Read gen Nàhum 3 Bible Online

Nàhum 3 - gen bible

Nàhum 3

¹Hèlu na èhlɔ̃dã-dù kè mè ɖɔ kudo èfĩ fìfi, eye be gbe be yè mu la nɔ̀tè èhlɔ̃dãdã òa!

²Èsɔba le ɖì! Àhùahũwo be àfɔ̀kuwo le ɖègbè! Èsɔwo le sidù! Àhùahũwo lè èdù ji!

³Èsɔdotɔwo zrò jè e ji! Èwuiwo le dàzò! Èhuãwo le klɛ̃zò! Àmè sùgbɔ ci àhùa! Wo bɔ̀ àmèkpòtiawo ɖɛ vòvòvò! Sɛ̃pe mu lè na àmèkukuawo ò, eye àmèwo le klɛ̃ àmèkukuawo, le jè ànyi.

⁴Ekèawo keŋu jɔ̀, ɖo àhasìtɔa be àgbè bàɖà nɔ̀nɔa ŋuti. Àhasìtɔ kè be nyɔnyɔ flùnà àmè, vɔ̀ nyi àzewo be nyɔ̃nùfìɔ kè be gbòlò-gbè trɔna dùkɔ̃wo zũnà yebe kluviwo, eye yebe àze blana àmèhawoa.

⁵Kpɔɖa, mù sitè ɖo ŋuti wò! Àhùadù Tɔhonɔ̀a ye gblɔ̃ ɛ̀. Mù la klo àpo kpòyòkpoyoe, kaka yì cɔ̃ ŋùmè na wò, mù la sɔ àpo àma fiɔ dùkɔ̃wo, eye èfìɔduwo la kpɔ àpo ŋùkpɛ̃.

⁶Mù la kɔ̀ ènu nyɔŋuwo ɖo ŋuti wò. Mù la ɖìgbɔ wò, eye mù la na èdù la kpɔ wò.

⁷Eye àmè ɖekpe kè la kpɔ wòa, la si jo lè gbɔ wò ku àpa be: “Ninivè be èdùa gbã! Àmè kɛ ye la làmɔɛ̃ ɖo e ta ò? Fikɛ ye mù la kpɔ àsiɖoàkɔ na àmètɔ lè na wò ò?”

⁸Ɖe ye wò nyɔ wu Nɔ-Amɔ̀n[1], èdù kè lè Ejiptè be ètɔ̀ gãa to, eye èsì trɔ do è gòdòa? Ètɔ̀ ye nyi yebe èkpa, eye èsì ye nyi yebe èglì.

⁹Etiopìatɔ ku Ejiptètɔ gbogboawo ye nyi yebe ŋusɛ̃ mà-ɖo sɛ̃pe, Putìtɔwo ku Libìatɔwo ye nyi yebe xɔ̀namètɔwo

¹⁰Gãkea, wo le è àhùale, Eye be yì gàtɔnugbe. Wo wù èviawo kãkã ɖo èmɔ̃zɛ̃kpliwo nu. Wo dà àkɔ̀, le yebe àgbònùglawo, eye wo do kɔ̀sɔ̀kɔsɔ yebe àmègãwo.

¹¹E va jè wò ca ji wò fifì, be wòa nù vevesèse be àhàa! Eye, ne wò le jè ànyi lè èkɛ̃tɔa be ŋùkɔ̀a, wò la ji wawlape! La sɔ bè do èkɛ̃tɔ wòwo

¹²Àgbògbò wòwo keŋu lè sìgbè ègboti kèwo ji èkusɛ̃sɛ̃ ɖìɖi ye yèwo lèa nène; ne wò gbe hũhũ wo kpòa, Ègbòawo la gɛ̃ jè ènu mè na àmè kè la ɖù woa.

¹³Kpɔ àhùakɔ̃ wòwo ɖa, woawo keŋu lè sìgbè nyɔ̃nùwo nène. Mìabe èdù be àgbowo lè hũhũ gbàa na èkɛ̃tɔwo, ɖoa, èzò fiɔ̃ woabe lɔkèwo.

¹⁴Kù èsì ɖɛ na hùenu kè wo la trɔ do èdù wò, la zĩ mìa jia. Ɖo èglì sɔ kpe èkpa wòwo, eye gbãdãgbã ne jè gbãdãgbã ji, lè àgbògbò wòwo mè. Nyà ànyikɔ, sɔ mè èkpe, ne wòa jrà èglìawo ɖo.

¹⁵Funua ye èzò la ɖù wò lè, Èwui la flì wò, wo la vũvũ wò, sìgbè lekè hùesuviwo vũvũna ègbe nène. Mì jì ɖo e ji! Mì sùgbɔ sìgbè hùesuviwo nène! Gãke, wo la vũvũ mì! Mì jì ɖo e ji! Mìabe dùkɔ̃a ne lɔ hòo sìgbè tìkpo-tìkpowo nène! Wo la vũvũ mì keŋu-keŋu!

¹⁶Kè wò na àjɔdotɔ wòwo sùgbɔ kaka wu wètriviwo lè jiŋùkusia, ekè wò hlà èdùa, wò zrò jo, sìgbè hùesuvi kèwo le zròa nène.

¹⁷Èdɔjikpɔtɔ wòwo sùgbɔ sìgbè hùesuviwo nène; àgbònùgla wòwo sùgbɔ sìgbè hùesuvi be èha gã ɖe kèwo va jè ɖo èdùa be èglìkpawo mè, lè àvìvɔ zã gbèa nène. Vɔ̀a, ekè èwè gbà to kpòa, wo gbà zrò jo, eye àmè ɖekpe mu nya àfi kè wo yì ò.

¹⁸Àsur be èfìɔ gã, àlɛ̃kplɔ̀tɔ wòwo yì àlɔ̃ mè! Àhùaŋùkɔ̀nɔ̀tɔ wòwo dɔ̃ àlɔ̃ mà vɔ! Dùkɔ̃ wòwo kãkã ɖo ètowo ji, eye àmè ɖekpe mu lè, la bɔ̀ wo ɖodu ò!

¹⁹Ènu ɖekpe mu la teŋu wù àpo àbìa ò. Àbì wòa, èku-bi ye be nyi. Àmè ɖekpekpe kè la sè àpo ènyàa, la pò àsikpe ku jìjɔɛ be wò jè ànyi. Ɛ̃ɛ, àmè kɛ ŋuti ye àpo èvuɛ̃jɔ̀jɔ be àbì mu lè ò?