Read gen Hagài 2 Bible Online

Hagài 2 - gen bible

Hagài 2

¹Lè wètri adrɛ̃gɔ̃ a be ŋùkèkè wìvɔ àdɛ̃gɔ̃a gbèa, Tɔhonɔ̀ be ènyà ɖì to gblɔ̃ɖɛtɔ Hagài ji be:

²“Pò nupo na Zòrobabɛ̀l, Saltìɛl be èvi, Yudà-nyigbãa be èdùjiɖùtɔa, na Yosùa, Yehosàdak be èvi, hũbonɔ gãa, kudo dùkɔ̃a be àmè kpɔ̀tɛawo. Biɔ sè be:

³Mì, àmè kèwo kpɔ̀tɔ̀awo dòmètɔ kɛwo ye kpɔ àxue kèa be gogo sã tɔ̀a ò? Leke ye mì kpɔ ɛ̀ ɖo egbèa ò? Mu ɖì ènu gbalo lè ŋùmè na mì egbèa?”

⁴Ye ŋutia, Tɔhonɔ̀ be: “Zòrobabɛ̀l, dojì! Yosùa, Yehosàdak be èvi, hũbonɔ gãa, dojì! Mìa Yudà-nyigbã ji dùkɔ̃a keŋu, mì dojì!” Àhùadù Tɔhonɔ̀a gblɔ̃ be: “Mì dojì, ne mìa wɔ̀dɔ, ɖoa, mù lè ku mì!” Àhùadù Tɔhonɔ̀a ye gblɔ̃ ɛ̀.

⁵Zɔ̃ ɖo èzò kè mù ɖù ku mì, ekè mì jo lè Ejiptè-nyigbã jia nua, Gbɔ̃gbɔ̃ nyè kpɔ̀tɔ̀ lè mìa dòmè, ye ŋutia, mì mu gbà vɔ̃ ò!”

⁶Ɛ̃ɛ, àhùadù Tɔhonɔ̀a gblɔ̃ be: “Zãa ɖe yàa, mu la gbà dìdì ò, mù la gbà hũhũ jiŋùkusi ku ànyigbã, àpù ku ànyigbã pupuia keŋu.

⁷Mù la hũhũ dùkɔ̃wo keŋu, eye dùkɔ̃wo keŋu be ènu xɔ̀ àsìwo la bɔ̀ va, eye mù la sɔ gogo ɖɔ àxue kèa!” Àhùadù Tɔhonɔ̀ ye gblɔ̃ ɛ̀.

⁸“Klòsalòa, tɔ̀nyè ye be nyi, eye sìka cã a, tɔ̀nyè ye be nyi.” Àhùadù Tɔhonɔ̀a ye gblɔ̃ ɛ̀.

⁹“Àxue fifì tɔ̀a be gogo la wu cucugbã tɔ̀a tɔ̀!” Àhùadù Tɔhonɔ̀a ye gblɔ̃ ɛ̀. “Eye tèpe kèa ye mù la na ŋuti fàfa lè.” Àhùadù Tɔhonɔ̀a ye gblɔ̃ ɛ̀.

¹⁰Lè Darìo be èfìɔɖùɖu be èpè èvègɔ̃a be wètri àsiɖèkɛgɔ̃a be ŋùkèkè wìvɔ ènègɔ̃a gbèa, Tɔhonɔ̀ be àŋɛ̀ va na gblɔ̃ɖɛtɔ Hagài be:

¹¹Àhùadù Tɔhonɔ̀a gblɔ̃ be: “Biɔ hũbonɔwo sè be nukɛ ye èsea fiɔ màa?”

¹²Ne àmè ɖe sɔ èlã kãkã kè ŋuti wo kɔ̀a bla ɖo yebe àwù be èto mè, eye yebe àwù be èto mè ŋua tɔ kpɔ̃nɔ, àlo ègbekui, vɛ̃, àmì, àlo ènuɖùɖu ɖe ŋutia, ènu kè ŋuti àwù be ètomèa tɔa cã trɔna ènu kɔ̀kɔ̀ɛa?” Hũbonɔawo ɖo e ŋuti be: “Aò.”

¹³Eye Hagài gblɔ̃ be: “Ne àmè ɖe tɔ àlɔ̀ àmèkuku, eye be lè mà-kɔ̀ mà-kɔ, vɔ̀, tɔ àsi ènu ŋuawo dòmètɔ ɖe ŋutia ɖe, ènua cã trɔna mà-kɔ̀makɔa?” Hũbonɔawo ɖo e ŋuti be: “Ɛ̃ɛ, ènua trɔna ènu mà-kɔ̀ mà-kɔ.”

¹⁴Eye Hagài gblɔ̃ be: “Lekea ye dùkɔ̃ kèa lè, eye lekea ye èdù kèa mètɔwo lè, lè ŋùmè na mù.” Tɔhonɔ̀ ye gblɔ̃ ɛ̀. “Ènu ɖekpekpe kè wo le wɔ̀ ku ènu ɖekpekpe kè wo sɔ le savɔa lè mà-kɔ̀ mà-kɔ.

¹⁵So egbè, kaka sɔ yìa, mì le ŋùku ɖo ènu kè la jɔ̀ a ŋuti. Keŋu gbɔ̀xue wo la ɖo èkpe ɖe ɖo èkpe bu ji lè Tɔhonɔ̀ be àxuea mèa,

¹⁶nukɛ ye jɔ̀nà ɖo mìa ji sã ò? Ne àmè ɖe va ji èlù babla èwìa, èwo kpò be kpɔna. Ne wo va vɛ̃fiɔ̃pe, be woa kù vɛ̃ lità èkà-ci èwoa, èwì kpò ye wo kpɔna.

¹⁷Tɔhonɔ̀ gblɔ̃ be: “Mù dɔ̃ èto na mì, lè mìabe àlɔ̀nu-dɔwɔ̀wɔwo keŋu mè ku èdɔ kè nyi èlù-gble be èdɔ̀lelea kudo èsìkpe jàja, gãke mì mu trɔ va gbɔ nyè ò.

¹⁸So egbè, kaka sɔ yìa, egbè wètri àsiɖèkɛgɔ̃a be ŋùkèkè wìvɔ ènègɔ̃ kèa ji, kaka yìa, mì bù e ŋuti kpɔ be, so gbè kè gbè wo ɖo Tɔhonɔ̀ be kuefãpea be dodoea ànyi a,

¹⁹ènuku ɖe gbà ci àvà ji mà a? Kaka na fifìa, vɛ̃ti ku ègboti, yòvo bòɖàti ku àmìti mu kpɔ sɛ̃ku ò. So egbèa jia, mù la tu sì na mì.”

²⁰Lè wètria be ŋùkèkè wìvɔ ènègɔ̃a gbèa, Tɔhonɔ̀ be ègbè gbà ɖì na Hagài, zè èvègɔ̃a be:

²¹“Gblɔ̃ na Zòrobabɛ̀l, Yudà be èdùjikpɔtɔa be mù la hũhũ jiŋùkusi ku ànyigbã a.

²²Mù la mù èfìɔwo pu ànyi, eye mù la gbã dùkɔ̃wo be èfìɔduwo be ŋusɛ̃. Mù la trɔ mù àhùakèkeviwo ku woa kùtɔwo pu ànyi. Èsɔwo ku èsɔdotɔwo la jè ànyi lè woa ŋutɔ woa nɔ̀viwo be èwuiwo nu.”

²³Àhùadù Tɔhonɔ̀a gblɔ̃ be: “Gbè ŋua gbèa, mù la sɔ èwò, sumɔ̃vi nyè Zòrobabɛ̀l, Sɛltìɛl be èvia,” Tɔhonɔ̀ ye gblɔ̃ ɛ̀, “eye mù la sɔ wò do àlɔ̀vi, sìgbè nyikɔ-lɔ̀gàvi nyè nène, ɖoa, mù cã wò.” Àhùadù Tɔhonɔ̀a ye gblɔ̃ ɛ̀.