Read gen Zakarìa 11 Bible Online

Zakarìa 11 - gen bible

Zakarìa 11

¹Libàn be ètowo, mì hũ mìabe àgbowo, eye èzò ne vũvũ mìabe sedàtiwo!

²Sipròtiwo, mì do àpa sɔ jèhùɛ, ɖo sedàtiwo jè ànyi, àti nyakpɔkpɔ ŋuawo crɔ̃. Basàn be àti sɛ̃sɛ̃wo, mì ŋɛ̃, ɖo wo gbã mìabe àve do àmà vĩia.

³Mì ɖoto dùkɔ̃wo be kplɔ̀tɔwo le ŋɛ̃, ɖo woabe hɔ̃hlɔ̃a bu keŋu-keŋu. Mì ɖoto jãŋùtaviwo le do àdã be àpa, ɖo lè Yɔrdàn be ètɔa ŋuti kaka yìa, wo crɔ̃ àvevi nyakpɔawo.

⁴Tɔhonɔ̀ Mawu nyè do ègbè kèa àsi na mù be: “Trɔ zũ ègbɔ kèwo wo ɖo la wùawo be kplɔ̀tɔ.

⁵Àmè kèwo plè woa, wù wo eye wo xɔ̀sè be yèwo mu wɔ̀ ènu bàɖà ɖekpe ò. Àmè kèwo lè sà woa, gblɔ̃ be: “Mi do àkpe na Tɔhonɔ̀, ɖo mi trɔ zũ ècitɔwo!” Woabe kplɔ̀tɔwo cã mu ku ŋuzĩzĩ na wo ò.

⁶Ènyè Tɔhonɔ̀, mù le gblɔ̃ be nyè mu la gbà ku ŋuzĩzĩ na àmè kèwo lè ànyigbã jia ò. Mù la do àgbètɔ àsi na yebe èhavi kudo yebe èfìɔa. Èfìɔwo la gùdù ànyigbã a kpata eye nyè mu la hlùɛ̃ àmè ɖekpe gã lè woabe àsi mè ò.”

⁷Eye nènea mù trɔ zũ ègbɔ kèwo ènusàtɔ bàɖàwo jro la wùa be kplɔ̀tɔ. Eye mù sɔ èlãkplɔ̀kpo èvè. Mù ɖo na cucugbã tɔ̀a be “Lɔ̃lɔ̃” eye mù yɔ èvègɔ̃a be “Ɖèkawɔ̀wɔ”, eye mù tɔ ègbɔawo kpɔ̀kplɔ.

⁸Lè wètri ɖèka mèa, mù nyà woabe ègbɔkplɔ̀tɔ ètɔ̃awo. E yomè a, mù bu àdòdò lè ègbɔawo ŋuti, eye woa cã wo mu gbà teŋu le dojì lè ŋùkɔ̀ na mù ò.

⁹Nène a, mù gblɔ̃ na wo be: “Nyè mu la gbà kè ènu do e mè na mì ke ò. Ègbɔ kèwo ɖo la kuawo ne ku! Ekèwo la crɔ̃awo ne crɔ̃! Eye kèwo la kpɔ̀tɔ̀ ci àgbèawo ne ɖù woa nɔ̀nɔwo!”

¹⁰E yomè a, mù sɔ èkpò kè mù ɖo na be “Lɔ̃lɔ̃ a” eye mù ŋɛ̃ ɛ̀. Nène a ye mù gbã zòɖùɖu kè Tɔhonɔ̀ wɔ̀ kudo dùkɔ̃wo kpataa.

¹¹Wàlɛbɛ ŋua ye zòɖùɖua gbã. Ènusàtɔ bàɖà kèwo le kpɔ mù gà ŋua mèa wo sè e mè be: Tɔhonɔ̀ ye le pò nupo to àpe wɔ̀nawo ji.

¹²Eye kpòa, mù gblɔ̃ na wo be: “Ne e jè ŋùkumè na mìa, mì tufɛ̃ nyèa na mù. Ne mu nyi nène òa, mu kã mù ò!” Eye wo hlɛ̃ àpe èfɛ̃tua: Klòsalò-ga ègbã.

¹³Tɔhonɔ̀ gblɔ̃ na mù be: “Àsì kè mù teŋu xɔ̀ lè woa gbɔa yeŋu! Sɔ ègà xɔ̀asì ŋua yì gosìmitì gbɔ!” Mù sɔ klòsalò-ga ègbãa yì gosìmitì gbɔ lè mawuxɔa mè.

¹⁴E yomè a, mù ŋɛ̃ àpe èkpò èvègɔ̃a “Ɖèkawɔ̀wɔ”. Nène a mù gbã ɖèkawɔ̀wɔ kè lè Yudà kudo Izràɛl dòmè sìgbè nɔ̀viwo nènea.

¹⁵Tɔhonɔ̀ gbà do ègbè kèa àsi na mù be: “Fifìa wò la wɔ̀ sìgbè wò nyi kplɔ̀tɔ sùkunɔ̀ nène.

¹⁶Nyàwo, mù la trɔ dɔ̃ kplɔ̀tɔ bu ɖoɖa èdùa mè. Mu la kpɔ ègbɔ kèwo sòkàwo gbɔ ò, mu la yì ji ègbɔ kèwo kãkã ò, mu la blabì na kèwo jè àfɔ̀kua ò, mu la na nuɖùɖu kèwo lè nyuɛ̃ ɖe a ò. Vɔ̀ e la ɖù ègbɔ kèwo do àmìa be èlã, eye e la ŋɛ̃ àfɔ̀ na wo.”

¹⁷Jɔ̀gbèvuɛ̃ kɛ ye be nyi na kplɔ̀tɔ sùkunɔ̀ kè gble yebe èlãhaa ɖɛ ò! Wo ne ŋɛ̃ àbɔ na ɛ̀ eye woa gbã ɖùsimè be ŋùku na ɛ̀ lè àhùa! Yebe àbɔ ne jɔ̃ keŋu-keŋu eye yebe ɖùsimè be ŋùkua mu gbà kpɔ ènu na ɛ̀ ke gbèɖe ò!