Read gen Zakarìa 2 Bible Online

Zakarìa 2 - gen bible

Zakarìa 2

¹Mù kɔ ŋùmè yì ji eye mù kpɔ àzò ènè.

²Mù biɔ àtikplɔtɔ kè le pò nupo na mù a be: “Gɔ̃mèsèse kɛ ye lè àzò ènè kèawo si ò?” E ɖo e ŋuti na mù be: “Wo lè èdù sɛ̃ŋu kèwo nyà Yudà, Izràɛl kudo Yèruzàlɛm be dùkɔ̃wo so àkpawo kpataa be tèpe.”

³E yomè a, Tɔhonɔ̀ ɖè èzògbɛ̀dɛ ènè fiɔ mù.

⁴Mù biɔ sè be: “Nukɛ ye wo va la wɔ̀ ò?” E ɖo e ŋuti na mù be: “Wo va la do vɔ̃vɔ̃ji gbà crɔ̃ èdù sɛ̃ŋu kèwo xa Yudà be èdùa. Wo nyà Yudàtɔwo to àkpawo keŋu, eye àmè ɖekpe mu teŋu nɔ̀tè lè woa nu ò.”

⁵Ènyè Zakarìa, mù kɔ ŋùmè yì ji eye mù kpɔ ŋusù ɖe kè le èkà kè wo sɔ jijena ènua ɖo àsi.

⁶Mù biɔ ɛ̀ be: “Fikɛ ye wò le yì ò?” E ɖo e ŋuti be: “Mù le ja jije Yèruzàlɛm sɔ nya yebe dìdi kudo kèke mè.”

⁷Àtikplɔtɔ kè le pò nupo na mù a zɔ̃ va ŋùkɔ̀ viɖe eye àtikplɔtɔ bu zɔ̃ va dogò è.

⁸Eye àtikplɔtɔ kè le pò nupo na mù a gblɔ̃ na ɛ̀ be: “Ɖèbla yì gblɔ̃ na ŋusù ɖèkajɛvi kè le jijekaa be: “Yèruzàlɛm ɖo la nyi èdù kè lè nùvòa, eye èglì ɖekpe mu la nyi àkpoxɔ̀nu na ɛ̀ ò. Nyàwo àgbètɔ kudo èlã kèwo kpata lè e mèawo la jì ɖo ji drì.”

⁹Kpɔɖa ènyà kè Tɔhonɔ̀ gblɔ̃a ye nyi be: “Nyè ŋutɔ mù la nyi èzò be èglìkpa trɔ do èdùa, eye mù la ɖè gogo nyèa fiɔ lè woabe dòdò mè.”

¹⁰Tɔhonɔ̀ gblɔ̃ be: “Mì àmè kèwo mù nyà to àkpawo kpata, so èvègo kudo àpùgo, so èwèzɛ̃pe kudo èwèɖoxɔ̀pea, mì si fifì, mì jo lè èvègo nyigbã kè nyi Babɛ̀l be èfìɔdua mè.

¹¹Mì yì! Yèruzàlɛmviwo, mì àmè kèwo yì sò ci Babɛ̀l nyigbã jia, mì jo kaba!”

¹²Tɔhonɔ̀ ŋusɛ̃kpatatɔa sɔ ènyà veve ɖe do àsi na mù. Kpɔɖa ènyà kè be gblɔ̃ so dùkɔ̃ kèwo hlà mì ɖù a ŋutia ye nyi be: “Àmè kè va xa mìa, xa àpe àdɔ̀kùnu vevetɔ.

¹³Ɛ̃ɛ, mù la tùnu kudo dùkɔ̃ kpɔ̀tɛawo. Nène a, àmè kèwo nyi woabe kluviwo sã, la va hlà wo.” Wàlɛbɛ kè ènu kèa la va e mèa, mì la nya be Tɔhonɔ̀ ŋusɛ̃kpatatɔa ye dɔ̃ mù ɖoɖa.

¹⁴Tɔhonɔ̀ gbà gblɔ̃ be: “Do jìjɔɛ be àpa, kpɔ jìjɔɛ, Yèruzàlɛm. Kpɔɖa mù gbãnà. Mù la va sò àxue ɖo dòdò mè na wò.

¹⁵Gbè ŋua gbèa, dùkɔ̃ sùgbɔ la trɔ va ènyè Tɔhonɔ̀ gbɔ. Wo la trɔ zũ àpe dùkɔ̃. Vɔ̀ àpo dòdò mè ye mù la sò àxue ɖo.” Wàlɛbɛ kè e la jɔ̀ a, mì la nya ɛ̀ be Tɔhonɔ̀ Ŋusɛ̃kpatatɔa ye dɔ̃ mù ɖoɖa mìa gbɔ.

¹⁶Yudà la trɔ nyi Tɔhonɔ̀ tɔ̀ lè ànyigbã kè nyi e tɔ̀a ji. Eye Yèruzàlɛm la trɔ nyi èdù kè be cã na ɛ̀a.

¹⁷Ènu sia ènu ne bɔ̀nu lè Tɔhonɔ̀ be ŋùkɔ̀! Ɛ̃ɛ, e fɔ̃ eye e to lè yebe Nɔ̀pe Kɔ̀kɔ̀ɛ.