Read gen Zakarìa 13 Bible Online

Zakarìa 13 - gen bible

Zakarìa 13

¹“Wàlɛbɛ ŋua, èsìdo ɖe la ji eye be la lè David be àxuedo kudo Yèruzàlɛmtɔwo ɖì so woabe àgɔ̀wo kudo mà-kɔ̀ mà-kɔ̀wo mè.”

²Tɔhonɔ̀ ŋusɛ̃kpatatɔa gblɔ̃ be: “Wàlɛbɛ ŋua, mù la ɖè àjè mawuwo jo lè èdùa mè, eye wo mu la gbà yɔ woabe nyikɔ ke ò. Mù la nyà àjè gblɔ̃ɖɛtɔwo jo lè ànyigbã ji eye mù la ɖè àjè mawuwo be sɛ̃sɛ̃ be jro lè mìa mè.

³Ne àmè ɖe jro la sɔ ye ɖokoe wɔ̀ gblɔ̃ɖɛtɔa, ètɔa kudo ènɔa wo ye la gblɔ̃ na ɛ̀ be: “Èku ke wò la ku, ɖo wò le ɖàjè lè Tɔhonɔ̀ be nyikɔ mè.” Eye wàlɛbɛ kè be le pò nupo àjètɔ̀ lè àpe nyikɔ mèa, ètɔa ku ènɔa la do è èku.

⁴Wàlɛbɛ ŋua, èŋù la kpɛ̃ gblɔ̃ɖɛtɔ kèwo le wɔ̀ gblɔ̃ɖɛtɔ ne woa gblɔ̃ ènu kè wo kpɔa. Èzò mu la gbà blè wo ne woa sɔ gblɔ̃ɖɛtɔwo be àwù sɔ do, ne woa blè àmè ɖe ò.

⁵Vɔ̀ àmè sia àmè la gblɔ̃ be: “Nyè mu nyi gblɔ̃ɖɛtɔ ò, àgblèdàtɔ ye mù nyi. Mù ɖo àgblèwo so kaka àpe ɖèkajɛ mè.”

⁶Eye ne àmè ɖe biɔ wo be: “Àbìkpa kèwo lè àkɔta na mìawo be gɔ̃mèsèse ɖe?” Wo la ɖo e ŋuti be: “Mia xlɔ̃wo gbɔ ye mi xɔ̀ àbì kèawo lè.”

⁷Ènyà kè Tɔhonɔ̀ ŋusɛ̃kpatatɔa gblɔ̃a ye kè: “Èwui sitè ɖo àpe kplɔ̀tɔa ŋuti, ɖo èxlɔ̃ nyè kè wɔ̀nà kãlì a ŋuti. Wù kplɔ̀tɔa, nènea, ègbɔwo la kã hlɛ̃, eye mù la xa ègbɔviawo.”

⁸Tɔhonɔ̀ gblɔ̃ kpe è be: “Èdùamètɔwo be àkpa mamã mè èvè lè ètɔ̃ mè la ku, mamã mè ɖèka lè ètɔ̃ mè la teŋu ci àgbè.

⁹Mù la do àmè kèwo la gbà kpɔ̀tɔ̀awo kpɔ kudo èzò, mù la na wo la kɔ̀ sìgbè àlekè wo kɔ̀nà klòsalòa nène. Mù la kpɔ woabe àsìxɔ̀xɔ, sìgbè àlekè wo kpɔna sìka be àsìxɔ̀xɔa nène. Eye wo la do àpa yɔ mù eye mù la tɔ̀ na wo. Mù la gblɔ̃ be: “Mì nyi àpe dùkɔ̃”, eye wo la gblɔ̃ be: “Tɔhonɔ̀, èwò ye nyi miabe Mawu.”