Read gen Zakarìa 10 Bible Online

Zakarìa 10 - gen bible

Zakarìa 10

¹Mì biɔ Tɔhonɔ̀ èji-si wàlɛbɛ kè ye mìabe àgblèwo le hiã èsìa. E ye nana èji-si sɛ̃sɛ̃wo jànà. E la na èsì sùgbɔ la jà eye e la na àgblè ɖe sia ɖe be nukuwo la wɔ̀.

²Vòduwo dona àjèɖàɖa be àŋɛ̀wo. Èsɔ̀mèkpɔtɔwo cã mu kpɔna ènu tututu ò. Èdrɔ̃ kuku kè be ènyà wo gblɔ̃nà cã mu ɖona ètù ò, wo blènà woa ɖokoe kudo ènyà kè àya le sɔ le yìa. Ènu kèa ŋuti ye dùkɔ̃a jo yì sìgbè ŋuzĩzĩ be èlãha kè mu ɖo kplɔ̀tɔ òa nène.

³“Mù do àdɔ̀mèze ɖo kplɔ̀tɔ bàɖàwo ŋuti, mù la sitè ɖo gbɔgbɔɛwo ŋuti. Ɛ̃ɛ, ènyè Tɔhonɔ̀ ŋusɛ̃kpatatɔa, mù la kpɔ ɖo e mè na àpe àlɛ̃ha, Yudà be dùkɔ̃a. Mù la sɔ ɛ̀ wɔ̀ àpe àhùawɔ̀-sɔ nyuɛ̃.

⁴Kplɔ̀tɔ vòvòvòwo la so Yudà, wo la sɛ̃ŋu sìgbè èxɔ̀ be koŋùjikpe nène. Wo la trì sìgbè èxɔ̀ti nène, wo la ɖo ŋusɛ̃ sìgbè àhùawɔ̀wɔ be àŋùdàti nène.

⁵Wo la ɖì kãlìsuwo. Wo la tùkù àmè kèwo le wɔ̀ àhùa kudo woa sìgbè bàba lè èmɔ̃ dòmè nène. Nène ye wo la wɔ̀ àvũ ɖo, ènyè Tɔhonɔ̀ mù lè kudo wo. Àhùasɔdotɔ kèwo ye sitè ɖo woa ŋutia, la ɖɔ kudo ŋùkpɛ̃.

⁶Mù la do ŋusɛ̃ Yudà be dùkɔ̃a, mù la hlùɛ̃ Izràɛl be dùkɔ̃a gã. Mù la trɔ kplɔ̀ wo gbɔ̀ va woabe èdù mè, ɖo mù ku ŋuzĩzĩ na wo. Wo la trɔ nɔ̀ sìgbè nyè mu bijì do wo sã ò nène. Ɛ̃ɛ, mù nyi Tɔhonɔ̀, woabe Mawu, eye mù la ɖo woabe kuefãwo ŋuti.

⁷Efràyim be ŋusùwo la dojì sìgbè kãlìsuwo nène. Wo la nɔ̀ jìjɔɛ mè sìgbè vɛ̃ ye wo nù nène. Ne wo kè ɖo woa ŋutia, woabe èviwo la kpɔ jìjɔɛ, eye wo la ɖu jìjɔɛ be èwè ɖo Tɔhonɔ̀ ŋuti.

⁸Mù la yɔ àpe dùkɔ̃mètɔwo bɔ̀. Ɛ̃ɛ, mù la na wo vòvo, eye wo la sùgbɔ sɔ wu sãa.

⁹Mù kãkã woa dòmè sã ɖo dùkɔ̃ buwo dòmè, sìgbè lekè wo dona nukua nène. Vɔ̀ wo la ɖo ŋùku ji nyè lè dùkɔ̃ kèwo lè àzɔ̀ge boawo dòmè. Wo la nɔ̀ funu kudo woabe èviwo, e yomè a, wo la trɔ gbɔ̀ va àxue.

¹⁰Mù la kplɔ̀ wo so Ejiptè va, eye so Àsirìa, mù la bɔ̀ wo ɖodu. Mù la kplɔ̀ wo to Gilead be àgo ji kudo Libàn be ètowo mè. Vɔ̀ gãkea, tèpe sùgbɔ mu la nɔ̀ ànyi na wo ò.

¹¹Wo la sò gbledo be àpùa. Ènyè Tɔhonɔ̀, mù la pò àpù srɔ̀kewo. Ejiptè be ètɔ̀ gã ŋutɔ cã la pu kplakpla. Àsirìa be èdù kè le yigòa, la jè ànyi keŋu-keŋu Ejiptè la bu yebe hɔ̃hlɔ̃a.

¹²Mù la na ŋusɛ̃ yeyewo àpe dùkɔ̃a, eye wo la wɔ̀ ènu kè jɔ̀nàjì na mù a. Ènyè Tɔhonɔ̀ ye le gblɔ̃ ɛ̀.”