Read gen Zakarìa 5 Bible Online

Zakarìa 5 - gen bible

Zakarìa 5

¹Mù gbà kɔ ŋùkumè yì ji eye mù kpɔ xoma ɖe kè lè ŋɔŋlɔ̃a le zrò lè àya mè.

²Àtikplɔtɔa biɔ mù be: “Nukɛ ye wò le kpɔ ò?” Mù ɖo e ŋuti be: “Mù kpɔ xoma ŋɔŋlɔ̃ ɖe le zrò lè àya mè. E ɖo dìdimè metà èwo eye e kèkè metà àtɔ̃.”

³Nène a, àtikplɔtɔa gblɔ̃ na mù be: “Kpɛ̃sɛ̃-nya kèwo ye wo dà ɖo èdùa kpata ŋutia ye. Lè xoma a be àkpa ɖèkaa, wo ŋlɔ̀ ɖɛ be wo la nyà fìãfìwo kpata to lè èdùa mè. Lè àkpa èvègɔ̃a, wo ŋlɔ̀ be wo la nyà àjè ŋùgbèɖotɔwo kpata cã to.

⁴Tɔhonɔ̀ ŋusɛ̃kpatatɔa gblɔ̃ be: Mù dà kpɛ̃sɛ̃ kèa ne bèa ɖo fìãfìwo kudo àmè kèwo sɔ àpe nyikɔ sɔ fìã àjè be àjɔ̀gbèwo be àxomè. E la nɔ̀ funu sɔ crɔ̃ ènu sia ènu, kaka jè àtikpo kudo èkpewo ŋutɔ cã ji.”

⁵Àtikplɔtɔ kè le pò nupo na mù a, zɔ̃ va ŋùkɔ̀ gblɔ̃ na mù be: “Kɔ ŋùmè yì ji ne wòa kpɔ ènu kè ze a ɖa!”

⁶Mù biɔ ɛ̀ be: “Nukɛ ye be le ɖɔ̀lì ò?” E ɖo e ŋuti be: “E nyi àgbã kè mè èdùa be àgɔ̀jèjewo kpata lèa.”

⁷Wàlɛbɛ ŋua, suŋubui be nùtuvi kè lè àgbãa nua kɔ yì ji. Mù kpɔ nyɔ̃nù ɖe nɔ̀ ànyi ɖo àgbãa mè.

⁸Àtikplɔtɔa gblɔ̃ na mù be: “Nyɔ̃nù kèa ye nyi èkunyànyrã.” E yomè a, e trɔ tùtù ì ɖo àgbãa mè eye e tu nùvia ɖo e nu.

⁹Eye mù kɔ ŋùmè yì ji eye mù kpɔ nyɔ̃nù èvè ɖewo ze. Wo ɖo àwàda sìgbè xèvi àdɔ̃ sɛ̃ŋu tɔ̀ nène. Àya le tùtù wo eye wo le zrò. Wo va sɔ àgbãa eye wo sɔ ɛ̀ yì jiŋùkusi ku ànyigbã a dòmè.

¹⁰Mù biɔ àtikplɔtɔa be: “Fikɛ ye wo sɔ àgbãa le yì ò?”

¹¹E ɖo e ŋuti na mù be: “Èdù kè wo yɔna be èsì-èvè[2] dòmè. Funu ye nyɔ̃nùawo la tù èxɔ̀ na èkunyànyrã ɖo. Wo la sɔ ɛ̀ dà ɖo funu eye mu la gbà hùã gbèɖe ò.”