Read gen Hàbakuk 3 Bible Online

Hàbakuk 3 - gen bible

Hàbakuk 3

¹Kpɔɖa, kuefã kè gblɔ̃ɖɛtɔa wɔ̀a ye kè:

²Tɔhonɔ̀, Tɔhonɔ̀, mù sè wo gblɔ̃ àpo ènu jɔ̀asuwo eye mù ɖɔ kudo bùbu gã ɖe. Lè miabe àgbè hùenua, gbà ɖè ènu kèawo dòmètɔwo fiɔ. Ne wò la gbà bijì ŋutɔ cã a, wò kpɔ̀tɔ̀ le wɔ̀ àdɔ̀mè nyuɛ̃.

³Mawu so Temàn va, kɔ̀kɔ̀ɛ be Mawu a so Paràn be ètowo ji gbɔ̀. Yebe nyiɖìɖia ɖɔ jiŋùkusi eye ànyigbã ɖɔ kudo yebe kàfù kafu.

⁴E gbãnà ku kɛ̃klɛ̃ sìgbè kɔ̀kɔ̀ɛ nène, kɛ̃klɛ̃ be zɛ̃zɛ̃wo to so yebe àlɔ̀ mè, fikè yebe hɔ̃hlɔ̃ àlo ŋusɛ̃ wla ɖoa.

⁵E ɖo èdɔ̀ kpàtà ɖoɖa jè ŋùkɔ̀ na ɛ̀, eye kpòkpò jènà àmèwo ji lè yebe ŋùgbedòmè.

⁶E sitè sɔ xɔ̀ ànyigbã be jije kpedo. Wàlɛbɛ kè e le kpɔ dùkɔ̃woa, vɔ̃vɔ̃ jè woa ji ɖo e ŋuti. Gbè ɖe gbè be ètowo hũhũ ètokɔ̃ɛ kèwo lè tɛ̀gbɛ̀dòa ŋɛ̃ jè emè lè fikèwo nyi yebe àfɔ̀topewo sãa.

⁷Mù kpɔ Kucàn be àmèwo lè woabe gòxɔwo mè eye Midìantɔwo le hũhũ tìtìtì lè woabe nɔ̀pewo.

⁸Tɔhonɔ̀, ètɔ̀wo ye le do àdɔ̀mèzea na wòa? Ɛ̃ɛ, ètɔ̀wo ye wò le bijì do a? Wò le lia lilikpowo ji sìgbè àhùakèkevi kèwo nana hlùɛ̃gãa nène.

⁹Wò le jrà àŋùdàti wòa ɖo, yebe àŋùtiwo ye nyi àjɔ̀gbè kèwo wò fìã lè àdɔ̀mèze wòa mèa. Ànyigbã kè ènu mè, eye ètɔ̀ sàsrawo le kɔ̀ cùu.

¹⁰Ne ètowo le kpɔ wòa, wo hũhũna, èjijàjawo ɖɔ ànyigbã ji, àpù gãa bijì eye e dà yebe àsrɔ̀kewo ɖoɖa kaka jiŋùkusi.

¹¹Lè àpo àŋùti kèwo le zròa be kɔ̀kɔ̀ɛ mèa, lè èhuã wò kè le dàzò ŋàŋlãa be ŋùkɔ̀a, dɔ̃ŋùkusu ku wètri pòtɛ woa ɖokoe.

¹²Ku àdɔ̀mèze ye wò ɖìsà to ànyigbã ji, ku èjìbi be àdã ye wò tùkù dùkɔ̃ pòpuwo.

¹³Wò to yì le xɔ̀ na dùkɔ̃ wòa, le xɔ̀ na èfìɔ kè wò doàmì èta na a. Wò wù àmè bàɖàwo be ègaa, eye wò crɔ̃ yebe àlɔ̀zɛ̃wo kpata.

¹⁴Wò ŋɔ kɛ̃tɔwo be ègawo be èta kudo woa ŋutɔwo be àŋùtiwo. Wo sidù gbãnà sìgbè èji be àya sɛ̃sɛ̃ ɖe nène kudo jìjɔɛ ne woa va nyà mi keŋu-keŋu. Sìgbè lekè wo la kãkã wɔ̀amènɔ̀ ɖe lè bèbe mè lè woabe nɔ̀pe nène.

¹⁵Wò zɔ̃ ɖo àpùa mè kudo èsɔ wòwo lè àsrɔ̀ke gãgãwo be fìɔfiɔ mè.

¹⁶Mù sè hũnyà-hũnyà kèa kpata eye mù titɔ ŋutɔ: ènu nyè pò tìtìtì ku vɔ̃vɔ̃, àmèti blibo nyèa gbɔjɔ, àfɔ̀ nyèwo mu gbà ɖo ŋusɛ̃ lè gɔ̃mè na mù ò. Mù bɔ̀nu kpoo, le kpɔ gbledo be ŋùkèkèa sinu, ne ma yì kpe àkɔ ku dùkɔ̃ kè le tɛ mi ɖo ànyi a.

¹⁷Ègbotiwo mu gbà le pò èse ò, vɛ̃-gblewo mu gbà le na vɛ̃kusɛ̃sɛ̃ ò, àmìtiwo mu gbà le na ènu ɖekpe ò, eye àgblèwo mu gbà le na ènuɖùɖu ò; àlɛ̃ ɖekpe mu gbà lè àlɛ̃kpaa mè, kaka la va kpɔ ènyì lè ènyìkpaa mè ò.

¹⁸Vɔ̀a nyè ya, mù le kpɔ jìjɔɛ lè Tɔhonɔ̀ mè, mù le sò àyo ɖo Mawu hlùɛ̃ mù gã.

¹⁹Tɔhonɔ̀ Mawu ye nyi ŋusɛ̃ nyèa: E na mù bi sìgbè àvũgbɛ nène E nana mù tona tèpe yìjiwo Lè hàsìnɔ̀ gã be xoma mè: Kudo àpe èkà be hàjìnuwo