Read gen Hàbakuk 2 Bible Online

Hàbakuk 2 - gen bible

Hàbakuk 2

¹Mù la nɔ̀ àpe èzãɖiaxɔa mè, mù la nɔ ɖia lè àgbògbò be èkpa ji, nɔ kpɔ ènu kè Mawu la gblɔ̃ na mù a kudo ɖoŋuti kè e la na èhùɛjèje nyèawo.

²Nène a ye Tɔhonɔ̀ gblɔ̃ na mù be: “Ŋlɔ̀ ènu kè mù le ɖèfiɔ wòa, ta ɛ̀ ɖo èkpe kpàkpawo ji ne woa teŋu hlɛ̃ ɛ̀ bɔ̀bɔɛɖe.

³Àvìmènu ɖe kè ɖo yebe gàmèa ye. E mlì gbãnà blɛ̀wù, mu nyi àjè be ènyà ò. Ne e ci ŋùgbea, nɔ̀tè kpɔ e sinu, ɖo e la va emè godo, yebe gàmèa kpò ye la sù gbɔ̀xue.

⁴Ŋlɔ̀: Àmè kè ɖo susu bàɖàa, buna yebe ŋusɛ̃. Vɔ̀ àmè kè wɔ̀ ànùkua na Mawu a, lè jɔ̀jɔɛ eye nènea, e ɖo àgbè.

⁵Nyàwo, vɛ̃ sànà àmè ègòyitɔa mu teŋu nɔ̀nà kpo ò, e kèkènà èhlò mè sìgbè kuwode nène. Sìgbè èku nènea, ènu mu sùnà ɛ̀ ò. E hlànà dùkɔ̃ pòpuwo kpata, eye e bɔ̀nà dùkɔ̃wo ɖodu na ye ɖokoe.

⁶Dùkɔ̃ kèwo ji be ɖù a, sɔna ènyà ɖo e ŋuti ɖodu. Wo gblɔ̃nà ènyà màjè ètowo.” “Ènyà kè wo la gblɔ̃a ye nyi be: Gbledo kɛ ye nyi ekèa na mì! Mì le hlà àmè buwo be àdɔ̀kùnuwo. Kaka va na gà kɛ mè ò? Mìabe èfɛ̃wo gbà le jì ɖo eji kpe è!

⁷Àmè kèwo do ègà na mìa, la va xa mì kplà, eye wo la hũhũ mì, woawo cã, wo la hlà mìabe ènuwo.

⁸Ɖo wò cã wò hlà dùkɔ̃ sùgbɔ be ènuwo: ɛ̃ɛ tututu, dùkɔ̃ kèwo kpɔ̀tɔ̀a, la hlà wò cã. Nyàwoa, mì kɔ̀ èhũ ɖɛ, wɔ̀ àɖìkunu ku àmèwo, èdùwo kudo dùmèviwo!

⁹Gbledo kɛ ye nyi ekèa na mì! Mì xɔ̀ àmèwo be àlè na mìabe èhlɔ̃wo, eye mì susu be yèwo lè tèpe nyuɛ̃ sɔ xe èmɔ̃ na gbledo ɖe a?

¹⁰Mìabe ɖoɖowo la do ŋùkpɛ̃ mìabe èxlɔ̃wo: dùkɔ̃ sùgbɔ be cɔ̃crɔ̃a le hɛ̃ gbledo va mìa ŋutɔ ji.

¹¹Ɖo èkpewo ŋutɔ cã la dohùɛ do mì, eye èxɔ̀tiwo ye la na mì ɖoŋuti.

¹²Gbledo kɛ ye nyi ekèa na mì! Mì le tù èdù kudo èdù be èkɔwo lè èhlɔ̃dãdã ku màjɔ̀ màjɔ mè.

¹³Dùkɔ̃wo le jè àgbàgba gbalo sɔ le wɔ̀ èdɔ kè èzò la va fiɔ̃a. Mu nyi àhùadù Tɔhonɔ̀a gbɔ ye ekèa soa?

¹⁴Ɛ̃ɛ wo la nya Tɔhonɔ̀ be gogo nènea ye gogo kèa la ɖɔ ànyigbã a sìgbè àlekè àpù ɖɔ kudo èsìa nène.

¹⁵Gbledo kɛ ye nyi ekèa na mì! Mì cakana àhà mu àmè na mìa haviwo woabe àma ne ze lè àmèdòmè.

¹⁶Mìa ŋutɔ ye èŋù la kpɛ̃ eye mì mu la kpɔ gogo ò! Mìa ŋutɔ cã mì nù, ne mìa ci àma! Tɔhonɔ̀ la kpe yebe àdɔ̀mèze be kɔpòa na mì, eye mìabe bùbua la trɔ zũ ŋùkpɛ̃ na mì.

¹⁷Ɖo èhlɔ̃dãnu kèwo mì wɔ̀ lè Libàn va yìa, la trɔ jè mìa ji. Mì crɔ̃ ègbemèlãwo sã fifìa, ègbemèlãwo cã la do vɔ̃vɔ̃ na mì! Ènu kèa la jɔ̀, ɖo mì kɔ̀ èhũ ɖo ànyi; eye mì gbà sɛ̃tamè ku ànyigbã, èdù kudo woabe dùmèviwo.

¹⁸Nukɛ ye wo la sɔ kpèli kè wo ɖoa, sɔ wɔ̀ ò? Gàkpo kpò ye wo sɔ wɔ̀ wo eye nyàwo ɖekpe mu lè woa nu ò. Jìdo kɛ ye gbɛ̀dɛ kè wɔ̀ ɛ̀a la teŋu sɔ dà ɖo e ji ò?

¹⁹Gbledo kɛ ye nyi ekèa na mì! Mì le gblɔ̃ na àtikpàkpa be: 'Fɔ̃!' Le gblɔ̃ na èkpetataa kè mu la teŋu pò nupo òa be: 'Sitè!' Co mì nya be wo mu la teŋu ɖè ènyà ɖekpe gblɔ̃ na mì ò. Ne wo fã sìka kudo klòsalò do wo cã a, àgbè ɖekpe mu lè woa mè ò!

²⁰Vɔ̀a, Tɔhonɔ̀ nɔ̀ ànyi ɖo yebe mawuxɔ kɔ̀kɔ̀ɛa mè. Ènu sia ènu ne bɔ̀nu kpoo lè yebe ŋùkɔ̀!”