Read gen Hàbakuk 1 Bible Online

Hàbakuk 1 - gen bible

Hàbakuk 1

¹Mawu ɖè ètodɔ̃ be ènyà fiɔ gblɔ̃ɖɛtɔ Hàbakuk.

²Kaka va na gàkɛ mè, mù la yɔ wò sù, Tɔhonɔ̀, sɔ biɔ xɔ̀ na àmè ò; ye wò la ku èto do mù ò? Mù do àpa ɖo àɖìkunuwɔ̀wɔ ŋuti co wò mu la hlùɛ̃ mi gã òa?

³Nukɛ ŋuti wò na mù le kpɔ màjɔ̀ màjɔ ɖo ò? Nukɛ ŋuti wò lɔ̃ le kpɔ miabe gbledoa ɖo ò? Ènugbletɔ kudo èhlɔ̃dãtɔwo ye trɔ do mù. Àjrè kudo kòjoɖoɖowo ye kpò ye bɔ.

⁴Wo tù àfɔ̀ jɔ̀jɔɛ, jɔ̀jɔɛsòso be ŋutidɔ nyuɛ̃a le ve wo. Àmènyrãkua le ɖù jɔ̀jɔɛwɔ̀tɔa ji eye kòjosòso mu gbà lè ò.

⁵Tɔhonɔ̀ gblɔ̃ be: “Mì le ŋùku ɖo ènu kè le jɔ̀ lè dùkɔ̃wo dòmèa ŋuti, ne wɔ̀ ŋùdã na mì ne mìa kãyàa! Ɛ̃ɛ, ŋùdãnu ɖe la jɔ̀ lè mìabe àgbè mè. Ne wo kã yebe àseŋu na mìa, mì mu la xɔ̀ ɛ̀ sè ò!

⁶Mù na èmɔ̃ Babɛ̀lviwo gbãnà, dùkɔ̃ nyrãku, màku ŋuzĩzĩ; wo le sã xixea mè gòdòo le hlà àmèwo be ànyigbãwo.

⁷Wo jiŋɔ gbà ɖo vɔ̃vɔ̃, lè ègòyiyi mèa, wo ɖènà ègbè sɔ xɔ̀nà ènu kè wo jro a.

⁸Woabe èsɔwo le pu dù sɔ wu blèkpɔ̃ɛwo, wo bi wu gbète kèwo dànà àdè wètrɔgbɔa. So dìdìpea, woabe èsɔdotɔwo vana jòo, wo zrònà sìgbè àmlãkoe kè le ji la jè yebe èlã jia nène.

⁹Wo va wɔ̀nà ènu bàɖàwo, wo sɛ̃natamè sɔ gblena ènu. Wo bɔ̀nà àhùale sùgbɔ, sìgbè ànyigbã be èkɔkuiwo nène.

¹⁰Èfìɔwo nyina àlɔmè ɖènu na wo. Wo crìnà àgbònùglawo. Àgbògbò be èdùawo mu dona vɔ̃vɔ̃ na wo ò: wo lɔna èkɔ sɔ wɔ̀nà kpoku tɛ ɖo woa ŋuti, sɔ gbãnà wo do ɖèka-ɖèka.

¹¹Wo va yìnà hòo sìgbè èji jàja sɛ̃sɛ̃ɖe nène, gbà yì kɔ̀nà ɖo àfi bu cã nène. Woabe ŋusɛ̃ ji kpò wo kãnaɖo: e ye nyi woabe mawu.”

¹²So gbèɖegbèa, èwò ye nyi Tɔhonɔ̀, wò nyi Mawu nyè, àgbèagbe kè mu kuna òa. Wo cã Babɛ̀lviwo sɔ le ɖokòjo na mi. Èwò àkpã sɛ̃sɛ̃ màhuã-màhuã, wò na wo ŋusɛ̃ sɔ dɔ̃ èto na mi.

¹³Vɔ̀a, ŋùkuvi wòa kɔ̀ ŋutɔ ne bèa kpɔ èvuɛ̃, wò mu la teŋu lɔ̃ nɔ̀ gbledo be tèpe ò. Co, wò sɔ ŋùku dàɖɛ le kpɔ ènu kpò àmèwo le flù àmè fàa. Wàlɛbɛ kè àmè nyrãkuwo le crɔ̃ àmè jɔ̀jɔɛ mànyahũ ɖewoa, wò mu le gblɔ̃ ènyà ɖe ò.

¹⁴Wò le wɔ̀ kudo mi sìgbè ètɔ̀mè lã ku èlãklìvi kèwo mu ɖo kplɔ̀tɔ ɖe òa nène. Oò, nukɛ ŋuti ò?

¹⁵Babɛ̀lviwo le le àmèwo sìgbè ètɔ̀mè lã kè wo ɖè lè àkpoŋù nua nène. Wo kplɔ̀ wo va woabe èɖɔawo mè eye wo kpɔna jìjɔɛ ŋutɔ.

¹⁶Wo wɔ̀nà vɔsa na woabe èɖɔawo, tɔnazò lifi na wo, ɖo èɖɔawo ye nana wo ènuɖùɖu lè gbɔsùsu mè ye wo ɖùnà, sènà vivi.

¹⁷Wo la teŋu nɔ̀tè ekèa wɔ̀wɔ gbè ɖèka na èɖɔawo be zãzã sɔ wù dùkɔ̃wo àɖìku tɔ̀a?