Read gen Hagài 1 Bible Online

Hagài 1 - gen bible

Hagài 1

¹Lè Darìo be èfìɔɖùɖu be èpè èvègɔ̃a mè, lè wètri àdɛ̃gɔ̃a be ŋùkèkè cucugbãa gbèa, Tɔhonɔ̀ be ènyà to gblɔ̃ɖɛtɔ Hagài ji, va na Zòrobabɛ̀l, Saltìɛl be èvi kè nyi Yudà be èdùjiɖùtɔa. Tɔhonɔ̀ be ènyà gbà va na Yosùa, Yehosàdak be èvi kè nyi hũbonɔ gãa.

²Ènyà kè Àhùadù Tɔhonɔ̀a gblɔ̃a ye nyi ekèa: “Dùkɔ̃ kèa le gblɔ̃ be: 'Hùenu mu kpɔ ɖo, ne woa tù Tɔhonɔ̀ be àxuea hàɖe ò.'”

³Ekèa ŋuti ye Tɔhonɔ̀ be ènyà ɖì na wo, to gblɔ̃ɖɛtɔ Hagài ji be:

⁴“Hùenu ɖo na mìawo ya, be mìa nɔ̀ mìabe àxue kèwo wo sɔ àti ɖo àcɔ naa mè, wàlɛbɛ kè àxue nyèa ya ci gbãgbãa?”

⁵Ye ŋutia, ènyà kè Àhùadù Tɔhonɔ̀a gblɔ̃a ye nyi be: “Mì bù mìabe àzɔ̃lìa ŋuti kpɔ nyuɛ̃ ɖe.

⁶Mì do ènuku sùgbɔ, gãke mì yà ènu vi ɖe. Mì le ɖùnu, gãke mì mu le ɖɔpò ò. Mì le nùnu, gãke mu le sù mì ò. Mì le do àwù, gãke àvìvɔ gbà le wɔ̀ mì. Mì le xɔ̀ fɛ̃tu, gãke e le ɖo ègo ŋɔŋɔ mè.”

⁷Ènyà kè Àhùadù Tɔhonɔ̀a gblɔ̃a ye nyi be: “Mì bù mìabe àzɔ̃lìa ŋuti kpɔ nyuɛ̃ ɖe.

⁸Mì yì ètowo ji, ne mìa hɛ̃ àti gbɔ̀ va tù àxue nyèa, ne bèa jè ŋùmè na mù, ne mìa sɔ do bùbu ŋuti nyè.” Tɔhonɔ̀ ye gblɔ̃ ɛ̀.

⁹Mì le kpɔ èmɔ̃ na nukuyàya sùgbɔ, vɔ̀a, kpɔɖa, vi ɖe kpò mì kpɔ. Ekè mì hɛ̃ va àxomèa, mù plu àya do è, eye e fu ì jo. Nukɛ ŋuti ye ò?” Àhùadù Tɔhonɔ̀a ye gblɔ̃ ɛ̀. “Ɖoa, mì gble àxue nyè ɖo gbãgbã, vɔ̀a mìa dòmètɔ ɖe sia ɖe le lebè na ye ŋutɔ be àxue.

¹⁰Ekèa ŋuti ye jiŋùkusi xà ɖo mìa ŋuti, tè mì àhũ, eye ànyigbã cã tè mì àgblèmè-nukuwo.

¹¹Eye mù yɔ èkuɖìɖi ɖo àgblèwo ji, ɖo ètowo ji, ɖo èlù ji, ɖo àhà yeye ji, ɖo àmì ku ènu kèwo keŋu nyi ànyigbã be ènukuwo ji, ɖo àgbètɔ ji, ɖo èlãhawo ku mìabe àlɔ̀nudɔwo keŋu ji.”

¹²Eye Zòrobabɛ̀l, Saltìɛl be èvia kudo Yosùa, Yehosàdak be èvi kè nyi hũbonɔ gãa kudo dùkɔ̃a be àmè kpɔ̀tɛawo keŋu, ɖo èto Tɔhonɔ̀, woabe Mawu a be ègbè, gbàkudo gblɔ̃ɖɛtɔ Hagài be ènyà kèwo Tɔhonɔ̀, woabe Mawu a do àsi na ɛ̀a. E yomè a, dùkɔ̃a vɔ̃ Tɔhonɔ̀.

¹³Ekèa yomè a, Hagài, Tɔhonɔ̀ be àmèdɔ̃dɔ̃a do Tɔhonɔ̀ be àŋɛ̀ kèa na dùkɔ̃a be: “Mù lè ku mì!” Tɔhonɔ̀ ye gblɔ̃ ɛ̀.

¹⁴Eye Tɔhonɔ̀ do èzò Zòrobabɛ̀l, Saltìɛl be èvi kè nyi Yudà-nyigbãa be èdùjiɖùtɔa be gbɔ̃gbɔ̃ mè, e do èzò Yosùa, Yehosàdak be èvi kè nyi hũbonɔ gãa be gbɔ̃gbɔ̃ mè sɔ do èzò dùkɔ̃a be àmè kpɔ̀tɛawo keŋu mè. Wo va, eye wo tɔ èdɔa ji, lè Àhùakɔ̃wo be Tɔhonɔ̀, woabe Mawu be àxuea ŋuti,

¹⁵Lè Darìo be èfìɔɖùɖu be èpè èvègɔ̃a be wètri àdɛ̃gɔ̃a be ŋùkèkè wìvɔ ènègɔ̃a gbè.