Read gen Nàhum 2 Bible Online

Nàhum 2 - gen bible

Nàhum 2

¹Kpɔɖa, àŋɛ̀dotɔ ɖe be àfɔ̀ lè èdù ji, lè ètowo ji, sɔ ènyà nyuɛ̃ ɖe gbãnà. E hɛ̃ ŋuti fàfa be àŋɛ̀ va. Ɖù àpo àzãwo, Yudà! Eye wɔ̀ ɖo àjɔ̀gbè wòwo ji! Ɖoa, àmè nyrãhũa mu la gbà va to èdù wò mè ke ò. E crɔ̃ gbidi.

²Ènugbletɔa va kpe àhùa ku wò; ekèa ŋutia, ɖia àpo àgbògbòwo; ŋùku wò ne nɔ̀ èmɔ̃a ji, tù àfɔ̀ tè, eye pòtɛ hɔ̃hlɔ̃ wòwo keŋu ɖɛ!

³Tɔhonɔ̀ la gbìgbɔ̀ likè Yakɔb be jìjìmèviwo be kɛ̃klɛ̃, sìgbè lekè ye ŋutɔ likè Izràɛl be kɛ̃klɛ̃a nène, togbɔ be ènugbãtɔwo kã wo hlɛ̃, wàlɛbɛ kè ènuhlàtɔwo gudu woabe vɛ̃-gblèwoa.

⁴Yebe kãlìsuwo be àkpoxɔ̀nuwo bìa, Gbãdãgbãwo do ènu jɛ̃ hɛ̀lì, àhùahũwo be gàkpowo le klɛ̃ sìgbè èzò nène; wàlɛbɛ kè wo bla àkpà, la kpe àhùaa, wo kɔ woabe èhuãwo ɖo èji.

⁵Àhùahũwo jè èdù ji, lè èmɔ̃wo ji, to èkpawo dòmè, trɔ, lũ va èdùgbowonu. Wo le bì sìgbè kakatiwo nène, le zrò sìgbè èjikèzò nène.

⁶Àsirìa be èfìɔa mì àsi yɔ yebe àhùaŋùkɔ̀nɔ̀tɔ kãlìwɔ̀tɔwo, Vɔ̀a, kãkãɖoji hùetè do woabe àzɔ̃lì; Àhùakɔ̃ kèwo ɖè èzò ɖo àfɔ̀nu na woa lũ ɖo kaka èdùkpawo gɔ̃mè vɔ̀. Wo doxa ɖo àkpoxɔ̀nu ɖe godo.

⁷Wo fo ètɔ̀nu be àgboa lè àvò mè Eye èfìɔsaa ci àsi!

⁸Wo ɖè Huzàb, èfìɔ-srɔ̃ kè nyi vòdu na woa, to so yebe wlapea, eye wo kplɔ̀ ɛ̀ àhùale; yebe kòsìwo le na àle sìgbè àhɔ̃newo nène, eye wo le pu àsi àkɔ.

⁹So kaka gbè ɖe gbèa, Ninivè lè sìgbè èsìdo ɖɔɖɔ nène. Vɔ̀a, èdùamètɔ kèwo ye nyi èsìa, Woawo ye le si jo ŋua! Àmèwo gblɔ̃ na wo be: “Mì nɔ̀tè! Mì dojì!” Gãke àmè ɖekpe mu trɔ ò.

¹⁰Mì hlà klòsalòa! Mì hlà sìkaa! Yebe àdɔ̀kùnu mà-vɔ ye be nyi! Ènu xɔ̀asì vòvòvòwo bɔ̀ ɖodu!

¹¹Wo hlà yebe ènuwo keŋu, wo lɔ yebe ènuwo keŋu, wo xɔ̀ yebe ènuwo keŋu! Èjìwo gbã, èklòwo pò tìtìtì, àmèti bliboawo hũhũ, eye woabe ŋùmèwo ci vĩ.

¹²Fikɛ ye jãŋùta be èdoa lè fifì ò? Àfi kè wo nyìnà woabe èviwo lè, eye jãŋùta-su ku jãŋùta-nɔ yìnà ku woabe èviwo, àmè ɖekpe mu dona vɔ̃vɔ̃ ji na wo ò.

¹³Jãŋùta-su wùnà èlã, be sùnà èviawo nu. E jènà èhlò ji na èlãa, sɔ nana yebe jãŋùta-nɔ, e wùnà èlã ɖɔna yebe èdowo, eye èlã kèwo be lea, ɖɔna yebe nɔ̀pewo fuu.

¹⁴Àhùadù Tɔhonɔ̀a gblɔ̃ be: “Kpɔɖa, mù sitè ɖo ŋuti wò! Mù la tɔzò àpo àhùahũwo, eye wo la fiɔ̃ keŋu-keŋu, Jãŋùtavi wòwo la ci èwui nu nyè mu la gble àmɔ̀nyɔ̀nu ɖe ɖo ànyi na wo ò. Wo mu la gbà sè àmèdɔ̃dɔ̃ wòwo be ègbèɖèɖe ke ò!”