaka yì èku be vìvìti mè ke.

⁹Èse kɛwo ye mì le bla ɖo Tɔhonɔ̀ ŋuti ò? E la gũ woa nu keŋu, eye ènu bàɖà mu la gbà jɔ̀, zè èvègɔ̃a ò,

¹⁰Ɖoa, ne wo gbà caka sìgbè àŋùjawo nène, eye woabe àhàwo mu wo ɖekpekpe cã a, wo la fiɔ̃ keŋu-keŋu sìgbè èbè pupuwo nène.

¹¹Èwò, Ninivè mè, ye àmè kè ɖo ètamè bàɖà ɖo Tɔhonɔ̀ ŋutia to so, eye be ɖènà àɖàŋù vuɛ̃wo

¹²Tɔhonɔ̀ ye gblɔ̃ ɛ̀ be: “Ne wo sùgbɔ, eye wo sɛ̃ŋu ɖekpekpe cã a, àgɔ̃ la crɔ̃ woa kpata, eye woa nu la va yì. Oò Yudà, ne mù dovlo wò sãa, nyè mu la gbà dovlo wò ke ò.

¹³Fifìa, mù la ŋɛ̃ yebe èkɔ̀kùti kè le zĩ wò ɖo ànyi a, eye mù le ɖè ègà wò.”

¹⁴Tɔhonɔ̀ do èse so ŋuti wò be: “Jìjimèvi ɖekpe mu la so èwò mè, la sɔ nyikɔ wò ò. Mù la gbã vòdu tata ku legba kpàkpa kèwo ye lè vòdu wòwo be kuefãpewo. Mù la kù èyɔ̀do na wo, ɖoa, wo mu ɖo kpɛ̃kpɛ̃ ò.”