Read gen Zakarìa 14 Bible Online

Zakarìa 14 - gen bible

Zakarìa 14

¹Tɔhonɔ̀ be ŋùkèkèa gogo, mìa Yèruzàlɛmtɔwo. Dùkɔ̃ kpɔ̀tɛawo la ma mìabe àdɔ̀kùnuwo lè mìabe ŋùku mè.

²Tɔhonɔ̀ la bɔ̀ dùkɔ̃ kpɔ̀tɛawo eye wo la xa mìabe èdùa. Wo la xɔ̀ Yèruzàlɛm, wo la ɖè àbòyo àxuewo, wo la wɔ̀ ènu drã kudo nyɔ̃nùwo. Wo la kplɔ̀ dùkɔ̃a be mamã mè yì gàtɔnugbe vɔ̀, àkpa mamã mè èvègɔ̃a mu la jo lè èdùa mè ò.

³Nène a, Tɔhonɔ̀ la sitè ɖo dùkɔ̃ kpɔ̀tɛawo ŋuti. E la wɔ̀ àvũ sìgbè àlekè be wɔ̀nà àvũ kòɖò lè àhùa be hùenua nène.

⁴Àzã ŋua jia, e la nɔ̀ àmìti-toa ji, lè Yèruzàlɛm gbɔ, lè èdùa be èwèzɛ̃pe. Àmìti-toa la fɛ̃ lè dòdòmè, eye e la wɔ̀ bàlì gã ɖe so èwèzɛ̃pe va yì èwèɖoxɔ̀pe. Ètoa be àkpa ɖèka la yì èvègo eye èvègɔ̃a la yì àpùgo.

⁵Mì la si to bàlì kè èto fɛ̃fɛ̃a wɔ̀a mè, ɖo e la yì kaka Asàl. Mì la si sìgbè mìa tɔgbewo nène lè Yudà be èfìɔ Òzias be hùenu, lè wàlɛbɛ kè ànyigbã hũhũa. Nène a, Tɔhonɔ̀, àpe Mawu la va kudo yebe àtikplɔtɔ kèwo sumɔna ɛ̀a.

⁶Ŋùkèkè ŋua, wo mu la gbà hiã kɔ̀kɔ̀ɛ ò. Àvìvɔ mu la gbà wɔ̀ àmè ò, fàfa mu la gbà le àmè kaka be la jàti ò.

⁷Lè hùenu kè Tɔhonɔ̀ ɖèka pɛɛ nyaa, kɔ̀kɔ̀ɛ la nɔ̀ ànyi tɛ̀gbɛ̀. Èzã àlo kedè mu la gbà nɔ̀ ànyi ò. Wètrɔ mè ŋutɔ cã, kɔ̀kɔ̀ɛ la nɔ̀ ànyi.

⁸Lè ŋùkèkè ŋua jia, èsìdo ɖe la to so Yèruzàlɛm. Yebe èsìa be àkpa ɖèka la srà yì èjè-pùa mè, àkpa èvègɔ̃a la srà yì àpù gãa mè. E la nɔ srà lè èpèa kpata mè, so èjijàja hùenu va ɖo èkuɖìɖi hùenu.

⁹Tɔhonɔ̀ la trɔ Èfìɔ lè ànyigbã kpata ji. Ŋùkèkè ŋua jia, Tɔhonɔ̀ ɖèka kpò wo la sumɔ sìgbè Mawu nène, eye àmèwo kpata la fãkue lè yebe nyikɔ ɖèka kpò mè.

¹⁰Àgo kèwo trɔdo Yèruzàlɛm be èdùa kpata la trɔ zũ gbàjàji, so kaka Gebà, lè èdùa be èvègo va kɔ̀ ɖo Rimɔ̀n lè àpùgo. Yèruzàlɛm la nɔ̀ èkpoa ji eye èdùa la kèkè so kaka Bɛnyamìn be àgboa ji va kɔ̀ ɖo kɔ̃nà ji be àgboa ji, fikè ye àgbo xoxoa nɔ̀a. E la so Hànanèl be àsãŋu gã gbɔ va Èfìɔ be vɛ̃fiɔ̃pewo.

¹¹Àmèwo la nɔ̀ èdùa mè, wo mu la gbà crɔ̃ ɛ̀ ɖe ò, eye àmèwo la kpɔ àgbɔ̃jèpò lè èdùa mè.

¹²Jɔ̀gbèvuɛ̃ kèwo Tɔhonɔ̀ la ɖùɖù kɔ̀ ɖo dùkɔ̃ kèwo wɔ̀ àvũ ku Yèruzàlɛm be èdùa jia, ye nyi be: wàlɛbɛ kè wo kpɔ̀tɔ̀ lè àgbè ŋutɔ cã, woabe ŋutilãwo la vovo. Woabe ŋùkuwo la nyìnyɔ̀ lè àkpà mè na wo eye woabe àɖe la pìpì lè ènu mè na wo.

¹³Ŋùkèkè ŋua jia, Tɔhonɔ̀ la do vɔ̃vɔ̃ gã ɖe woa dòmè. Wo la wɔ̀ àvũ lè woa nɔ̀nɔwo dòmè eye àmè sia àmè la sitè ɖo yebe havi ŋuti.

¹⁴Yudà be ŋusùwo la va wɔ̀ àhùa lè Yèruzàlɛm. Wo la ɖè àbòyo dùkɔ̃ kèwo trɔdo woa be àdɔ̀kùnuwo: sìka, klòsalò, àwù xɔ̀asìwo. Wo la lɔ wo zĩ ɖo èdùa ŋuti trɔ do.

¹⁵Jɔ̀gbèvuɛ̃ kèwo jè kɛ̃tɔwo jia, wo ke la jè woabe èlãwo cã ji, èsɔwo ku èdɔwɔ̀lãwo, èsɔ èkpotɔnɔ̀wo kudo èsɔ àkɛtɛwo.

¹⁶So ŋùkèkè ŋua jia, àmè kèwo kpɔ̀tɔ̀ ci àgbè lè àmè kèwo wɔ̀ àhùa kudo Yèruzàlɛmtɔwo dòmèa, la nɔ yì Yèruzàlɛm èpè sia èpè. Funu ye wo la nɔ sumɔ Tɔhonɔ̀ ŋusɛ̃kpatatɔa lè eye wo la yì nɔ ɖù ègòxɔwo be àzã.

¹⁷Ne dùkɔ̃ ɖe lè ànyigbã ji mu yì Yèruzàlɛm òa, èji mu la jà kɔ̀ ɖo yebe ànyigbã ji ò.

¹⁸Ne Ejiptètɔwo mu yì ɖù ègòxɔwo be àzã lè Yèruzàlɛm òa, jɔ̀gbèvuɛ̃ la va woa ji sìgbè lekè be la va na dùkɔ̃ kpɔ̀tɛawo nène.

¹⁹E la nyi ètodɔ̃ na Ejiptè kudo dùkɔ̃ kèwo mu la yì àzã ŋua tèpe òa.

²⁰Wo la ŋlɔ̀ lè ŋùkèkè ŋua ji be: “Wo ɖè è ɖovò na Tɔhonɔ̀”, ɖo èsɔwo be àyroloewo ŋutɔ cã ŋuti. Mawuxɔa be èzewo cã la nyi ènu ɖè ɖovò sìgbè kogò kèwo mè èlãwo be èhũ nɔ̀nà lè vɔsakpea be ŋùkɔ̀a nène.

²¹Wo la ɖè Yèruzàlɛm kudo Yudà be èdùwo kpata be èzewo ɖovò na xixea be Tɔhonɔ̀. Àmè kèwo la va wɔ̀ vɔsaa, la zã wo sɔ ɖà vɔsalãa. Wàlɛbɛ kè ye ŋùkèkè ŋua la va, ènusàtɔwo mu la gbà nɔ̀ àhùadù Tɔhonɔ̀a be mawuxɔa mè ò.