Read gen Sèfanìa 2 Bible Online

Sèfanìa 2 - gen bible

Sèfanìa 2

¹Mì bɔ̀, ne mìa yì mìa dokoewo mè kpɔ, dùkɔ̃, èŋù màkpɛ̃tɔwo!

²Gbɔ̀xue Tɔhonɔ̀ be ɖoɖo a ne va ɖo! Gbɔ̀xue e mè so nu be àya ne kplɔ̀ mì yì, lè ŋùkèkè ɖèka ji, Sìgbè èbè pupu kè nène, gbɔ̀xue Tɔhonɔ̀ be àdɔ̀mèze gãa ne va jè mìa ji! Gbɔ̀xue Tɔhonɔ̀ be àdã be ŋùkèkèa ne va jè mìa ji!

³Mì ji Tɔhonɔ̀, mì, àmè kèwo keŋu bɔ̀bɔ̀ mìa ɖokoe lè ànyigbã jia mì, àmè kèwo keŋu zɔ̃nà ɖo yebe ɖoɖo ku ègbèɖèɖe nuawo, mì ji jɔ̀jɔɛwɔ̀wɔ, mì ji ɖokoebɔ̀bɔ, èta mu nyɔ òa, Tɔhonɔ̀ be àdɔ̀mèze gbèa, wo la wla mì.

⁴Gazà-nyigbã jiviwo la ci àgba, wo la gbã Àskalɔ̀n-dùa, wo la nyà Asdɔ̀d-dù mèviwo, to lè woa de, dɔ̃ŋùkusu jàse, eye wo la hɔ̃ Ekrɔ̀n-dùa jo.

⁵Hèlu na mì, mì àmè kèwo lè àpù toa! Kretà-dùkɔ̃wo, Tɔhonɔ̀ be ènyà sitè ɖo mìa ŋuti! Kanàn-nyigbã kè ji Filistìtɔwo lèa, Tɔhonɔ̀ gblɔ̃ be: “Mù la kãkã mì, eye àmè ɖekpe mu la kpɔ̀tɔ̀ ò!”

⁶Àpù to-nyigbã kè ji Kretàtɔwo lèa la trɔ zũ tèpe na àlɛ̃kplɔ̀tɔwo ku àlɛ̃kpawo.

⁷E la nyi àmè kèwo kpɔ̀tɔ̀ lè Yudà be àxuedo mèawo tɔ̀. Funua ye wo la kpɔ èlãnyìpe lè. Fìɛ̃si mèa, wo la mlɔ̃ ànyi ɖo Àskalɔ̀n be àxuewo mè. Tɔhonɔ̀, woabe Mawu la lebè na wo, eye be la trɔ woabe nyɔnaa, na wo.

⁸“Mù sè Mòabtɔwo be èzũwo, ku Amɔ̀nviwo be àlɔmèɖèɖewo. Wo le zũ dùkɔ̃ nyè, eye wo le pò àdègbè ɖo woabe ànyigbã ŋuti.”

⁹Tɔhonɔ̀, àhùadù Mawu, Izràɛlviwo be Mawu a gblɔ̃ be: “Ekèa ŋutia, mù tà àpe àgbè be Mòab-nyigbã la trɔ sìgbè Sodɔ̀m nène, eye Amɔ̀nviwo la trɔ sìgbè Gòmɔrà nène! Wo la nyi àŋùja-nyigbã, èjè-nyigbã ku zògbè-nyigbã kòkòɖàbì! Dùkɔ̃ nyè mèvi kpɔ̀tɛawo la hlà wo! Woabe ànyigbã la nyi ècrɔ̃nu na àmè kèwo kpɔ̀tɔ̀ lè dùkɔ̃ nyè mèawo.

¹⁰Ekèa la nyi woabe ègòyiyi be èfɛ̃tu, woabe èzũwo ku àlɔmèɖèɖe lè Tɔhonɔ̀ Ŋusɛ̃kpatatɔa be dùkɔ̃a ŋuti be àjɔ̀!

¹¹Tɔhonɔ̀ la sɛ̃ ètamè ɖo woa ŋuti, eye, wàlɛbɛ kè be la crɔ̃ ànyigbã ji vòduwo keŋuã, dùkɔ̃wo kpata, lè àgowo keŋu ji, àmè sia àmè, lè yebe ànyigbã ji, la jè èɖɛ̀ na ɛ̀.

¹²“Mìa Ètiopìatɔwo cã, èwui nyè la crɔ̃ mì!”

¹³E la vlũ àlɔ̀ ɖoɖa àvego, la kãkã Àsirìa, e la gble Ninivè ɖɛ gbãgbã, eye Ninivè la pu ɖɛ sìgbè zògbè nène.

¹⁴Funua ye èlãhawo ku ègbemèlãwo la va nɔ cɔ̃ àkɔ ɖo. Elã vòvòvòwo, ètɔ̀-kpàfiɔ̃wo ku hlɔ̃màdɛ̃wo la nɔ ci yebe sɔtiawo tamè dɔ̃. Woabe fãfãwo la nɔ ɖì to flɛsɛ̀wo nu. Lè àgboa nu kea, èglìkpo gbãgbãwo kpò ye la nɔ̀ ànyi, eye sedà be èxɔ̀tùtiwo la ci àma.

¹⁵Èɖe mà sɔ lè e mè be èdù, sù ye ɖokoe si bɔ̀kɔ̀, kè gblɔ̃nà na ye ɖokoe be: “Ènyè kpò ye! Àmè ɖekpe mu gbà lè, sɔ̀ ku mù òa!” Ye nyi ekèa? Leke be va trɔ zũ èglìkpo gbãgbã ɖèɖe lekea ò? E trɔ zũ zògbè, ègbemèlãwo be nɔ̀pe! Àmè ɖekpekpe kè la to yebe àxàda mè va yìa, la nɔ kò è, la nɔ hũhũ àlɔ̀.